సినిమా డెస్క్, జనవాణి: ‘కరుప్పు’ తర్వాత సూర్య నటించిన చిత్రం కావడం.. ‘లక్కీ భాస్కర్‌’తో దర్శకుడిగా తనదైన ముద్ర వేసిన వెంకీ అట్లూరి తెరకెక్కించడం.. సితార ఎంటర్‌టైన్‌మెంట్స్‌ వంటి సంస్థ నిర్మించడంతో ‘విశ్వనాథ్‌ అండ్‌ సన్స్‌’పై విడుదలకు ముందే మంచి అంచనాలు ఏర్పడ్డాయి. అందుకు తగ్గట్టుగానే కుటుంబ బంధాలు, భావోద్వేగాలు, వినోదాన్ని మేళవిస్తూ సినిమా సాగుతుంది. సూర్య, మమితా బైజు జోడీ కొత్తగా అనిపిస్తుంది. మరి ఈ సినిమా ప్రేక్షకులను ఎంతవరకు మెప్పించింది? తెలుసుకోవాలంటే రివ్యూలోకి వెళ్లాల్సిందే.
కథేంటి?
సంజయ్‌ విశ్వనాథ్‌ (సూర్య) ఓ విజయవంతమైన వ్యాపారవేత్త. అంతేకాదు.. షూటింగ్‌లో ఒలింపిక్‌ గోల్డ్‌ మెడలిస్ట్‌. 40 ఏళ్లు దాటినా పెళ్లి మాత్రం చేసుకోడు. తల్లి నిర్మల (రాధికా శరత్‌కుమార్‌) మాత్రం తన కొడుకు పెళ్లి చేసుకుని కుటుంబాన్ని ఏర్పరుచుకోవాలని కోరుకుంటుంది. అయితే చిన్ననాటి కొన్ని అనుభవాల కారణంగా సంజయ్‌కు పెళ్లి, బంధాలపై పెద్దగా నమ్మకం ఉండదు.
తల్లి కోరికను పూర్తిగా కాదనలేక.. తన వంశం కొనసాగాలన్న ఆమె ఆవేదనను అర్థం చేసుకుని సరోగసీ ద్వారా ఓ మగబిడ్డకు తండ్రి అవుతాడు. అయితే కొంతకాలానికి ఆ బిడ్డ అరుదైన బోన్‌మ్యారో సమస్యతో బాధపడతాడు. చికిత్సకు జన్మనిచ్చిన తల్లి బోన్‌మ్యారో అవసరమవుతుంది. దీంతో సంజయ్‌ అమెరికా వెళ్లి తన బిడ్డను మోసిన మ్యాడీ (మమితా బైజు)ని వెతికి పట్టుకుంటాడు.
డబ్బు అవసరంతో మ్యాడీ కూడా బిడ్డకు సాయం చేసేందుకు భారత్‌కు వస్తుంది. చికిత్స పూర్తయ్యే వరకు ఉండాల్సిన ఆమె.. సంజయ్‌ కుటుంబానికి దగ్గరవుతుంది. ముఖ్యంగా సంజయ్‌ తల్లితో మంచి అనుబంధం ఏర్పడుతుంది. మరోవైపు సంజయ్‌ వ్యక్తిత్వానికి ఆకర్షితురాలైన మ్యాడీ అతడిని ప్రేమిస్తుంది. కానీ సంజయ్‌ మాత్రం ఆమె ప్రేమను అంగీకరించడు. ఇక్కడి నుంచి వీరిద్దరి మధ్య మొదలయ్యే సంఘర్షణ ఎటు దారి తీసింది? సంజయ్‌ పెళ్లికి ఎందుకు దూరంగా ఉంటాడు? మ్యాడీ చివరకు ఏం చేసింది? వీరిద్దరి మధ్య ఉన్న 20 ఏళ్ల వయసు వ్యత్యాసం వారి బంధానికి అడ్డుగా నిలిచిందా? అన్నదే మిగతా కథ.
ఎలా ఉందంటే?
‘విశ్వనాథ్‌ అండ్‌ సన్స్‌’ ప్రధానంగా కుటుంబ బంధాలు, తల్లి ప్రేమ, అనుబంధాలు, మనుషుల మధ్య ఏర్పడే భావోద్వేగాల చుట్టూ తిరిగే కథ. పాయింట్‌ పూర్తిగా కొత్తది కాకపోయినా.. వెంకీ అట్లూరి దాన్ని తెరకెక్కించిన విధానం ఆకట్టుకుంటుంది. ముఖ్యంగా కథలోని పాత్రలను ఒక్కసారిగా కాకుండా నెమ్మదిగా ప్రేక్షకులకు పరిచయం చేస్తూ.. వాటి మధ్య బంధం బలపడే కొద్దీ కథలో భావోద్వేగాన్ని పెంచారు.
సినిమా ప్రారంభంలో సంజయ్‌ నేపథ్యం, అతని వ్యక్తిత్వం, తల్లితో ఉన్న అనుబంధాన్ని చూపించడానికి కొంత సమయం తీసుకుంటుంది. సరోగసీ, బిడ్డ అనారోగ్యం వంటి అంశాలు కథలోకి వచ్చిన తర్వాత అసలు కథ మొదలవుతుంది. మ్యాడీ పాత్ర ఎంట్రీతో సినిమా ఒక్కసారిగా మరింత వినోదాత్మకంగా మారుతుంది. ఆమె అల్లరి, సంజయ్‌ గంభీరమైన స్వభావం మధ్య వచ్చే సన్నివేశాలు నవ్విస్తాయి.
అదే సమయంలో తల్లీకొడుకుల మధ్య సన్నివేశాలు భావోద్వేగానికి గురిచేస్తాయి. ముఖ్యంగా తల్లి పాత్రకు సంబంధించిన కీలక ఘట్టాల్లో సూర్య నటన బలంగా నిలుస్తుంది. మాటలకంటే భావోద్వేగాలను ముఖ కవళికల ద్వారా చూపించే ప్రయత్నం కొన్ని సన్నివేశాల్లో బాగా వర్కవుట్‌ అయింది.
ఇంటర్వెల్‌ సమయానికి కథలో వచ్చే మలుపు ద్వితీయార్థంపై ఆసక్తిని పెంచుతుంది. సెకండాఫ్‌లో కుటుంబ సంబంధాలు, మ్యాడీ-సంజయ్‌ మధ్య సమస్య, రవీనా టాండన్‌ పాత్రకు సంబంధించిన అంశాలతో కథ ముందుకు సాగుతుంది. అయితే ఇక్కడక్కడ కథనం వేగం తగ్గినట్లు అనిపిస్తుంది. ముఖ్యంగా పెళ్లి ఎపిసోడ్‌, కొన్ని కుటుంబ సన్నివేశాలు ఇంకాస్త క్రిస్పీగా ఉంటే సినిమా మరింత ప్రభావవంతంగా ఉండేది.
కథలోని ప్రధానమైన 20 ఏళ్ల వయసు వ్యత్యాసం అంశాన్ని దర్శకుడు ఆసక్తికరంగా ఎంచుకున్నప్పటికీ.. దాని చుట్టూ మరింత బలమైన సంఘర్షణను రాసుకుని ఉంటే బాగుండేది. క్లైమాక్స్‌ కూడా పెద్దగా ఆశ్చర్యపరిచేలా కాకుండా ముందే ఊహించగలిగే విధంగానే సాగుతుంది.
అయితే ఇవన్నీ పక్కన పెడితే.. క్లీన్‌ కామెడీ, కుటుంబ భావోద్వేగాలు, మంచి నటనతో సినిమా ఒక మంచి ఫీల్‌గుడ్‌ అనుభూతిని ఇస్తుంది. ముఖ్యంగా కుటుంబంతో కలిసి చూడగలిగే సినిమాగా నిలుస్తుంది.
సూర్య ఎలా చేశాడంటే?
సంజయ్‌ విశ్వనాథ్‌ పాత్రలో సూర్య పూర్తిగా ఒదిగిపోయాడు. మల్టీ మిలియనీర్‌ వ్యాపారవేత్తగా హుందాగా కనిపిస్తూనే.. భావోద్వేగ సన్నివేశాల్లో తన నటనతో ఆకట్టుకున్నాడు. ముఖ్యంగా తల్లికి సంబంధించిన సన్నివేశాల్లో సూర్య నటన సినిమాకు ప్రధాన బలంగా నిలుస్తుంది.
మాస్‌ ఇమేజ్‌ ఉన్న సూర్యకు భిన్నంగా.. ఎక్కువ హడావుడి, ఎలివేషన్లు లేకుండా క్లాస్‌, గంభీరమైన పాత్రలో కనిపించడం కొత్తగా అనిపిస్తుంది. కొన్ని సన్నివేశాల్లో ‘గజిని’లోని సంజయ్‌ రామస్వామి తరహా షేడ్స్‌ గుర్తుకు వచ్చినా.. ఈ పాత్ర తనదైన శైలిలో ఉంటుంది.
మమితా బైజు ఆకట్టుకుందా?
మ్యాడీ పాత్ర మమితా బైజుకు మంచి అవకాశం. అల్లరి, కొంటెతనం, అమాయకత్వం, ప్రేమ, భావోద్వేగం.. ఇలా పాత్రలోని వివిధ కోణాలను ఆమె చక్కగా పలికించింది. ముఖ్యంగా సూర్యతో కలిసి కనిపించే సన్నివేశాల్లో ఆమె కామెడీ టైమింగ్‌ బాగా వర్కవుట్‌ అయింది.
సూర్యతో ఉన్న 20 ఏళ్ల వయసు వ్యత్యాసాన్ని కథలో కీలక అంశంగా ఉపయోగించినప్పటికీ.. మమితా పాత్రను కేవలం హీరోయిన్‌గా పరిమితం చేయకుండా కథలో భాగం చేయడం ప్లస్‌ పాయింట్‌. సినిమా పూర్తయ్యే సరికి మ్యాడీ పాత్ర గుర్తుండిపోతుంది.
రాధికా శరత్‌కుమార్‌ తల్లిగా మరోసారి తన అనుభవాన్ని చూపించారు. సంజయ్‌ తల్లిగా ఆమె పాత్రకు మంచి భావోద్వేగ బలం ఉంది. తల్లీకొడుకుల మధ్య వచ్చే సన్నివేశాల్లో రాధిక, సూర్యల నటన ఆకట్టుకుంటుంది. రవీనా టాండన్‌కు కూడా కీలకమైన పాత్ర లభించింది. అయితే ఆమె పాత్రను దర్శకుడు మరింత సమర్థంగా ఉపయోగించుకోవచ్చనే భావన కలుగుతుంది. సునీల్‌ రెడ్డి కామెడీ అక్కడక్కడా నవ్విస్తుంది. మిగిలిన నటీనటులు తమ పరిధి మేరకు మెప్పించారు.
సాంకేతికంగా ఎలా ఉందంటే?
దర్శకుడు వెంకీ అట్లూరి ఈ సినిమాకు ప్రధాన బలం. పెద్దగా సంక్లిష్టమైన కథను ఎంచుకోకుండా.. మానవ సంబంధాలు, కుటుంబ భావోద్వేగాలపై దృష్టి పెట్టారు. కామెడీ, ఎమోషన్‌ను బ్యాలెన్స్‌ చేయడంలో ఎక్కువ భాగం సక్సెస్‌ అయ్యారు.
మాటలు కూడా సినిమాకు ప్లస్‌. పెద్ద పెద్ద డైలాగుల కంటే చిన్న చిన్న మాటలు, పాత్రల ఎక్స్‌ప్రెషన్స్‌ ద్వారా భావాలను చెప్పే ప్రయత్నం కనిపిస్తుంది. అయితే సెకండాఫ్‌ను ఇంకాస్త కుదించి ఉంటే సినిమా మరింత వేగంగా సాగేది.
జీవీ ప్రకాశ్‌కుమార్‌ సంగీతం సినిమాకు చక్కగా సరిపోయింది. పాటలతో పాటు నేపథ్య సంగీతం కూడా భావోద్వేగ సన్నివేశాలను ఎలివేట్‌ చేసింది.
నిమిష్‌ రవి సినిమాటోగ్రఫీ మరో ఆకర్షణ. సినిమా ప్రతి ఫ్రేమ్‌ రిచ్‌గా కనిపిస్తుంది. నిర్మాణ విలువలు కూడా ఉన్నతంగా ఉన్నాయి. పెద్ద బడ్జెట్‌ సినిమా అనే విషయం తెరపై కనిపిస్తుంది.
ఎడిటింగ్‌ విషయంలో మాత్రం ఇంకాస్త శ్రద్ధ అవసరమని అనిపిస్తుంది. ముఖ్యంగా ద్వితీయార్థంలోని కొన్ని సన్నివేశాలను కుదించి ఉంటే కథనం మరింత క్రిస్పీగా మారేది.
మొత్తంగా.. ‘విశ్వనాథ్‌ అండ్‌ సన్స్‌’లో కొత్త కథ కంటే.. తెలిసిన కుటుంబ భావోద్వేగాలను కొత్త పాత్రలు, పరిస్థితులతో చెప్పే ప్రయత్నం కనిపిస్తుంది. సూర్య నటన, మమితా బైజు కామెడీ, రాధికా శరత్‌కుమార్‌ ఎమోషనల్‌ పెర్ఫార్మెన్స్‌, వెంకీ అట్లూరి ట్రీట్‌మెంట్‌ సినిమాకు ప్రధాన బలాలు. సెకండాఫ్‌లో కాస్త నెమ్మదించడం, క్లైమాక్స్‌ ఊహించదగిన విధంగా ఉండటం బలహీనతలు.
ఓవరాల్‌గా.. ‘విశ్వనాథ్‌ అండ్‌ సన్స్‌’ క్లీన్‌ కామెడీ, కుటుంబ భావోద్వేగాలతో సాగే మంచి ఫీల్‌గుడ్‌ ఫ్యామిలీ ఎంటర్‌టైనర్‌.
