మెగా హీరో రామ్ చరణ్ ఆరోగ్యానికి సంబంధించిన ఓ వార్త ప్రస్తుతం సోషల్ మీడియాలో వైరల్‌గా మారింది. మణికట్టు గాయానికి చికిత్సలో భాగంగా ఆయన కోయంబత్తూరులోని ఓ ప్రముఖ ప్రైవేట్ ఆస్పత్రిలో శస్త్రచికిత్స చేయించుకోనున్నట్లు సినీ వర్గాల్లో ప్రచారం జరుగుతోంది.
కుటుంబ సభ్యులు కూడా వెంటనే...
ఈ సర్జరీ సందర్భంగా రామ్ చరణ్‌కు అండగా ఉండేందుకు తండ్రి చిరంజీవి, తల్లి సురేఖ, భార్య ఉపాసన కూడా కోయంబత్తూరుకు వెళ్లినట్లు సమాచారం. అయితే దీనిపై మెగా కుటుంబం లేదా చిత్రబృందం నుంచి ఇప్పటివరకు ఎలాంటి అధికారిక ప్రకటన వెలువడలేదు.
'పెద్ది' షూటింగ్‌లో గాయమా?
ఇండస్ట్రీ వర్గాల సమాచారం ప్రకారం, 'పెద్ది' సినిమా చిత్రీకరణ సమయంలోనే రామ్ చరణ్ మణికట్టుకు గాయమైనట్లు అప్పట్లో వార్తలు వచ్చాయి. అనంతరం సినిమా ప్రచార కార్యక్రమాల్లో కూడా ఆయన చేతికి సపోర్ట్ బ్యాండ్ ధరించి కనిపించడంతో ఆ వార్తలకు మరింత బలం చేకూరింది.
అప్పుడే వైద్యులు శస్త్రచికిత్స సూచించినప్పటికీ, సినిమా విడుదల, ప్రచార కార్యక్రమాల కారణంగా ఆపరేషన్‌ను వాయిదా వేసినట్లు ప్రచారం జరిగింది.
త్వరగా కోలుకోవాలని అభిమానుల ఆకాంక్ష
ప్రస్తుతం రామ్ చరణ్ ఆరోగ్యంపై అభిమానులు ఆందోళన వ్యక్తం చేస్తున్నారు. సోషల్ మీడియాలో ఆయన త్వరగా కోలుకుని మళ్లీ షూటింగ్‌లలో పాల్గొనాలని మెగా అభిమానులు పోస్టులు చేస్తున్నారు. సర్జరీ విజయవంతంగా పూర్తవాలని ఆకాంక్షిస్తూ శుభాకాంక్షలు తెలియజేస్తున్నారు.
తదుపరి సినిమా ఎప్పుడంటే...
ఇక రామ్ చరణ్ తదుపరి చిత్రంపై కూడా భారీ అంచనాలు నెలకొన్నాయి. దర్శకుడు సుకుమార్‌తో ఆయన మరోసారి జతకట్టనున్న విషయం ఇప్పటికే అధికారికంగా ప్రకటించారు. 'రంగస్థలం' తర్వాత ఈ కాంబినేషన్ మళ్లీ రిపీట్ అవుతుండటంతో అభిమానుల్లో ఆసక్తి నెలకొంది.
అయితే ప్రస్తుతం రామ్ చరణ్ ఆరోగ్యానికి ప్రాధాన్యం ఇవ్వనున్న నేపథ్యంలో తదుపరి సినిమా షూటింగ్ షెడ్యూల్‌లో స్వల్ప మార్పులు ఉండే అవకాశం ఉందని సినీ వర్గాలు చెబుతున్నాయి. దీనిపై కూడా అధికారిక వివరాలు రావాల్సి ఉంది.
