న్యూఢిల్లీ: భారత క్రికెట్‌లో సంచలనంగా మారిన 15 ఏళ్ల యువ బ్యాటర్ వైభవ్ సూర్యవంశీ మరో అరుదైన ఘనత సాధించాడు. 2026-27 దులీప్ ట్రోఫీ కోసం ప్రకటించిన ఈస్ట్ జోన్ జట్టుకు వైస్ కెప్టెన్‌గా ఎంపికయ్యాడు. భారత వికెట్ కీపర్ బ్యాటర్ ఇషాన్ కిషన్ కెప్టెన్‌గా వ్యవహరించనున్న ఈ జట్టులో సీనియర్ పేసర్ మహ్మద్ షమీ కూడా చోటు దక్కించుకోవడం విశేషం.
ఇప్పటికే తన బ్యాటింగ్ దూకుడుతో ప్రపంచ క్రికెట్ దృష్టిని ఆకర్షించిన వైభవ్ సూర్యవంశీకి కేవలం 15 ఏళ్ల వయసులోనే నాయకత్వ బాధ్యతలు అప్పగించడం భారత దేశవాళీ క్రికెట్‌లో అతనిపై ఉన్న విశ్వాసానికి నిదర్శనంగా నిలిచింది.
వరుస విజయాలతో వెలుగులోకి
ఈ నెలలో ఇంగ్లాండ్‌తో జరిగిన రెండో టీ20 మ్యాచ్ ద్వారా భారత జట్టుకు అరంగేట్రం చేసిన వైభవ్ సూర్యవంశీ, అనంతరం జింబాబ్వేతో హరారే వేదికగా జరిగిన మూడో టీ20లో కేవలం 49 బంతుల్లో 81 పరుగులు చేసి అందరి ప్రశంసలు అందుకున్నాడు. ఆ మ్యాచ్‌లో 'ప్లేయర్ ఆఫ్ ది మ్యాచ్' అవార్డు దక్కించుకోవడమే కాకుండా, సిరీస్‌లో అద్భుత ప్రదర్శనకు 'ప్లేయర్ ఆఫ్ ది సిరీస్' అవార్డును కూడా సొంతం చేసుకున్నాడు. ఆ సమయంలో స్పందించిన వైభవ్.. తొలి మ్యాన్ ఆఫ్ ది మ్యాచ్, మ్యాన్ ఆఫ్ ది సిరీస్ అవార్డులు అందుకోవడం జీవితంలో మరపురాని క్షణమని తెలిపాడు. హరారే మైదానంలో ఆడటం తనకు ఎప్పుడూ ప్రత్యేకమని, కెప్టెన్, కోచ్‌లు, సహచర ఆటగాళ్ల మద్దతు ఎంతో ఉపయోగపడిందని పేర్కొన్నాడు.
అండర్-19 వరల్డ్ కప్ హీరో.. ఐపీఎల్‌లోనూ మెరుపులు
ఈ ఏడాది జింబాబ్వేలో జరిగిన అండర్-19 ప్రపంచకప్‌లో భారత్‌ను విజేతగా నిలపడంలో వైభవ్ కీలక పాత్ర పోషించాడు. ఇంగ్లాండ్‌తో జరిగిన ఫైనల్లో ఏకంగా 175 పరుగులు చేసి మ్యాచ్ విన్నింగ్ ఇన్నింగ్స్ ఆడాడు. అప్పటి నుంచి అతని కెరీర్ వేగంగా దూసుకెళ్తోంది. ఐపీఎల్-2026లోనూ వైభవ్ తన ప్రతిభను చాటుకున్నాడు. ఎలిమినేటర్‌లో సన్‌రైజర్స్ హైదరాబాద్‌పై 97 పరుగులు, క్వాలిఫయర్-2లో రాజస్థాన్ రాయల్స్‌పై 96 పరుగులు చేసి జట్టును విజయాలకు చేరువ చేశాడు. అలాగే ఇటీవల జరిగిన త్రై సిరీస్ ఫైనల్లో ఇండియా-ఏ తరఫున శ్రీలంకపై 94 పరుగులతో మరోసారి తన క్లాస్‌ను నిరూపించాడు.
షమీకి నిరూపించుకునే అవకాశం
ఈస్ట్ జోన్ జట్టులో సీనియర్ పేసర్ మహ్మద్ షమీ కూడా చోటు దక్కించుకున్నాడు. గత మార్చిలో జరిగిన ఛాంపియన్స్ ట్రోఫీ తర్వాత భారత జట్టుకు దూరంగా ఉన్న షమీకి, ఇటీవల శ్రీలంకతో టెస్టు సిరీస్‌కు కూడా అవకాశం రాలేదు. దీంతో దులీప్ ట్రోఫీలో రాణించి మళ్లీ జాతీయ జట్టులో చోటు దక్కించుకోవాలనే లక్ష్యంతో బరిలోకి దిగనున్నాడు. షమీతో పాటు బెంగాల్‌కు చెందిన ముకేశ్ కుమార్, సూరజ్ సింధు జైస్వాల్‌లు పేస్ దళాన్ని బలోపేతం చేయనున్నారు.
బలంగా ఈస్ట్ జోన్ బ్యాటింగ్
బ్యాటింగ్ విభాగంలో బెంగాల్ ఓపెనర్ అభిమన్యు ఈశ్వరన్ కీలక బాధ్యతలు చేపట్టనున్నాడు. దేశవాళీ క్రికెట్‌లో నిలకడగా రాణిస్తున్న అతను వైభవ్ సూర్యవంశీతో కలిసి జట్టుకు బలమైన ఆరంభం అందించే అవకాశముంది. కుమార్ కుషాగ్రా, అనుకుల్ రాయ్, విరాట్ సింగ్, శిఖర్ మోహన్, సుభ్రాంశు సేనాపతి, దెనిష్ దాస్ వంటి ఆటగాళ్లు కూడా జట్టులో చోటు దక్కించుకున్నారు.
15 ఏళ్లకే దులీప్ ట్రోఫీ జట్టుకు వైస్ కెప్టెన్‌గా ఎంపిక కావడం వైభవ్ సూర్యవంశీ ప్రతిభకు నిదర్శనంగా నిలుస్తోంది. సీనియర్ ఆటగాళ్లతో డ్రెస్సింగ్ రూమ్ పంచుకుంటూ నాయకత్వ లక్షణాలను మరింత మెరుగుపర్చుకునే అవకాశం అతనికి దక్కనుంది. భారత క్రికెట్ భవిష్యత్తుపై ఆశలు రేకెత్తిస్తున్న ఈ యువ సంచలనం దులీప్ ట్రోఫీలో ఎలా రాణిస్తాడన్నది ఇప్పుడు ఆసక్తికరంగా మారింది.
ఈస్ట్ జోన్ జట్టు
కెప్టెన్: ఇషాన్ కిషన్
వైస్ కెప్టెన్: వైభవ్ సూర్యవంశీ
ఇతరులు: అభిమన్యు ఈశ్వరన్, సుదీప్ కుమార్ ఘరామి, షాబాజ్ అహ్మద్, మహ్మద్ షమీ, ముకేశ్ కుమార్, సూరజ్ సింధు జైస్వాల్, కుమార్ కుషాగ్రా, శిఖర్ మోహన్, అనుకుల్ రాయ్, విరాట్ సింగ్, సుభ్రాంశు సేనాపతి, దెనిష్ దాస్, అభిజిత్ సర్కార్.
