D Mart: గ్రాసరీ, గృహోపకరణాల విక్రయాల్లో ప్రత్యేక గుర్తింపు సంపాదించిన డీమార్ట్... ఇప్పుడు ఫార్మసీ సేవలను కూడా ప్రారంభించింది. డీమార్ట్ మాతృసంస్థ అవెన్యూ సూపర్‌మార్కెట్స్ ప్రస్తుతం మహారాష్ట్రలోని ముంబై మెట్రోపాలిటన్ ప్రాంతంలోని కొన్ని ఎంపిక చేసిన స్టోర్లలో ఫార్మసీ కౌంటర్లను ప్రారంభించింది. ప్రత్యేకంగా కొత్త మెడికల్ షాపులు ప్రారంభించకుండా... ఇప్పటికే ఉన్న డీమార్ట్ స్టోర్లలోనే "షాప్-ఇన్-షాప్" విధానంలో ఈ సేవలను అందిస్తోంది. ఈ విధానం ద్వారా వినియోగదారులు నిత్యావసర సరుకులు, వ్యక్తిగత సంరక్షణ ఉత్పత్తులు, గృహోపకరణాలతో పాటు మందులను కూడా ఒకేచోట కొనుగోలు చేయవచ్చు.
20% వరకు డిస్కౌంట్
డీమార్ట్ ఫార్మసీల ప్రధాన ఆకర్షణ... మందులపై అందిస్తున్న భారీ తగ్గింపే. మార్కెట్‌లో లభించే అనేక మందులపై సుమారు 20 శాతం వరకు డిస్కౌంట్ ఇవ్వాలని సంస్థ ప్రణాళిక రూపొందించింది. ముఖ్యంగా మధుమేహం, రక్తపోటు, గుండె సంబంధిత వ్యాధులతో ప్రతి నెలా మందులు కొనుగోలు చేసే వారికి ఇది గణనీయమైన ఆర్థిక ఉపశమనాన్ని కలిగించే అవకాశం ఉంది.
ప్రస్తుతం దేశంలో అనేక మెడికల్ చైన్‌లు, ఆన్‌లైన్ ఫార్మసీలు సేవలు అందిస్తున్నాయి. ఇప్పుడు డీమార్ట్ కూడా ఈ రంగంలోకి రావడంతో రిటైల్ ఫార్మసీ మార్కెట్‌లో పోటీ మరింత పెరిగే అవకాశాలు కనిపిస్తున్నాయి. తక్కువ ధరలు, నమ్మకమైన సేవలు, ఒకే చోట షాపింగ్ చేసే సౌకర్యం డీమార్ట్‌కు అదనపు బలంగా మారే అవకాశం ఉందని మార్కెట్ నిపుణులు భావిస్తున్నారు.
దేశవ్యాప్త విస్తరణ?
ప్రస్తుతం దేశవ్యాప్తంగా డీమార్ట్‌కు వందలాది స్టోర్లు ఉన్నాయి. ముంబైలో ప్రారంభించిన ఈ పైలట్ ప్రాజెక్ట్ విజయవంతమైతే... దశలవారీగా ఇతర నగరాలు, రాష్ట్రాల్లో కూడా ఫార్మసీ కౌంటర్లను ప్రారంభించే అవకాశం ఉందని మార్కెట్ వర్గాలు అంచనా వేస్తున్నాయి. అయితే దేశవ్యాప్త విస్తరణపై సంస్థ ఇప్పటివరకు అధికారిక ప్రకటన చేయలేదు.
మొత్తానికి... గ్రాసరీ తర్వాత ఫార్మసీ రంగంలోకి అడుగుపెట్టిన డీమార్ట్... తక్కువ ధరల వ్యూహంతో మార్కెట్‌లో కొత్త పోటీకి తెరతీసే అవకాశాలు కనిపిస్తున్నాయి. మందులపై 20 శాతం వరకు డిస్కౌంట్ వినియోగదారులకు ఎంతవరకు ప్రయోజనం చేకూరుస్తుందో చూడాలి.
ఈ నిర్ణయంపై మీ అభిప్రాయం ఏంటి? కామెంట్‌లో తెలియజేయండి. ఇలాంటి తాజా బిజినెస్ అప్‌డేట్స్ కోసం మా వెబ్ సైట్ ను ఫాలో అవ్వండి.
