అమరావతి, సెప్టెంబర్ 03 (జనవాణి): ముంబై నటి కాదంబరి జత్వానీ కేసులో ఏపీ ప్రభుత్వం కీలక నిర్ణయం తీసుకుంది. ఈ కేసులో ఆరోపణలు ఎదుర్కొంటూ గతంలో సస్పెన్షన్‌కు గురైన సీనియర్ ఐపీఎస్ అధికారులు కాంతి రాణా టాటా, విశాల్ గున్నీల సస్పెన్షన్‌ను ఎత్తివేసింది. వారిని తక్షణమే తిరిగి సర్వీసులోకి తీసుకుంటూ గురువారం సాధారణ పరిపాలన శాఖ ఉత్తర్వులు జారీ చేసింది.
2004 బ్యాచ్‌కు చెందిన కాంతి రాణా టాటా, 2010 బ్యాచ్‌కు చెందిన విశాల్ గున్నీలు జత్వానీ కేసు నేపథ్యంలో సస్పెన్షన్‌కు గురయ్యారు. సుమారు రెండేళ్లుగా కొనసాగుతున్న సస్పెన్షన్ గడువు ముగియనున్న నేపథ్యంలో ప్రభుత్వం ఈ అంశాన్ని సమీక్షించింది. రాష్ట్ర డీజీపీ సమర్పించిన నివేదికలతో పాటు కాంతి రాణా టాటా ఆగస్టు 24న సమర్పించిన వినతిపత్రాన్ని కూడా ప్రభుత్వం పరిశీలించినట్లు ఉత్తర్వుల్లో పేర్కొంది. నిబంధనలకు అనుగుణంగా అన్ని అంశాలను పరిశీలించిన అనంతరం సస్పెన్షన్‌ను ఉపసంహరించుకోవాలని నిర్ణయించినట్లు ప్రభుత్వం తెలిపింది. ప్రభుత్వ ప్రధాన కార్యదర్శి జి. సాయి ప్రసాద్ పేరుతో ఈ ఉత్తర్వులు జారీ అయ్యాయి. ఉత్తర్వుల ప్రతులను ఇద్దరు అధికారులకు అందజేసి, వారి నుంచి రసీదులు తీసుకోవాలని డీజీపీని ఆదేశించింది.
జత్వానీ కేసులో ఆరోపణలు
ముంబైకి చెందిన నటి కాదంబరి జత్వానీపై అక్రమంగా కేసు నమోదు చేసి, అరెస్టు చేసి వేధించారనే ఆరోపణలు అప్పట్లో తీవ్ర రాజకీయ దుమారం రేపాయి. ఈ వ్యవహారంలో అప్పటి విజయవాడ పోలీస్ కమిషనర్‌గా పనిచేసిన కాంతి రాణా టాటా, అప్పటి డీసీపీ విశాల్ గున్నీలపై ఆరోపణలు వచ్చాయి. అనంతరం నమోదైన కేసు, దర్యాప్తు నేపథ్యంలో వారిపై సస్పెన్షన్ వేటు పడింది. దర్యాప్తు కొనసాగుతున్న సమయంలో ఇద్దరు అధికారులను తిరిగి విధుల్లోకి తీసుకుంటే సాక్షులను ప్రభావితం చేసే అవకాశం ఉందని అప్పటి రివ్యూ కమిటీ అభిప్రాయపడినట్లు సమాచారం. దీంతో వారి సస్పెన్షన్ కొనసాగుతూ వచ్చింది.
కేసులు మాత్రం కొనసాగుతాయి
అయితే సస్పెన్షన్ ఎత్తివేసినంత మాత్రాన కాంతి రాణా టాటా, విశాల్ గున్నీలపై ఉన్న ఆరోపణలు లేదా కేసులు ముగిసినట్లు కాదని ప్రభుత్వం స్పష్టం చేసింది. వారిపై కొనసాగుతున్న శాఖాపరమైన క్రమశిక్షణ చర్యలు, క్రిమినల్ కేసులపై సస్పెన్షన్ ఎత్తివేత ప్రభావం చూపదని ఉత్తర్వుల్లో పేర్కొంది. అంటే ఇద్దరు అధికారులు తిరిగి సర్వీసులో చేరినా.. కాదంబరి జత్వానీ కేసుకు సంబంధించిన దర్యాప్తు, న్యాయపరమైన ప్రక్రియలు యథావిధిగా కొనసాగనున్నాయి. సస్పెన్షన్ ఎత్తివేతను కేవలం పరిపాలనా, సర్వీస్ సంబంధిత నిర్ణయంగా ప్రభుత్వం స్పష్టం చేసింది.
త్వరలో పోస్టింగ్‌లు?
తాజా నిర్ణయంతో ఇద్దరు ఐపీఎస్ అధికారులు తిరిగి విధుల్లో చేరనున్నారు. అయితే వారికి ఎలాంటి పోస్టింగ్‌లు ఇవ్వనున్నారనే అంశంపై ఆసక్తి నెలకొంది. సస్పెన్షన్ ఎత్తివేత అనంతరం ప్రభుత్వం త్వరలోనే వారి పోస్టింగ్‌లపై ఉత్తర్వులు జారీ చేసే అవకాశం ఉంది. దీంతో దాదాపు రెండేళ్లుగా కొనసాగుతున్న సస్పెన్షన్ వ్యవహారానికి తాత్కాలికంగా తెరపడినప్పటికీ.. వారిపై కొనసాగుతున్న క్రిమినల్, శాఖాపరమైన చర్యలు మాత్రం కీలకంగానే ఉండనున్నాయి.
