ఆషాఢ మాసం మూడవ శుక్రవారం సందర్భంగా పసుపు అలంకరణలో దర్శనమిచ్చిన శ్రీ మాతా నిమిషాంబ దేవి

హైదరాబాద్, జులై 31: భక్తుల పాలిట కొంగుబంగారంగా వెలుగొందుతూ, బొడుప్పల్‌లో కొలువై భక్తజనులను కరుణాకటాక్షాలతో అనుగ్రహిస్తున్న అఖిలాండకోటి బ్రహ్మాండనాయకి శ్రీ మాతా నిమిషాంబ దేవి అమ్మవారు ఆషాఢ మాసం మూడవ శుక్రవారం సందర్భంగా మంగళప్రదమైన పసుపుతో విశేష దివ్య అలంకరణలో సాక్షాత్కరించి భక్తులకు దర్శన భాగ్యాన్ని ప్రసాదించారు.
సౌభాగ్యప్రదాయిని, సర్వమంగళ శక్తి స్వరూపిణి అయిన అమ్మవారిని దర్శించుకునేందుకు పెద్ద సంఖ్యలో భక్తులు ఆలయానికి తరలివచ్చారు. విశేష పూజలు, అర్చనలు, మంగళహారతుల నడుమ అమ్మవారి దివ్య దర్శనం భక్తులను ఆధ్యాత్మిక పరవశంలో ముంచెత్తింది. అమ్మవారి అనుగ్రహంతో భక్తుల సకల మనోభీష్టాలు నెరవేరి, ఆయురారోగ్యాలు, ఐశ్వర్యం, సుఖశాంతులు చేకూరాలని ఆలయ నిర్వాహకులు ఆకాంక్షించారు.
ఈ కార్యక్రమంలో ఆలయ చైర్మన్ శ్రీ కామరౌతు వినోద్ కుమార్, సెట్లర్ శ్రీమతి కళావతి, ప్రధాన కార్యదర్శులు శ్రీ కె. అశోక్ కుమార్, శ్రీ సంగు శ్రీనివాస్, రాష్ట్ర నకాష్ సంఘం ప్రధాన కార్యదర్శి శ్రీ కొరిచెర్ల శ్రీనివాస్ రావు, ఆలయ ప్రధాన అర్చకులు శ్రీ చంద్రశేఖర్ శర్మ, అర్చకుడు శ్రీ ఉమాకాంత్ శర్మ తదితరులు పాల్గొన్నారు.