కర్ణాటక, సెప్టెంబర్ 8 (జనవాణి): కర్ణాటకలోని దావణగెరెలో షాకింగ్ ఘటన చోటుచేసుకుంది. గాయపడిన చిరుతను రక్షించేందుకు వెళ్లిన అటవీ శాఖ అధికారులపై అదే చిరుత ఒక్కసారిగా దాడి చేసింది. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.
దావణగెరె హైవేపై రోడ్డు దాటుతున్న చిరుతను ఓ కారు ఢీకొట్టింది. ఈ ప్రమాదంలో చిరుత తీవ్రంగా గాయపడింది. సమాచారం అందుకున్న అటవీ శాఖ అధికారులు వెంటనే అక్కడికి చేరుకుని దాన్ని రక్షించేందుకు రెస్క్యూ ఆపరేషన్ చేపట్టారు. చిరుతను అదుపులోకి తీసుకునేందుకు అధికారులు మత్తుమందు ఇచ్చారు. అయితే, మత్తు పూర్తిగా ప్రభావం చూపకముందే చిరుత ఒక్కసారిగా సిబ్బందిపై దూసుకొచ్చి దాడి చేసింది. ఈ ఘటనలో ఓ అటవీ అధికారి గాయపడ్డారు.
కాసేపటి తర్వాత చిరుత మత్తులోకి జారుకోవడంతో అధికారులు దాన్ని సురక్షితంగా బంధించారు. అనంతరం చికిత్స అందించేందుకు ఆసుపత్రికి తరలించారు. రెస్క్యూ ఆపరేషన్‌లో చోటుచేసుకున్న ఈ అనూహ్య ఘటనకు సంబంధించిన దృశ్యాలు సోషల్ మీడియాలో వైరల్ అవుతున్నాయి.
Loading Tweet...
