పరకాల, ఆగస్టు 19 (జనవాణి): తెలంగాణ కాంగ్రెస్‌లో మరోసారి రాజకీయ కలకలం రేగింది. పరకాల నియోజకవర్గానికి సంబంధించి మంత్రి కొండా సురేఖ కుమార్తె సుష్మితా పటేల్ చేసిన వ్యాఖ్యలు రాష్ట్ర రాజకీయాల్లో చర్చనీయాంశంగా మారాయి. సీఎం రేవంత్ రెడ్డిని లక్ష్యంగా చేసుకుని ఆమె తీవ్ర విమర్శలు చేశారు. మంత్రి కొండా సురేఖ జన్మదిన వేడుకల సందర్భంగా మాట్లాడిన సుష్మితా పటేల్.. వచ్చే ఎన్నికల్లో తనకు కాంగ్రెస్ టికెట్ ఇవ్వకపోతే పరకాల నుంచి ఇండిపెండెంట్‌గా పోటీ చేస్తానని ప్రకటించారు. ఎవరొచ్చినా పరకాల నుంచి తానే పోటీ చేస్తానని, స్వతంత్ర అభ్యర్థిగా నిలబడి గెలుస్తానని ధీమా వ్యక్తం చేశారు.
ముఖ్యమంత్రి అయిన తర్వాత రేవంత్ రెడ్డి వ్యవహారశైలిలో మార్పు వచ్చిందని ఆమె విమర్శించారు. మంత్రి పొంగులేటి శ్రీనివాస్ రెడ్డి ముఖ్యమంత్రా? లేక రేవంత్ రెడ్డి ముఖ్యమంత్రా? అసలు ఎవరు సీఎం అనేది అర్థం కావడం లేదు అంటూ వ్యాఖ్యానించారు.
రేవంత్ రెడ్డి పీసీసీ అధ్యక్షుడిగా బాధ్యతలు చేపట్టడంలో తన తల్లి కొండా సురేఖ పాత్ర ఉందని సుష్మితా పటేల్ పేర్కొన్నారు. రేవంత్ రెడ్డి పీసీసీ అధ్యక్షుడు కావాలని మొదట కోరుకున్నది కొండా సురేఖ అవునా? కాదా? చెప్పాలని డిమాండ్ చేశారు. ముఖ్యమంత్రి అయిన తర్వాత రేవంత్ రెడ్డికి ‘కళ్లు నెత్తికెక్కాయా?’ అంటూ తీవ్ర వ్యాఖ్యలు చేశారు.
పరకాల ఎమ్మెల్యే రేవూరి ప్రకాశ్ రెడ్డి విజయంలో తమ కుటుంబం సహకారం ఉందని ఆమె పేర్కొన్నారు. గతంలో సహాయం చేసిన తన తండ్రి ఇప్పుడు కనిపించడం లేదా? అని ప్రశ్నించారు. రేవూరి ప్రకాశ్ రెడ్డిని ఇప్పుడే రాజీనామా చేయించి, రేవంత్ రెడ్డి ప్రచారం చేసినా తాను ఇండిపెండెంట్‌గా పోటీ చేసి గెలుస్తానని సవాల్ చేశారు.
రేవంత్ రెడ్డిని గతంలో కొడంగల్ ప్రజలు ఓడించారని గుర్తుచేసిన సుష్మితా పటేల్.. అలాంటి పరిస్థితుల్లో ఆయన పదేళ్లు ముఖ్యమంత్రిగా ఉంటానని ఎలా చెబుతున్నారని ప్రశ్నించారు. రేవంత్ రెడ్డి పీసీసీ అధ్యక్షుడిగా ఎదగడానికి సహకరించిన దయాసాగర్ రావు, షబ్బీర్ అలీ వంటి నేతలకు ఇప్పుడు అపాయింట్‌మెంట్ కూడా ఇవ్వడం లేదని ఆరోపించారు.
రేవంత్ రెడ్డి కుటుంబ సభ్యులపై కూడా సుష్మితా పటేల్ తీవ్ర ఆరోపణలు చేశారు. వేం నరేందర్ రెడ్డిని సలహాదారుగా నియమించిన నేపథ్యంలో మూడేళ్లలో ఆయన ఇచ్చిన సలహాలు ఏమిటని ప్రశ్నించారు. రేవంత్ రెడ్డి తమ్ముడు షెల్ కంపెనీ ఏర్పాటు చేస్తే రూ.200 కోట్ల విలువైన భూమిని ధారాదత్తం చేశారని ఆరోపించారు. అయితే, ఈ ఆరోపణలకు సంబంధించి ఆమె ఎలాంటి ఆధారాలను వెల్లడించలేదు. 'తెలంగాణలో అచ్చ కాంగ్రెస్ వర్సెస్ పచ్చ కాంగ్రెస్ నడుస్తోంది' అంటూ సుష్మితా పటేల్ సంచలన వ్యాఖ్యలు చేశారు.
చివరగా పరకాల రాజకీయాలపై తన వైఖరిని స్పష్టం చేస్తూ.. రేవంత్ రెడ్డి గానీ, రేవూరి ప్రకాశ్ రెడ్డి గానీ ఎవరొచ్చినా పరకాల నుంచి తానే పోటీ చేస్తానని అన్నారు. రేవూరి ప్రకాశ్ రెడ్డితో రాజీనామా చేయించి, రేవంత్ రెడ్డి ప్రచారం చేయాలని సవాల్ చేశారు. తాను ఇండిపెండెంట్‌గా పోటీ చేసి గెలుస్తానని ధీమా వ్యక్తం చేశారు. తన వ్యాఖ్యలకు కౌంటర్ ఇస్తే ప్రెస్ క్లబ్‌లో కూర్చొని రేవంత్ రెడ్డికి సంబంధించిన మరిన్ని విషయాలను బయటపెడతానని సుష్మితా పటేల్ హెచ్చరించారు. దీంతో పరకాల కాంగ్రెస్‌లో నెలకొన్న అంతర్గత విభేదాలు మరోసారి బహిర్గతమైనట్లయ్యాయి.
