టెక్ డెస్క్, ఆగస్టు 12 (జనవాణి): స్మార్ట్‌ఫోన్ మార్కెట్‌లో రూ.25 వేల నుంచి రూ.26 వేల బడ్జెట్‌లో కొత్త ఫోన్లకు డిమాండ్ పెరుగుతోంది. ఈ విభాగంలో కస్టమర్లను ఆకట్టుకునేలా రియల్‌మీ తన 16 సిరీస్‌లో మరో కొత్త ఫోన్‌ను తీసుకొచ్చింది. అదే Realme 16x 5G. ఆకర్షణీయమైన డిజైన్, భారీ బ్యాటరీ, మంచి కెమెరా వంటి ఫీచర్లతో వచ్చిన ఈ ఫోన్.. కొన్ని కీలక విషయాల్లో మాత్రం రాజీ పడింది. ముఖ్యంగా డిస్‌ప్లే, ప్రాసెసర్ విషయంలో ప్రత్యర్థి ఫోన్లతో పోలిస్తే వెనుకబడింది.
డిజైన్ ఎలా ఉంది?
Realme 16x 5G డిజైన్ ఈ సిరీస్‌లోని ఇతర ఫోన్ల కంటే ప్రత్యేకంగా కనిపిస్తుంది. ఫ్లాట్ రియర్ ప్యానెల్‌పై Blooming Texture పేరుతో కలర్ మార్చుకునే 3D తరహా ఎఫెక్ట్‌ను అందించారు. ఫోన్‌ను వివిధ కోణాల్లో చూసినప్పుడు వెనుక భాగంలో పువ్వులా కనిపించే విజువల్ ఎఫెక్ట్ ఆకట్టుకుంటుంది.
మెటల్ ఫినిషింగ్‌తో కూడిన కెమెరా మాడ్యూల్, సిల్వర్ మిడ్-ఫ్రేమ్ ఫోన్‌కు ప్రీమియం లుక్ ఇస్తాయి. IP65 రేటింగ్‌తో దుమ్ము, నీటి నుంచి రక్షణ కూడా లభిస్తుంది. అయితే 6.8 అంగుళాల పెద్ద డిస్‌ప్లే కారణంగా ఫోన్ పరిమాణం ఎక్కువగా ఉంది. 217 గ్రాముల బరువుతో ఎక్కువసేపు ఒక చేత్తో ఉపయోగించడం కొంత ఇబ్బందిగా అనిపించొచ్చు. ఈ మొబైల్ Endurance Brown, Glory White రెండు కలర్ ఆప్షన్లలోనే అందుబాటులో ఉంది.
డిస్‌ప్లేలో రాజీ
Realme 16x 5Gలో 6.8 అంగుళాల HD+ LCD డిస్‌ప్లే ఇచ్చారు. 720×1570 పిక్సెల్స్ రిజల్యూషన్‌తో పాటు 144Hz వరకు రిఫ్రెష్ రేట్ ఉంటుంది. 1,200 నిట్స్ పీక్ బ్రైట్‌నెస్ ఉండటంతో ఎండలోనూ స్క్రీన్‌ను చూడటంలో పెద్దగా ఇబ్బంది ఉండదు. అయితే ఇక్కడే ప్రధాన లోపం కనిపిస్తుంది. ఈ ధరలో Full HD+ డిస్‌ప్లే ఆశించే వారికి HD+ రిజల్యూషన్ నిరాశ కలిగిస్తుంది. సాధారణ వీడియోలు, సోషల్ మీడియా వినియోగంలో పెద్ద సమస్య కనిపించకపోయినా.. హై-క్వాలిటీ వీడియోలు, ఫొటోలు, టెక్స్ట్‌లో తేడా స్పష్టంగా కనిపిస్తుంది.
సాఫ్ట్‌వేర్: స్మూత్.. కానీ బ్లోట్‌వేర్ ఎక్కువ
ఈ ఫోన్ Android 16 ఆధారిత Realme UI 7.0తో వస్తుంది. సాధారణ వినియోగంలో UI స్మూత్‌గా పనిచేస్తుంది. యాప్‌ల మధ్య మారేటప్పుడు పెద్దగా ల్యాగ్ కనిపించదు. అయితే అవసరం లేని కొన్ని యాప్‌లు ముందుగానే ఇన్‌స్టాల్ చేసి ఉండటం మైనస్ పాయింట్. Block Blast!, Bubble Pop!, Meesho, Paytm, Mahjong Blast, Candy Crush వంటి యాప్‌లు ఇందులో కనిపిస్తాయి. కావాలంటే వీటిని తొలగించుకోవచ్చు.
పనితీరు ఎలా ఉంది?
Realme 16x 5Gలో MediaTek Dimensity 6300 చిప్‌సెట్‌ను ఉపయోగించారు. దీనికి 6GB RAM, 256GB స్టోరేజ్ అందించారు. రోజువారీ పనులు, సోషల్ మీడియా, బ్రౌజింగ్, వీడియోలు వంటి సాధారణ వినియోగానికి పనితీరు సరిపోతుంది.
అయితే హెవీ వీడియో ఎడిటింగ్, అధిక గ్రాఫిక్స్ గేమింగ్ వంటి పనుల్లో దీని పరిమితులు స్పష్టంగా కనిపిస్తాయి. BGMI వంటి గేమ్‌లను డిఫాల్ట్ సెట్టింగ్స్‌లో స్మూత్‌గా ఆడుకోవచ్చు. కానీ Asphalt Legends వంటి గ్రాఫిక్స్ ఎక్కువగా ఉండే గేమ్‌లలో ఫ్రేమ్ డ్రాప్స్ కనిపిస్తాయి.
ఇక ఈ స్మార్ట్‌ఫోన్‌లో 5,300 చదరపు మిల్లీమీటర్ల Vapour Chamber Cooling ఉండటం. ఎక్కువసేపు గేమింగ్ చేసినా ఫోన్ ఎక్కువగా వేడెక్కకుండా ఇది సహాయపడుతుంది.
కెమెరా: అంచనాలకు మించి
వెనుక భాగంలో 50MP ప్రైమరీ కెమెరా (f/1.8), ముందు భాగంలో 8MP సెల్ఫీ కెమెరా ఉన్నాయి. ఈ ధరలో వచ్చే ఫోన్లతో పోలిస్తే కెమెరా పనితీరు మెరుగ్గానే ఉందని చెప్పాలి. పగటి సమయంలో తీసిన ఫొటోల్లో డీటెయిల్స్ బాగుంటాయి. కలర్ అక్యురసీ కూడా మెరుగ్గా ఉంటుంది. ఓవర్ ఎక్స్‌పోజర్ సమస్య ఎక్కువగా కనిపించదు. పోర్ట్రెయిట్ మోడ్ కూడా ఆకట్టుకుంటుంది. సబ్జెక్ట్‌ను బ్యాక్‌గ్రౌండ్ నుంచి బాగా వేరు చేస్తుంది.
అయితే ఆకుపచ్చ రంగు వస్తువులను ఫొటో తీసేటప్పుడు కొంత నాయిస్ కనిపిస్తుంది. టెలిఫొటో కెమెరా లేకపోవడంతో 2.5x దాటిన డిజిటల్ జూమ్‌లో నాణ్యత తగ్గుతుంది. సెల్ఫీ కెమెరా స్కిన్ టోన్స్‌ను బాగానే చూపించినా, ఎక్కువగా స్మూత్ చేయడం వల్ల కొంత ఆర్టిఫిషియల్ లుక్ రావచ్చు.
బ్యాటరీనే అసలైన బలం
Realme 16x 5Gలో 7,000mAh భారీ బ్యాటరీ ఉంది. ఇదే ఈ ఫోన్‌లో అతిపెద్ద ఆకర్షణ. దీంతో రెండు రోజుల వరకు బ్యాటరీ బ్యాకప్ పొందవచ్చు. PCMark Work 3.1 Battery Life పరీక్షలో బ్యాటరీ 28 గంటల 57 నిమిషాలు పనిచేసింది. 45W ఫాస్ట్ ఛార్జింగ్‌కు ఫోన్ సపోర్ట్ చేస్తుంది. బాక్స్‌లో ఛార్జర్ కూడా అందిస్తున్నారు.
0 నుంచి 37 శాతం వరకు 30 నిమిషాల్లో ఛార్జ్ అవుతుంది. పూర్తిగా ఛార్జ్ చేయడానికి సుమారు 1 గంట 38 నిమిషాల సమయం పడుతుంది.
ధర.. ఎవరు కొనాలి?
Realme 16x 5G ధర రూ.25,999** నుంచి ప్రారంభమవుతుంది. ఈ ధరకు ఫోన్‌లో 7,000mAh బ్యాటరీ, మంచి కెమెరా, ఆకర్షణీయమైన డిజైన్, 144Hz రిఫ్రెష్ రేట్ వంటి ఫీచర్లు ఉన్నాయి. అయితే HD+ డిస్‌ప్లే, పాత తరానికి చెందిన Dimensity 6300 చిప్‌సెట్ ఈ ఫోన్‌కు ప్రధాన మైనస్ పాయింట్లు. గేమింగ్ లేదా హై-క్వాలిటీ డిస్‌ప్లేకు ప్రాధాన్యం ఇచ్చేవారికి ఇది బెస్ట్ ఆప్షన్ కాకపోవచ్చు.
మొత్తంగా చూస్తే.. బ్యాటరీ బ్యాకప్, కెమెరా, డిజైన్‌కు ప్రాధాన్యం ఇచ్చే వారికి Realme 16x 5G మంచి ఎంపిక. ముఖ్యంగా భారీ బ్యాటరీ కావాలనుకునే వారికి ఈ ఫోన్ ఆకట్టుకుంటుంది. అయితే ఇదే బడ్జెట్‌లో మెరుగైన డిస్‌ప్లే, కొత్త చిప్‌సెట్ కోరుకునే వారు ఇతర ఆప్షన్లను కూడా పరిశీలించడం మంచిది.
స్పెసిఫికేషన్లు
డిస్‌ప్లే: 6.8 అంగుళాల HD+ LCD, 144Hz
ప్రాసెసర్: MediaTek Dimensity 6300
RAM: 6GB
స్టోరేజ్: 256GB
రియర్ కెమెరా: 50MP
సెల్ఫీ కెమెరా: 8MP
బ్యాటరీ: 7,000mAh
ఫాస్ట్ ఛార్జింగ్: 45W
OS: Android 16, Realme UI 7.0
వాటర్/డస్ట్ రెసిస్టెన్స్: IP65
బరువు: 217 గ్రాములు
ధర: రూ.25,999 నుంచి
