అఖిల్ అక్కినేని హీరోగా తెరకెక్కిన 'లెనిన్' సినిమా బాక్సాఫీస్ వద్ద ఘన విజయం సాధించింది. విడుదలైన 20 రోజుల్లోనే రూ.100 కోట్ల కలెక్షన్లు సాధించి అఖిల్ కెరీర్‌లోనే బిగ్గెస్ట్ హిట్‌గా నిలిచింది. సినిమా విజయోత్సాహంలో ఉన్న చిత్రబృందం ఇప్పుడు ఒక్కో వీడియో సాంగ్‌ను ప్రేక్షకుల ముందుకు తీసుకొస్తోంది.
యూట్యూబ్‌లో హాల్ చల్ చేస్తున్న 'బంగారం' వీడియో సాంగ్
తాజాగా మేకర్స్ 'బంగారం' వీడియో సాంగ్‌ను విడుదల చేశారు. ఈ పాటలో ప్రత్యేకత ఏమిటంటే... అఖిల్ అక్కినేని స్వయంగా ఈ పాటను ఆలపించడం. సినిమా విడుదలకు ముందు ఈ విషయాన్ని గోప్యంగా ఉంచడంతో, థియేటర్లలో ఈ పాట చూసిన అభిమానులకు ఇది సర్‌ప్రైజ్‌గా మారింది. ఇప్పుడు యూట్యూబ్‌లో విడుదలైన తర్వాత ఈ మెలోడీ సాంగ్‌కు మంచి ఆదరణ లభిస్తోంది.
సినిమాలో లెనిన్, భారతి పెళ్లి తర్వాత వారి మధ్య పెరిగే ప్రేమను చూపించే సందర్భంలో 'బంగారం' పాట వస్తుంది. థమన్ అందించిన మెలోడీయస్ ట్యూన్‌కు రామజోగయ్య శాస్త్రి హృద్యమైన సాహిత్యం జతకావడంతో పాట మరింత ఆకట్టుకుంటోంది. "నీకు నాకు మధ్యన ఎవ్వరూ వద్దులే... ఇద్దరమే మనమిద్దరమే ఒక లోకమే..." అంటూ సాగే ఈ గీతం ప్రేక్షకుల హృదయాలను హత్తుకుంటోంది.
మళ్లీ మైక్ పట్టిన అఖిల్
ఇది అఖిల్ కెరీర్‌లో మొదటి పాట కాదు. గతంలో 'హలో' సినిమాలో 'ఏవేవో కలలు' పాటను కూడా అఖిల్ ఆలపించారు. ఆ పాట అప్పట్లో చార్ట్‌బస్టర్‌గా నిలిచింది. ఇప్పుడు మళ్లీ 'లెనిన్' కోసం మైక్ పట్టి అభిమానులను ఆకట్టుకున్నారు. ఇటీవల జరిగిన 'లెనిన్' గుంటూరు సక్సెస్ సెలబ్రేషన్స్‌లో కూడా తన భార్యను ప్రేమగా 'బంగారు తల్లి' అని పిలుస్తానని అఖిల్ చెప్పడం అభిమానులను ఆకట్టుకుంది.
మరో రెండు వీడియో సాంగ్స్ కూడా రిలీజ్
'బంగారం' పాటతో పాటు 'జయ మంగళం', 'రకసికరా' వీడియో సాంగ్స్‌ను కూడా చిత్రబృందం యూట్యూబ్‌లో విడుదల చేసింది. థమన్ సంగీతం, రామజోగయ్య శాస్త్రి సాహిత్యం ఈ పాటలకు ప్రత్యేక ఆకర్షణగా నిలుస్తున్నాయి. జులై 10న రిలీజైన ఈ సినిమా.. 20 రోజుల్లో రూ.100 కోట్ల కలెక్షన్స్ రాబట్టింది.
