ఢిల్లీ,సెప్టెంబర్ 18 (జనవాణి): దేశ రాజధాని ఢిల్లీలో దారుణ ఘటన వెలుగులోకి వచ్చింది. 17 ఏళ్ల బాలికపై ముగ్గురు మైనర్లు సహా నలుగురు సామూహిక అత్యాచారానికి పాల్పడి, అనంతరం హత్య చేసినట్లు పోలీసులు తెలిపారు. బాలిక మృతదేహాన్ని బహిరంగ ప్రదేశంలో పడేయడంతో.. కుక్కలు పీక్కుతిన్న స్థితిలో అది లభ్యమైంది.
టెంపోలోనే అఘాయిత్యం
పోలీసుల వివరాల ప్రకారం బాధిత బాలికకు నిందితుల్లో ఒకరితో పరిచయం ఉంది. ఘటన జరిగిన సమయంలో ఆమె నిందితులతో కలిసి ఓ టెంపోలో ప్రయాణిస్తోంది. అంతకుముందు నిందితులంతా టెంపోలో మద్యం సేవించినట్లు పోలీసులు వెల్లడించారు. అనంతరం అదే వాహనంలో బాలికపై సామూహిక అత్యాచారానికి పాల్పడినట్లు తెలిపారు. ఆ తర్వాత బాలికను కత్తితో పొడిచి హత్య చేసి మృతదేహాన్ని రోడ్డుపై పడేసి నిందితులు అక్కడి నుంచి పరారైనట్లు పోలీసులు పేర్కొన్నారు.
కుళ్లిపోయిన స్థితిలో మృతదేహం
ఈ నెల 13న వాయవ్య ఢిల్లీలోని కుషక్ రోడ్, స్వరూప్ నగర్ ప్రాంతంలో బాలిక మృతదేహాన్ని పోలీసులు గుర్తించారు. అప్పటికే మృతదేహం తీవ్రంగా కుళ్లిపోయి ఉండటంతో కనీసం లింగ నిర్ధారణ కూడా చేయలేని పరిస్థితి నెలకొన్నట్లు తెలిపారు. మృతదేహాన్ని కుక్కలు పీక్కుతిన్నట్లు గుర్తించామని ఒక చేయి వేరుగా పడి ఉన్నట్లు పోలీసులు వెల్లడించారు. బాలిక అదృశ్యమైన విషయంపై కుటుంబ సభ్యులు పోలీసులకు ఫిర్యాదు చేయలేదని అధికారులు తెలిపారు. ఆమె తరచూ ఇంటి నుంచి బయటకు వెళ్లి కొద్ది రోజుల తర్వాత తిరిగి వచ్చేదని కుటుంబ సభ్యులు చెప్పినట్లు పోలీసులు పేర్కొన్నారు.
50కి పైగా సీసీటీవీ కెమెరాల పరిశీలన
నిందితులను గుర్తించేందుకు పోలీసులు విస్తృతంగా దర్యాప్తు చేపట్టారు. ఇందులో భాగంగా 50కి పైగా సీసీటీవీ కెమెరాల ఫుటేజీలను పరిశీలించారు. ఈ నెల 15, 16 తేదీల మధ్య అర్ధరాత్రి వేళల్లో ముమ్మరంగా గాలించి తొలుత టెంపో డ్రైవర్‌ను అదుపులోకి తీసుకున్నారు. అతడిని విచారించిన అనంతరం ఈ ఘటనతో సంబంధం ఉన్న ముగ్గురు మైనర్లు సహా నలుగురు నిందితులను పోలీసులు అరెస్ట్ చేశారు. నిందితులపై భారతీయ న్యాయ సంహిత (BNS), పోక్సో చట్టంలోని పలు సెక్షన్ల కింద కేసులు నమోదు చేసినట్లు పోలీసులు తెలిపారు.
