నల్గొండ, ఆగస్టు 8: ఎల్‌నినో ప్రభావంతో నాగార్జునసాగర్‌ ప్రాజెక్టులో ప్రస్తుతం ఉన్న నీరు తాగునీటి అవసరాలకే సరిపోతుందని రాష్ట్ర రోడ్లు, భవనాలు, సినిమాటోగ్రఫీశాఖ మంత్రి కోమటిరెడ్డి వెంకట్‌రెడ్డి తెలిపారు. సాగర్‌లోకి ఎగువ నుంచి నీరు వచ్చే అవకాశాలు కూడా లేనందున రైతులు ఎట్టి పరిస్థితుల్లోనూ వరి సాగు చేయకుండా ఆరుతడి పంటలు వేసుకునేలా అధికారులు, ప్రజాప్రతినిధులు అవగాహన కల్పించాలని సూచించారు. సాగర్‌ నిండినా చెరువులు నింపే పరిస్థితి ఉండకపోవచ్చని చెప్పారు.
శనివారం నల్గొండ జిల్లా కలెక్టరేట్‌లో నిర్వహించిన జిల్లా సాగునీటి సలహా మండలి సమావేశానికి మంత్రి ముఖ్యఅతిథిగా హాజరయ్యారు. ఈ సందర్భంగా మంత్రి కోమటిరెడ్డి మాట్లాడుతూ.. ప్రస్తుతం నాగార్జునసాగర్‌లో నీరు డెడ్‌స్టోరేజీలో ఉందన్నారు. శ్రీశైలం నుంచి నీరు వచ్చినా పంటలకు సాగునీరు అందించే పరిస్థితి లేదని చెప్పారు. ప్రస్తుతం ఉన్న నీరు 2027 జూన్‌ వరకు తాగునీటి అవసరాలకు సరిపోతుందని తెలిపారు. ఏఎంఆర్‌పీ కూడా సగమే నిండిందన్నారు. ఇలాంటి పరిస్థితి గతంలో ఎప్పుడూ లేదని పేర్కొన్నారు.
1.50 లక్షల ఎకరాల్లో ఆరుతడి పంటలు
జిల్లాలో పంట మార్పిడిలో భాగంగా ఇప్పటికే 33 వేల ఎకరాల్లో వరికి బదులుగా ఆరుతడి పంటలు సాగు చేస్తున్నారని మంత్రి తెలిపారు. దీన్ని 1.50 లక్షల ఎకరాలకు పెంచేలా చర్యలు తీసుకోవాలని అధికారులను ఆదేశించారు. కరువు పరిస్థితుల్లో రైతులకు అధికారులు, ప్రజాప్రతినిధులు అండగా నిలవాలని సూచించారు. క్షేత్రస్థాయిలో పర్యటించి రైతులకు ధైర్యం చెప్పడంతో పాటు ఆరుతడి పంటల సాగుపై అవగాహన కల్పించాలన్నారు.
జిల్లాలోని ప్రాజెక్టుల కింద రైతులు వరుసగా రెండు పంటలు వరి సాగు చేయడం వల్ల భూముల సారం దెబ్బతింటోందని మంత్రి పేర్కొన్నారు. అధికంగా ఎరువులు వినియోగించడం, నిరంతరం వరి సాగు చేయడం వల్ల భవిష్యత్తులో ఇతర పంటలు వేసుకోలేని పరిస్థితి ఏర్పడే ప్రమాదం ఉందన్నారు. కూరగాయలు, ఉద్యాన పంటలు సాగు చేయడంతో పాటు సేంద్రియ వ్యవసాయంపై రైతులకు అవగాహన కల్పించాలని సూచించారు.
కరువు వచ్చినా నల్గొండ జిల్లాకు శాశ్వతంగా సాగునీరు అందించే ఎస్‌ఎల్‌బీసీ సొరంగం పనులను 2028 ఆగస్టు నాటికి పూర్తి చేస్తామని కోమటిరెడ్డి తెలిపారు. పనులు కొనసాగుతున్నాయని చెప్పారు. ఏఎంఆర్‌పీ, ఎస్‌ఎల్‌బీసీ, బ్రాహ్మణ వెల్లెంల ద్వారా జిల్లాలో నాలుగు లక్షల ఎకరాలకు సాగునీరు అందించే అవకాశం ఉంటుందని పేర్కొన్నారు. ఎస్‌ఎల్‌బీసీ కోసం ఎంతైనా ఖర్చు చేయాలని ముఖ్యమంత్రి ఆదేశించారని తెలిపారు. శ్రీశైలం డెడ్‌స్టోరేజీలో ఉన్నప్పటికీ ఎస్‌ఎల్‌బీసీ ద్వారా సాగునీరు అందించే అవకాశం ఉంటుందని అన్నారు.
జిల్లాలో సుమారు 9 వేల ట్రాన్స్‌ఫార్మర్లపై ఉన్న ఓవర్‌లోడ్‌ను దృష్టిలో ఉంచుకొని అవసరమైన విద్యుత్‌ సామగ్రిని సమకూర్చేందుకు ముఖ్యమంత్రితో మాట్లాడతానని మంత్రి చెప్పారు. జిల్లాకు 5 వేల స్ప్రింక్లర్‌ యూనిట్లు కావాలని అధికారులు కోరగా.. వాటిని తక్షణమే మంజూరు చేయించేందుకు చర్యలు తీసుకుంటానని హామీ ఇచ్చారు.
ఆగస్టు 15లోగా ఆరుతడి పంటలు
ఎల్‌నినో ప్రభావంతో వర్షాలు తక్కువగా ఉన్నందున రానున్న రోజుల్లో సాగునీటికి మరింత ఇబ్బందులు ఎదురయ్యే అవకాశం ఉందని ఎమ్మెల్సీ శంకర్‌నాయక్‌ అన్నారు. రైతులను కలిసి పంట మార్పిడిపై అవగాహన కల్పించాలని సూచించారు.
జిల్లా కలెక్టర్‌ బి.చంద్రశేఖర్‌ మాట్లాడుతూ.. ప్రాజెక్టుల్లో తగినంత నీరు లేనందున రానున్న రోజుల్లో ఎగువ నుంచి సాగునీరు వచ్చే అవకాశాలు తక్కువగా ఉన్నాయని తెలిపారు. రైతులు ఆరుతడి పంటలు వేసుకునేలా వ్యవసాయ, ఉద్యానశాఖ అధికారులు క్షేత్రస్థాయిలో అవగాహన కల్పించాలని కోరారు. ఆగస్టు 15 వరకు మాత్రమే ఆరుతడి పంటలు వేసుకునే అవకాశం ఉన్నందున రైతులను చైతన్యపరచాలని సూచించారు. మున్సిపాలిటీల్లో రూఫ్‌ వాటర్‌ హార్వెస్టింగ్‌ నిర్మాణాలను ప్రోత్సహించాలని అధికారులను ఆదేశించారు.
