హైదరాబాద్, సెప్టెంబర్ 7 (జనవాణి): తెలంగాణ శాసనసభ స్పీకర్ గడ్డం ప్రసాద్ కుమార్‌పై బీఆర్ఎస్ ఎమ్మెల్సీ తాతా మధు చేసిన వ్యాఖ్యలపై కాంగ్రెస్ మంత్రులు తీవ్రంగా స్పందించారు. తాతా మధు వ్యాఖ్యలు స్పీకర్ పదవిని అవమానించేలా ఉన్నాయని మంత్రి పొన్నం ప్రభాకర్ మండిపడ్డారు. ఆయనపై వెంటనే క్రమశిక్షణా చర్యలు తీసుకుని సస్పెండ్ చేయాలని డిమాండ్ చేశారు. స్పీకర్ గడ్డం ప్రసాద్ కుమార్‌ను స్వయంగా కలిసిన పొన్నం ప్రభాకర్.. ఆయనకు సంఘీభావం తెలిపారు. రాజ్యాంగబద్ధమైన పదవిలో ఉన్న స్పీకర్‌ను అవమానించడం అంటే కేవలం ఒక వ్యక్తిని కించపరచడం కాదని, ప్రజాస్వామ్య వ్యవస్థ గౌరవాన్ని దెబ్బతీయడమేనని అన్నారు. స్పీకర్ పదవికి ఉన్న గౌరవాన్ని ప్రతి ఒక్కరూ కాపాడాలని సూచించారు.
దళిత వర్గానికి చెందిన వ్యక్తి స్పీకర్ స్థానంలో ఉండటాన్ని బీఆర్ఎస్ నేతలు ఓర్వలేకపోతున్నారని పొన్నం ప్రభాకర్ విమర్శించారు. మాజీ సీఎం కేసీఆర్ అసెంబ్లీకి హాజరు కాకపోవడాన్ని ప్రస్తావిస్తూ.. ఆయన పార్టీకి చెందిన ఎమ్మెల్సీ రాజ్యాంగ వ్యవస్థపై అనుచిత వ్యాఖ్యలు చేస్తుంటే ఎందుకు మౌనంగా ఉన్నారని ప్రశ్నించారు. ఈ వ్యవహారంపై కేసీఆర్ వెంటనే స్పందించాలని డిమాండ్ చేశారు.
మరోవైపు మంత్రి సీతక్క కూడా తాతా మధుపై తీవ్ర ఆగ్రహం వ్యక్తం చేశారు. అసెంబ్లీ స్పీకర్‌గా ఉన్న ఒక దళిత వ్యక్తిని ఉద్దేశించి తాతా మధు చేసిన వ్యాఖ్యలు సభ్య సమాజం తలదించుకునేలా ఉన్నాయని అన్నారు. తాతా మధును బీఆర్ఎస్ నుంచి వెంటనే సస్పెండ్ చేయాలని, శాసనమండలి సభ్యత్వాన్ని రద్దు చేయాలని డిమాండ్ చేశారు. అనుచిత వ్యాఖ్యలు చేసిన తాతా మధును కేటీఆర్, హరీశ్‌రావు వెనకేసుకుని రావడం సరికాదని సీతక్క విమర్శించారు. మహిళలు, దళితుల పట్ల గౌరవం ఉంటే తాతా మధుపై బీఆర్ఎస్ అధిష్ఠానం చర్యలు తీసుకోవాలని అన్నారు.
శాసనసభ, స్పీకర్ పదవి పట్ల కనీస గౌరవం లేకుండా వ్యవహరించిన తాతా మధుపై తక్షణమే కఠిన చర్యలు తీసుకోవాలని పొన్నం ప్రభాకర్, సీతక్క డిమాండ్ చేశారు. ఈ వ్యవహారం తెలంగాణ రాజకీయాల్లో మరింత వేడి రాజేసే అవకాశం కనిపిస్తోంది.
