హైదరాబాద్‌, ఆగస్టు 25 (జనవాణి): హైదరాబాద్‌ నగరంలో రాత్రివేళ ప్రయాణించే వారికి టీజీఎస్‌ఆర్టీసీ (TGSRTC) గుడ్‌న్యూస్‌ చెప్పింది. ఈ నెల 29 నుంచి నగరంలోని ఆరు ప్రధాన రూట్లలో రాత్రంతా సిటీ బస్సులను నడపాలని నిర్ణయించింది. రాత్రి 10 గంటల నుంచి ఉదయం 5 గంటల వరకు నైట్‌ సర్వీసులు అందుబాటులో ఉంటాయి. రాత్రివేళల్లో ప్రయాణికుల రద్దీ, డిమాండ్‌ను అధ్యయనం చేసిన అనంతరం తొలిదశలో ఆరు మార్గాలను ఆర్టీసీ ఎంపిక చేసింది. ముఖ్యంగా ఐటీ ఉద్యోగులు, నైట్‌ షిఫ్ట్‌ల్లో పనిచేసేవారు, హోటళ్లు, హాస్పిటాలిటీ, వాణిజ్య సంస్థల సిబ్బందితో పాటు అర్ధరాత్రి తర్వాత ఇళ్లకు చేరుకునే ప్రయాణికులకు ఈ సర్వీసులు ప్రయోజనకరంగా ఉండనున్నాయి.
అరగంట నుంచి గంటకో బస్సు
ప్రయాణికుల స్పందనను బట్టి ప్రతి 30 నిమిషాల నుంచి గంట వ్యవధిలో బస్సులను నడపనున్నారు. ఒక్కో మార్గంలో సుమారు ఎనిమిది బస్సులను అందుబాటులో ఉంచనున్నారు. రద్దీకి అనుగుణంగా సర్వీసుల ఫ్రీక్వెన్సీని సర్దుబాటు చేయనున్నారు.
ఆరు ప్రధాన రూట్లలో నైట్‌ సర్వీసులు
తొలిదశలో సికింద్రాబాద్‌–హైటెక్‌ సిటీ, సికింద్రాబాద్‌–హయత్‌నగర్‌, కోఠి–హైటెక్‌ సిటీ, కోఠి–పటాన్‌చెరు, సికింద్రాబాద్‌–పటాన్‌చెరు–బాచుపల్లి మార్గాలతో పాటు సంబంధిత రూట్లలో నైట్‌ సర్వీసులు అందుబాటులోకి రానున్నాయి.
10 H రూట్‌లో కీలక సర్వీసులు
సికింద్రాబాద్‌ నుంచి కొండాపూర్‌ మీదుగా హైటెక్‌ సిటీకి వెళ్లే 10 H రూట్‌లో రాత్రి 30 నిమిషాల నుంచి గంట వ్యవధిలో బస్సులు నడపనున్నారు. ఈ మార్గంలో సుమారు 8 నుంచి 10 సర్వీసులు అందుబాటులో ఉండనున్నాయి. ఐటీ కార్యాలయాలు, వ్యాపార సంస్థలు అధికంగా ఉన్నందున ఈ రూట్‌కు ప్రత్యేక ప్రాధాన్యం లభించింది.
రైలు ప్రయాణికులకు మరింత సౌకర్యం
సికింద్రాబాద్‌–హయత్‌నగర్‌ మార్గంలోని 290U సర్వీసును రాత్రి ప్రయాణికులకు అనుగుణంగా మార్పులు చేశారు. సికింద్రాబాద్‌లోని సంగీత్‌ క్రాస్‌రోడ్స్‌కు బదులుగా రాత్రివేళ ఆల్ఫా హోటల్‌ నుంచి బస్సు బయలుదేరనుంది. సికింద్రాబాద్‌ రైల్వే స్టేషన్‌కు ఎదురుగా ఈ ప్రాంతం ఉండటంతో అర్ధరాత్రి రైళ్లలో వచ్చే ప్రయాణికులకు ఇది ఉపయోగపడనుంది. ఎల్‌బీనగర్‌, వనస్థలిపురం, ఎన్‌జీవోస్‌ కాలనీ తదితర ప్రాంతాలకు వెళ్లే వారికి సౌకర్యం కలగనుంది.
కోఠి–పటాన్‌చెరు, హైటెక్‌ సిటీ రూట్లలోనూ..
218 రూట్‌లో కోఠి–పటాన్‌చెరు మధ్య రాత్రివేళ సుమారు గంటకో సర్వీసు నడపనున్నారు. 222A రూట్‌లో కోఠి–హైటెక్‌ సిటీ మీదుగా పటాన్‌చెరు వరకు నైట్‌ బస్సులు అందుబాటులోకి రానున్నాయి. ప్రయాణికుల డిమాండ్‌ను బట్టి 30 నిమిషాల నుంచి గంట వ్యవధిలో సర్వీసులు నడుస్తాయి. అలాగే 219 రూట్‌లో సికింద్రాబాద్‌–పటాన్‌చెరు, 195W రూట్‌లో బాచుపల్లి, పరిసర ప్రాంతాలను కలుపుతూ రాత్రి సర్వీసులు నడపనున్నారు. ఈ బస్సులు ఐటీ ఉద్యోగులతో పాటు హోటళ్లు, హౌస్‌కీపింగ్‌, ఇతర వాణిజ్య సంస్థల్లో నైట్‌ షిఫ్ట్‌ చేసే సిబ్బందికి ఉపయోగపడనున్నాయి.
స్పందన బట్టి మరిన్ని రూట్లకు విస్తరణ
తొలిదశలో ప్రారంభించే ఆరు మార్గాల్లో ప్రయాణికుల రద్దీ, స్పందనను టీజీఎస్‌ఆర్టీసీ నిరంతరం పర్యవేక్షించనుంది. ప్రజల నుంచి మంచి స్పందన వస్తే హైదరాబాద్‌లోని మరిన్ని ప్రాంతాలకు నైట్‌ బస్సులను విస్తరించే అవకాశం ఉంది. పర్యాటక ప్రాంతాలు, చారిత్రక కట్టడాలు, రాత్రివేళ సందర్శకుల రద్దీ అధికంగా ఉండే ప్రాంతాలను కలిపే మార్గాలను కూడా భవిష్యత్తులో పరిగణనలోకి తీసుకునే అవకాశం ఉంది.
