తెలంగాణలో డిజిటల్ గవర్నెన్స్‌ను మరింత విస్తరించడంతో పాటు ప్రజలకు అందుతున్న ఆన్‌లైన్ సేవలను కొత్త స్థాయికి తీసుకెళ్లేందుకు ప్రభుత్వం కసరత్తు చేస్తోంది. ఇందులో భాగంగా మీ సేవ కేంద్రాలను మరింత పటిష్టం చేయడం, AI, సైబర్ భద్రత, డేటా సెంటర్లు, డిజిటల్ పబ్లిక్ ఇన్‌ఫ్రాస్ట్రక్చర్‌పై ప్రత్యేకంగా దృష్టి సారించింది. ఇదే సమయంలో డిజిటల్ రంగంలో సుమారు రూ.2,000 కోట్ల పెట్టుబడులకు అవకాశం ఉండటంతో సమగ్ర ప్రాజెక్టు నివేదికలు (DPRలు) సిద్ధం చేయాలని ప్రపంచ బ్యాంక్ ప్రతినిధులు సూచించడం ప్రాధాన్యం సంతరించుకుంది.
ప్రపంచ బ్యాంక్ ప్రతినిధులతో సీఎస్ భేటీ
సోమవారం డాక్టర్ బి.ఆర్. అంబేడ్కర్ తెలంగాణ రాష్ట్ర సచివాలయంలో ప్రపంచ బ్యాంక్ గ్రూప్ డిజిటల్–ఆసియా పసిఫిక్ ప్రాంతీయ డైరెక్టర్ మహేష్ ఉత్తమ్‌చందానీ నేతృత్వంలోని ప్రతినిధి బృందంతో రాష్ట్ర ప్రభుత్వ ప్రధాన కార్యదర్శి సంజయ్ జాజు సమావేశమయ్యారు.
తెలంగాణలో అమలవుతున్న డిజిటల్ గవర్నెన్స్ కార్యక్రమాలతో పాటు భవిష్యత్తులో చేపట్టాల్సిన ప్రాజెక్టులపై ఈ సందర్భంగా విస్తృతంగా చర్చించారు.
‘మీ సేవ’ మరింత స్మార్ట్‌గా..
ప్రజలకు ప్రభుత్వ సేవలను చేరువ చేసిన మీ సేవ కేంద్రాలను మరింత ఆధునీకరించడంపై ప్రభుత్వం దృష్టి సారించింది. మారుతున్న సాంకేతిక పరిజ్ఞానానికి అనుగుణంగా ఈ కేంద్రాలను పటిష్టం చేసి ప్రజలకు అత్యుత్తమ డిజిటల్ సేవలు అందించేలా సమగ్ర కార్యాచరణ ప్రణాళిక రూపొందించాలని సీఎస్ సంజయ్ జాజు అధికారులను ఆదేశించారు.
డిజిటల్ ఇండియా–వికసిత్ భారత్ 2047 లక్ష్యాలకు అనుగుణంగా ప్రజా సేవల్లో సాంకేతికత వినియోగాన్ని మరింత పెంచే అవకాశాలపైనా సమావేశంలో చర్చించారు.
Future Cityలో డేటా సెంటర్లు
భారత్ ఫ్యూచర్ సిటీలో కొత్త డేటా సెంటర్ల ఏర్పాటుకు అవసరమైన మౌలిక సదుపాయాల కల్పన కూడా సమావేశంలో కీలకంగా చర్చకు వచ్చింది.
డేటా సెంటర్లతో పాటు కృత్రిమ మేధస్సు (AI), సైబర్ భద్రత, డిజిటల్ పబ్లిక్ ఇన్‌ఫ్రాస్ట్రక్చర్ (DPI), డేటా గవర్నెన్స్ వంటి రంగాల్లో తెలంగాణ సామర్థ్యాన్ని మరింత పెంచడంపై ఇరుపక్షాలు అభిప్రాయాలు పంచుకున్నాయి.
యువతకు ఐటీ ఉద్యోగాలపైనా ఫోకస్
డిజిటల్ రంగంలో పెట్టుబడులను ఆకర్షించడంతో పాటు యువతకు ఐటీ ఆధారిత ఉపాధి అవకాశాలను పెంచే అంశంపైనా చర్చ జరిగింది. కొత్త సాంకేతిక రంగాలకు అవసరమైన నైపుణ్యాలను యువతకు అందించడం ద్వారా ఉపాధి అవకాశాలను విస్తరించే అంశాన్ని పరిశీలించారు.
తెలంగాణ ప్రభుత్వం డిజిటల్ గవర్నెన్స్ రంగంలో చేపడుతున్న సంస్కరణలను ప్రపంచ బ్యాంక్ ప్రతినిధులు అభినందించారు. ఆధునిక సాంకేతికత వినియోగం, ప్రజా సేవల నాణ్యత, డేటా గవర్నెన్స్ తదితర అంశాల్లో సాంకేతిక సహకారం, జ్ఞాన భాగస్వామ్యం, అంతర్జాతీయ ఉత్తమ విధానాలను అందించే అవకాశాలపై చర్చించారు.
రూ.2 వేల కోట్ల పెట్టుబడులకు అవకాశం
దేశంలో డిజిటల్ రంగ పెట్టుబడులకు తెలంగాణ, హర్యానా రాష్ట్రాలు అనుకూలంగా ఉన్నాయని ప్రపంచ బ్యాంక్ ప్రతినిధులు పేర్కొన్నారు.
ఈ నేపథ్యంలో సుమారు రూ.2,000 కోట్ల పెట్టుబడులకు సంబంధించిన అవకాశాలను ముందుకు తీసుకెళ్లేందుకు సమగ్ర ప్రాజెక్టు నివేదికలు (DPRలు) సిద్ధం చేసి సమర్పించాలని రాష్ట్ర అధికారులకు సూచించారు. ఈ ప్రతిపాదనలు కార్యరూపం దాల్చితే తెలంగాణ డిజిటల్ మౌలిక సదుపాయాల విస్తరణకు మరింత ఊతం లభించే అవకాశం ఉంది.
T-Fiberపై సీఎస్ స్పెషల్ రివ్యూ
ప్రపంచ బ్యాంక్ ప్రతినిధులతో సమావేశం అనంతరం టి-ఫైబర్ ప్రాజెక్టు పురోగతిపై సీఎస్ సంజయ్ జాజు ప్రత్యేకంగా సమీక్షించారు.
గ్రామీణ, పట్టణ ప్రాంతాల్లో బ్రాడ్‌బ్యాండ్ కనెక్టివిటీ విస్తరణ, అవసరమైన మౌలిక సదుపాయాలు, ప్రజలకు సేవలను అందుబాటులోకి తీసుకురావడం వంటి అంశాలపై అధికారులతో చర్చించారు.
గడువులోగా పూర్తి చేయాల్సిందే
టి-ఫైబర్ పనులను నిర్ణీత గడువులోగా పూర్తి చేయాలని సీఎస్ స్పష్టం చేశారు. ప్రాజెక్టు అమలులో ఎదురయ్యే సమస్యలను వివిధ శాఖల సమన్వయంతో ఎప్పటికప్పుడు పరిష్కరించాలని సూచించారు.
పనుల పురోగతిని నిరంతరం పర్యవేక్షిస్తూ గ్రామీణ ప్రాంతాల వరకు నాణ్యమైన డిజిటల్ సేవలు అందుబాటులోకి వచ్చేలా చర్యలు చేపట్టాలని అధికారులను ఆదేశించారు.
ఈ సమావేశంలో ఐటీ శాఖ జాయింట్ సెక్రటరీ అనుదీప్ దూరిశెట్టి, ప్రపంచ బ్యాంక్ డిజిటల్–ఆసియా పసిఫిక్ ప్రాంతీయ డైరెక్టర్ మహేష్ ఉత్తమ్‌చందానీ, టి-ఫైబర్ ఎండీతో పాటు సంబంధిత శాఖల అధికారులు పాల్గొన్నారు.
