మహారాష్ట్రలోని నిఫాడ్ నగర పంచాయత్ కార్యాలయంలో వినూత్న నిరసన చోటుచేసుకుంది. వీధి కుక్కల బెడదపై పలుమార్లు ఫిర్యాదు చేసినా అధికారులు చర్యలు తీసుకోవడం లేదంటూ శివసేన (యూబీటీ) యువసేన నేతలు ఆగ్రహం వ్యక్తం చేశారు. ఈ క్రమంలో కుక్క పిల్లలను సంచుల్లో తీసుకెళ్లి ఏకంగా పంచాయత్ ప్రధాన అధికారి టేబుల్‌పై వదిలారు. అంతేకాకుండా కరెన్సీ నోట్ల దండతో నిరసన తెలిపేందుకు ప్రయత్నించడంతో కార్యాలయంలో ఉద్రిక్తత నెలకొంది.
‘ఢీ’ డ్యాన్స్ రియాలిటీ షోతో గుర్తింపు తెచ్చుకున్న డ్యాన్సర్, ‘ఢీ-20’ విన్నర్ రాజు అరెస్ట్ అయ్యాడు. పెళ్లి చేసుకుంటానని నమ్మించి తనను శారీరకంగా వాడుకుని, వివిధ అవసరాల పేరుతో సుమారు రూ.12 లక్షలు తీసుకుని మోసం చేశాడంటూ ఓ యువతి మియాపూర్ పోలీసులకు ఫిర్యాదు చేసింది. కేసు నమోదు చేసిన పోలీసులు రాజును అరెస్ట్ చేసి కోర్టులో హాజరుపరచగా.. న్యాయస్థానం రిమాండ్ విధించింది.
నేపాల్-టిబెట్ సరిహద్దులో సంభవించిన భారీ వరదలు తీవ్ర విషాదాన్ని మిగిల్చాయి. ఈ ఘటనలో ఇప్పటివరకు 552 మంది మరణించగా.. 1,400 మందికి పైగా గల్లంతయ్యారు. గల్లంతైన వారిలో 178 మంది భారతీయులు ఉన్నట్లు నేపాల్ పోలీసులు వెల్లడించారు. తాజాగా గల్లంతైన వారి జాబితాను విడుదల చేశారు. అయితే, నేపాల్‌లో సుమారు 320 మంది భారతీయుల ఆచూకీ తెలియడం లేదని భారత విదేశాంగ శాఖ తెలిపింది.
