భారత్‌లో పాలిమర్ కరెన్సీ నోట్ల వినియోగంపై ఆర్‌బీఐ చేపట్టనున్న పైలట్ ప్రాజెక్టుకు కేంద్ర ప్రభుత్వం గ్రీన్ సిగ్నల్ ఇచ్చింది. ఫీల్డ్ ట్రయల్స్‌లో భాగంగా రూ.10, రూ.20 విలువైన ఒక్కో డినామినేషన్‌లో 100 కోట్ల (ఒక బిలియన్) నోట్లను విడుదల చేయాలని ఆర్‌బీఐ ప్రతిపాదించగా, కేంద్ర ఆర్థిక మంత్రిత్వ శాఖ దీనికి ఆమోదం తెలిపింది.
ఈ విషయాన్ని కేంద్ర ఆర్థిక శాఖ సహాయ మంత్రి పంకజ్ చౌదరి లోక్‌సభలో లిఖితపూర్వక సమాధానం ద్వారా వెల్లడించారు. భారత వాతావరణ పరిస్థితులు, వినియోగ పరిస్థితుల్లో పాలిమర్ నోట్లు ఎలా పనిచేస్తాయో తెలుసుకునేందుకు ఈ ప్రయోగాత్మక విడుదల చేపడుతున్నట్లు ప్రభుత్వం పేర్కొంది.
ట్రయల్ విజయవంతమైతేనే విస్తరణ
పాలిమర్ నోట్ల ప్రయోగం విజయవంతమైతేనే దేశవ్యాప్తంగా వాటి వినియోగాన్ని విస్తరించే అంశంపై నిర్ణయం తీసుకుంటామని ప్రభుత్వం స్పష్టం చేసింది. ప్రస్తుతం ఇది కేవలం పైలట్ దశలో మాత్రమే ఉందని తెలిపింది.
ఎక్కువ కాలం మన్నే నోట్లు
సాంప్రదాయ కాగితపు నోట్లతో పోలిస్తే పాలిమర్ నోట్లు ఎక్కువ కాలం మన్నుతాయని ఆర్‌బీఐ అభిప్రాయపడింది. తరచుగా చేతులు మారే చిన్న విలువల నోట్లు త్వరగా చిరిగిపోవడం, పాడవడం వంటి సమస్యలను పాలిమర్ నోట్లు తగ్గించగలవని పేర్కొంది. ఇప్పటికే పలు దేశాలు ఈ తరహా కరెన్సీని విజయవంతంగా వినియోగిస్తున్నాయని వివరించింది.
కాగితపు నోట్లు కొనసాగుతాయి
పాలిమర్ నోట్లు వస్తున్నాయనే కారణంగా ప్రస్తుతం చలామణిలో ఉన్న కాగితపు నోట్లను ఉపసంహరించబోమని కేంద్ర ప్రభుత్వం స్పష్టం చేసింది. పాలిమర్, కాగితపు నోట్లు రెండూ ఒకేసారి చలామణిలో కొనసాగుతాయని తెలిపింది. కాగితపు కరెన్సీ స్థానంలో పూర్తిగా పాలిమర్ నోట్లను తీసుకురావాలనే ప్రతిపాదన ప్రస్తుతం ప్రభుత్వ పరిశీలనలో లేదని వెల్లడించింది.
డిజిటల్ చెల్లింపులపై ఇప్పుడే అంచనా లేదు
పాలిమర్ నోట్లు ప్రవేశపెట్టడం వల్ల డిజిటల్ చెల్లింపులపై ఎలాంటి ప్రభావం ఉంటుందో ఇప్పుడే చెప్పడం సాధ్యం కాదని ఆర్‌బీఐ పేర్కొంది. నోట్లు సాధారణ చలామణిలోకి వచ్చిన తర్వాత మాత్రమే దీనిపై సమగ్రంగా అంచనా వేయగలమని తెలిపింది. కరెన్సీ, డిజిటల్ చెల్లింపులు పరస్పరం ప్రత్యామ్నాయాలు కాకుండా ఒకదానికొకటి అనుబంధంగా కొనసాగుతాయని ఆర్‌బీఐ అభిప్రాయపడింది.
