మానవత్వానికి అద్దం పట్టే ఘటన హైదరాబాద్‌లోని మల్కాజ్‌గిరి పోలీస్ కమిషనరేట్‌లో చోటుచేసుకుంది. పోలీస్ అధికారి కావాలనే కలతో ఉన్న దివ్యాంగ యువకుడు రాహుల్‌కు మల్కాజ్‌గిరి పోలీస్ కమిషనర్ బి. సుమతి మరపురాని అనుభూతిని అందించారు.
రాహుల్‌ను ప్రత్యేకంగా మల్కాజ్‌గిరి పోలీస్ కమిషనరేట్‌కు ఆహ్వానించిన కమిషనర్ సుమతి, ఆత్మీయంగా స్వాగతం పలికారు. అనంతరం తన కార్యాలయంలోకి తీసుకెళ్లి కమిషనర్ కుర్చీలో కూర్చోబెట్టి, కొద్దిసేపు పోలీస్ అధికారిగా విధులు నిర్వహిస్తున్న అనుభూతిని కల్పించారు.
పోలీస్ టోపీ బహూకరణ
ఈ సందర్భంగా కమిషనర్ సుమతి రాహుల్‌కు పోలీస్ టోపీని బహూకరించారు. అతనితో కొంతసేపు ఆప్యాయంగా మాట్లాడి, పోలీస్ యూనిఫామ్‌పై తనకున్న అభిమానాన్ని, భవిష్యత్తులో పోలీస్ అధికారి కావాలన్న ఆశయాన్ని తెలుసుకున్నారు. అక్కడున్న పోలీస్ అధికారులు కూడా రాహుల్‌ను అభినందిస్తూ అతనికి ప్రోత్సాహం అందించారు.
కుటుంబ సభ్యుల ఆనందం
ఈ ప్రత్యేక అనుభవంతో రాహుల్ ఆనందానికి అవధులు లేకుండా పోయాయి. తన చిరకాల కోరిక నెరవేరడంతో అతడు భావోద్వేగానికి గురయ్యాడు. ఈ సందర్భంగా కుటుంబ సభ్యులు మల్కాజ్‌గిరి పోలీస్ కమిషనర్‌తో పాటు పోలీస్ అధికారులకు కృతజ్ఞతలు తెలిపారు.
మానవత్వానికి నిదర్శనంగా ప్రశంసలు
ఈ కార్యక్రమంపై పలువురు ప్రశంసలు వ్యక్తం చేస్తున్నారు. చట్ట అమలుతో పాటు ప్రజల భావోద్వేగాలను అర్థం చేసుకుంటూ మానవత్వం, కరుణ, ప్రజాసేవ పట్ల తమ నిబద్ధతను మల్కాజ్‌గిరి పోలీసులు మరోసారి చాటిచెప్పారని అభిప్రాయపడుతున్నారు.
