ఉజ్జయిని మహంకాళి బోనాలు.. హైదరాబాద్‌లో ట్రాఫిక్ ఆంక్షలు.. ఏ రూట్లు మూసివేత?

మహంకాళి బోనాలు: హైదరాబాద్ నగరంలో బోనాల ఉత్సాహం నెలకొంది. సికింద్రాబాద్‌లోని ఉజ్జయిని మహంకాళి ఆలయంలో జరిగే బోనాల జాతర సందర్భంగా భక్తుల రద్దీని దృష్టిలో ఉంచుకుని ట్రాఫిక్ పోలీసులు ప్రత్యేక ఆంక్షలు విధించారు. ఆగస్టు 2 నుంచి 4వ తేదీ తెల్లవారుజామున 3 గంటల వరకు ఆలయం చుట్టూ రెండు కిలోమీటర్ల పరిధిలో ట్రాఫిక్ మళ్లింపులు అమల్లో ఉంటాయని ట్రాఫిక్ జాయింట్ కమిషనర్ జోయల్ డేవిస్ తెలిపారు.

ఈ సందర్భంగా కర్బాలా మైదాన్, రాణిగంజ్, ప్యారడైజ్, సీటీఓ జంక్షన్, ప్లాజా, ఎస్‌బీఐ క్రాస్‌రోడ్స్, వైఎంసీఏ క్రాస్‌రోడ్స్, సెయింట్ జాన్స్ రోటరీ, సంగీత్ క్రాస్‌రోడ్స్, ప్యాట్నీ, పార్క్ లేన్, బాటా, ఘాస్‌మండి, బైబిల్ హౌస్, మినిస్టర్స్ రోడ్, రసూల్‌పురా తదితర ప్రాంతాల్లో భారీ ట్రాఫిక్ రద్దీ ఏర్పడే అవకాశం ఉందని అధికారులు హెచ్చరించారు.

మూసివేసే రహదారులు

టొబాకో బజార్, హమాలీ విగ్రహం నుంచి ఆలయానికి వెళ్లే మార్గాలు, బాటా క్రాస్‌రోడ్స్ నుంచి రోచా బజార్ వరకు ఉన్న సుభాష్ రోడ్, హిల్ స్ట్రీట్ నుంచి అడవయ్య క్రాస్‌రోడ్స్ మీదుగా ఆలయానికి వెళ్లే రోడ్లను తాత్కాలికంగా మూసివేయనున్నారు.

ట్రాఫిక్ మళ్లింపులు

ఎస్‌బీఐ క్రాస్‌రోడ్స్, ప్యారడైజ్ నుంచి ట్యాంక్‌బండ్ వైపు వెళ్లే వాహనాలను ప్యాట్నీ–మినిస్టర్ రోడ్–క్లాక్ టవర్–సంగీత్–చిలకలగూడ–కవాడిగూడ మార్గాల్లో మళ్లిస్తారు.

ప్యారడైజ్ నుంచి బైబిల్ హౌస్ వైపు వెళ్లే వాహనాలను ప్యాట్నీ వద్ద ఎస్‌బీఐ క్రాస్‌రోడ్స్ లేదా క్లాక్ టవర్ వైపు మళ్లిస్తారు.

బైబిల్ హౌస్ నుంచి సికింద్రాబాద్ రైల్వే స్టేషన్ వెళ్లే వాహనాలు సజ్జన్‌లాల్ స్ట్రీట్ లేదా హిల్ స్ట్రీట్ మార్గాన్ని ఉపయోగించాలని సూచించారు.

భారీ వాహనాలను కర్బాలా మైదాన్, రాణిగంజ్ మార్గాల్లో మళ్లించనున్నారు.

CTO నుంచి ఎంజీ రోడ్ వైపు వెళ్లే వాహనాలను ప్యారడైజ్ వద్ద సింధీ కాలనీ, మినిస్టర్ రోడ్ మీదుగా దారి మళ్లిస్తారు.

భక్తులకు పార్కింగ్ సౌకర్యం

బోనాల జాతరకు వచ్చే భక్తులు హరిహర కళాభవన్, మహబూబ్ కాలేజీ, సీఎంఆర్ షాపింగ్ మాల్, పాత జైలు ఖానా ఖాళీ స్థలం, ఇస్లామియా హైస్కూల్, ప్రభుత్వ అడవయ్య మెమోరియల్ హైస్కూల్, నల్లగుట్ట జీహెచ్‌ఎంసీ గ్రౌండ్, యశోద పార్కింగ్, మహాత్మా గాంధీ విగ్రహం సమీపం, పార్సీ టెంపుల్, వెస్లీ కాలేజీ, జింఖానా గ్రౌండ్, స్వప్నలోక్ కాంప్లెక్స్, తాజ్ త్రీ స్టార్ లైన్ ప్రాంతాల్లో వాహనాలను పార్క్ చేసుకోవచ్చని పోలీసులు తెలిపారు.

175 ప్రత్యేక ఆర్టీసీ బస్సులు

భక్తుల రాకపోకలను సులభతరం చేసేందుకు తెలంగాణ ఆర్టీసీ నగరంలోని వివిధ ప్రాంతాల నుంచి ఉజ్జయిని మహంకాళి ఆలయానికి 175 ప్రత్యేక బస్సులను నడుపుతోంది. ప్రజలు వీలైనంత వరకు ప్రజారవాణాను వినియోగించాలని అధికారులు సూచించారు.

అత్యవసర పరిస్థితుల్లో ట్రాఫిక్ హెల్ప్‌లైన్: 9010203626ను సంప్రదించాలని ట్రాఫిక్ పోలీసులు తెలిపారు.