బెంగళూరు: దేశంలో సెమీకండక్టర్ పరిశ్రమ విస్తరణలో తెలంగాణ కీలక పాత్ర పోషించగల సామర్థ్యం కలిగిన రాష్ట్రంగా ఎదిగిందని రాష్ట్ర ఐటీ, పరిశ్రమలు, శాసన వ్యవహారాల మంత్రి దుద్దిళ్ల శ్రీధర్‌బాబు అన్నారు. ఇండియా సెమీకండక్టర్ మిషన్ (ISM)-2.0 అమలులో తెలంగాణకు తగిన ప్రాధాన్యం కల్పించాలని ఆయన కేంద్ర ప్రభుత్వాన్ని కోరారు.
బెంగళూరులో నిర్వహించిన 'రైజింగ్ భారత్ సమ్మిట్ - సౌత్ ఎడిషన్' కార్యక్రమంలో పాల్గొన్న మంత్రి, దక్షిణ భారతదేశంలో సాంకేతిక రంగం, మౌలిక వసతులు, పెట్టుబడులు, ఆవిష్కరణలపై జరిగిన చర్చలో తెలంగాణ అభివృద్ధి నమూనాను వివరించారు.
హైదరాబాద్‌కు ప్రత్యేక గుర్తింపు
ప్రపంచ స్థాయి మౌలిక సదుపాయాలు, నైపుణ్యం కలిగిన మానవ వనరులు, పెట్టుబడిదారులకు అనుకూలమైన పారిశ్రామిక విధానాల వల్ల హైదరాబాద్ గ్లోబల్ కేపబిలిటీ సెంటర్లకు ప్రధాన కేంద్రంగా మారిందని శ్రీధర్‌బాబు తెలిపారు. ప్రపంచంలోని అనేక ప్రముఖ బహుళజాతి సంస్థలు తమ జీసీసీలను హైదరాబాద్‌లో ఏర్పాటు చేయడం రాష్ట్రంపై ఉన్న అంతర్జాతీయ విశ్వాసానికి నిదర్శనమని చెప్పారు.
చిప్ డిజైన్‌లో తెలంగాణ బలం
ప్రపంచంలోని ప్రముఖ సెమీకండక్టర్ డిజైన్ కంపెనీలు హైదరాబాద్‌ను తమ కార్యకలాపాల కేంద్రంగా ఎంచుకున్నాయని మంత్రి వెల్లడించారు. చిప్ డిజైన్, కృత్రిమ మేధ (AI), సైబర్ సెక్యూరిటీ, అధునాతన ఎలక్ట్రానిక్స్ రంగాల్లో వేలాది మంది అత్యున్నత నైపుణ్యం కలిగిన ఇంజినీర్లు పనిచేస్తుండటంతో సెమీకండక్టర్ తయారీ రంగానికి అవసరమైన బలమైన ఎకోసిస్టమ్ ఇప్పటికే తెలంగాణలో ఏర్పడిందని పేర్కొన్నారు.
"ప్రస్తుతం చిప్ డిజైన్ రంగంలో తెలంగాణ ప్రపంచ స్థాయిలో తన ప్రతిభను చాటుతోంది. ఈ సామర్థ్యాన్ని గుర్తించి సెమీకండక్టర్ మిషన్-2.0లో రాష్ట్రానికి ప్రాధాన్యం ఇస్తే భారీ పెట్టుబడులను ఆకర్షించే అవకాశం ఉంటుంది" అని శ్రీధర్‌బాబు అన్నారు.
పెట్టుబడులకు అనువైన రాష్ట్రం
తెలంగాణలో అమలవుతున్న సింగిల్ విండో విధానం, 21 రోజుల్లో పరిశ్రమలకు అనుమతులు, ప్రపంచ ప్రమాణాల మౌలిక వసతులు పెట్టుబడిదారులను ఆకర్షిస్తున్నాయని మంత్రి తెలిపారు. రాష్ట్రవ్యాప్తంగా ఆప్టికల్ ఫైబర్ కనెక్టివిటీ విస్తరించడంతో చిన్న పట్టణాల్లో కూడా పరిశ్రమలు ఏర్పాటు చేసేందుకు అనుకూల వాతావరణం ఏర్పడిందన్నారు.
సాఫ్ట్‌వేర్, ఏరోస్పేస్, రక్షణ, ఔషధ పరిశ్రమలు, బ్యాంకింగ్, ఆర్థిక సేవలు, హాస్పిటాలిటీ, బ్యూటీ టెక్నాలజీ వంటి రంగాలకు చెందిన అనేక అంతర్జాతీయ సంస్థలు ఇప్పటికే హైదరాబాద్‌ను తమ గ్లోబల్ కార్యకలాపాల కేంద్రంగా ఎంచుకున్నాయని వివరించారు.
టియర్-2, టియర్-3 నగరాలపై ఫోకస్
రాష్ట్ర అభివృద్ధిని హైదరాబాద్‌కే పరిమితం చేయకుండా ద్వితీయ, తృతీయ శ్రేణి నగరాలను కూడా జీసీసీలు, ఏఐ ఆధారిత పరిశ్రమలు, అధునాతన తయారీ యూనిట్ల కేంద్రాలుగా తీర్చిదిద్దేందుకు ప్రభుత్వం ప్రత్యేక కార్యాచరణ రూపొందించిందని శ్రీధర్‌బాబు వెల్లడించారు. ఇందుకోసం కొత్త ప్రోత్సాహకాలు, అత్యాధునిక మౌలిక వసతులు, భవిష్యత్ అవసరాలకు అనుగుణంగా నైపుణ్య మానవ వనరులను సిద్ధం చేస్తున్నట్లు తెలిపారు.
మరోసారి కేంద్రానికి విజ్ఞప్తి
సెమీకండక్టర్ డిజైన్, ఎలక్ట్రానిక్స్, ఆవిష్కరణల రంగాల్లో తెలంగాణ ఇప్పటికే సాధించిన విజయాలను దృష్టిలో ఉంచుకుని ఇండియా సెమీకండక్టర్ మిషన్-2.0లో రాష్ట్రానికి ప్రత్యేక ప్రాధాన్యం ఇవ్వాలని శ్రీధర్‌బాబు మరోసారి కేంద్ర ప్రభుత్వాన్ని కోరారు.
తెలంగాణకు సెమీకండక్టర్ తయారీ పెట్టుబడులు వస్తే రాష్ట్ర పారిశ్రామికాభివృద్ధితో పాటు ప్రపంచ సెమీకండక్టర్ రంగంలో భారత్ లక్ష్యాలు మరింత వేగంగా నెరవేరుతాయని ఆయన అభిప్రాయపడ్డారు.
