రత్నగిరికి ఆధ్యాత్మిక శోభ..
ఈ నెల 14న ఆవిర్భావోత్సవం
ఏర్పాట్లు సిద్ధం చేసిన ఆలయ అధికారులు
Annavaram | అన్నవరం అంటేనే సత్యనారాయణ స్వామి.. రత్నగిరి అంటేనే భక్తుల కొంగుబంగారం. ప్రకృతి రమణీయతల మధ్య కొలువైన ఈ పుణ్యక్షేత్రంలో ఏటా శ్రావణ శుద్ధ విదియను పురస్కరించుకుని జరిగే సత్యదేవుని ఆవిర్భావోత్సవానికి ప్రత్యేకత ఉన్నది. స్వామివారు వెలసిన పవిత్ర ఘట్టాన్ని స్మరించుకుంటూ నిర్వహించే ఈ వేడుకల్లో రత్నగిరి భక్తిసంద్రంగా మారుతుంది. వేదఘోషలు.. మంగళవాయిద్యాలు.. ప్రత్యేక అభిషేకాలు, పూజలు.. సత్యదేవుని నామస్మరణతో కొండంతా ఆధ్యాత్మిక శోభను సంతరించుకుంటుంది. ఆగస్టు 14న ఆవిర్భావోత్సవం సందర్భంగా సత్యదేవుని దర్శించుకునేందుకు భక్తులు పెద్ద సంఖ్యలో రత్నగిరికి తరలిరానున్నారు. ఒకవైపు ప్రత్యేక వైదిక కార్యక్రమాలు.. మరోవైపు వ్రత మండపాల్లో సత్యనారాయణ వ్రతాలు.. ఇంకోవైపు స్వామివారి దర్శనం కోసం బారులు తీరే భక్తులు.. ఇలా రత్నగిరిపై పండుగ వాతావరణం నెలకొననుంది. అన్నవరం ప్రత్యేకత కేవలం ఉత్సవ వైభవానికే పరిమితం కాదు. అంకుడు చెట్టు పొదలో ఆవిర్భవించాడని విశ్వసించే సత్యదేవుడు.. నేడు లక్షలాది మంది భక్తుల ఆరాధ్యదైవంగా నిలిచాడు. ఒకే సన్నిధిలో హరి–హర తత్త్వాన్ని చాటే ఆలయ నిర్మాణం.. తరతరాలుగా కొనసాగుతున్న సత్యనారాయణ వ్రత సంప్రదాయం.. స్వామివారి ప్రసాదానికి ఉన్న విశిష్టత.. ఇవన్నీ అన్నవరం క్షేత్రానికి ప్రత్యేక గుర్తింపును తెచ్చాయి.
అంకుడు చెట్టు నుంచి రత్నగిరి వరకు..
అన్నవరం క్షేత్ర చరిత్రలో సత్యదేవుడి ఆవిర్భావ ఘట్టానికి ప్రత్యేక స్థానం ఉంది. శ్రీమహావిష్ణువు స్వప్నంలో దర్శనమిచ్చి రత్నగిరిపై వెలుస్తానని సూచించారని క్షేత్ర చరిత్ర చెబుతోంది. ఆ తర్వాత అన్వేషణలో అంకుడు చెట్టు పొద వద్ద స్వామివారి పాదాలపై సూర్యకిరణాలు ప్రసరిస్తున్న దృశ్యం కనిపించిందని విశ్వాసం. అక్కడి నుంచి అర్చామూర్తిని రత్నగిరికి తీసుకువచ్చి శాస్త్రోక్తంగా ప్రతిష్ఠించారు. 1891లో జరిగిన ఈ ఘట్టంతో రత్నగిరి సత్యదేవుని క్షేత్రంగా వెలుగొందడం ప్రారంభమైంది. కాలం మారింది. కొండపైకి వెళ్లే మార్గాలు మారాయి. భక్తులకు సౌకర్యాలు పెరిగాయి. ఆలయం చుట్టూ ఎన్నో మార్పులు వచ్చాయి. కానీ సత్యదేవుడిపై భక్తుల నమ్మకం మాత్రం అదే విధంగా కొనసాగుతోంది.
హరి.. హర తత్త్వం
అన్నవరం ఆలయ నిర్మాణానికీ ప్రత్యేకత ఉంది. రథాకారంలో కనిపించే ప్రధాన ఆలయం ప్రకృతి మధ్య ప్రత్యేక ఆకర్షణగా నిలుస్తుంది. ఆలయ నిర్మాణంలోనే హరి–హర తత్త్వాన్ని దర్శించే అవకాశం భక్తులకు లభిస్తుంది. స్వామివారి సన్నిధిలోని వివిధ భాగాలను విష్ణు, శివ స్వరూపాలుగా పూజించడం ఇక్కడి విశేషాల్లో ఒకటి. సత్యనారాయణ స్వామివారి సమీపంలోనే పరమేశ్వరుడు పూజలందుకోవడం హరిహరుల మధ్య భేదం లేదన్న భావనను చాటుతుంది. అన్నవరం పేరు వినగానే చాలామందికి ముందుగా గుర్తుకొచ్చేది సత్యనారాయణ స్వామి వ్రతమే. కొత్తగా పెళ్లయిన దంపతులతో వ్రతం చేయించడం.. కొత్త ఇంట్లో అడుగుపెట్టే ముందు స్వామిని పూజించడం.. శుభకార్యాల సందర్భంగా సత్యనారాయణ వ్రతం నిర్వహించడం తెలుగు కుటుంబాల్లో తరతరాలుగా వస్తున్న ఆచారం. అన్నవరంలో నిత్యం సామూహికంగా వ్రతాలు జరుగుతుంటాయి. దంపతులు, కుటుంబ సభ్యులు కలిసి వ్రతాన్ని ఆచరిస్తారు. పౌర్ణమి, ఏకాదశి వంటి తిథులతోపాటు కార్తిక, మాఘ మాసాల్లోనూ భక్తులు ప్రత్యేకంగా వ్రతాలు చేసుకుంటారు. వ్రతంలోని కథలు కూడా సత్యం, ఇచ్చిన మాటను నిలబెట్టుకోవడం, దైవాన్ని విశ్వసించడం, ప్రసాదాన్ని గౌరవించడం వంటి జీవన విలువలను గుర్తుచేస్తాయి.
తరతరాలుగా..
అన్నవరంతో భక్తులకు ప్రత్యేక అనుబంధం ఉన్నది. తల్లిదండ్రులతో చిన్నప్పుడు రత్నగిరికి వచ్చినవారు.. కాలం గడిచిన తర్వాత తమ పిల్లలను తీసుకొస్తున్నారు. ఆ పిల్లలే పెద్దయ్యాక తమ పిల్లల చేతులు పట్టుకుని కొండెక్కుతున్నారు. అలా ఒక తరం నుంచి మరో తరానికి సత్యదేవుడిపై విశ్వాసం చేరుతోంది. ఎవరికైనా ఉద్యోగం కావచ్చు.. మరొకరికి వివాహం కావచ్చు.. ఇంకొకరికి కుటుంబ శ్రేయస్సు కావచ్చు. కోరికలతో వచ్చిన భక్తులు స్వామిని దర్శించుకుని మనసు నిండా నమ్మకంతో తిరిగి వెళ్తారు. ఆగస్టు 14న జరిగే ఆవిర్భావోత్సవం సందర్భంగా ఆలయంలో ప్రత్యేక పూజలు, అభిషేకాలు, వైదిక కార్యక్రమాలు నిర్వహించనున్నారు. వేదమంత్రాలు, మంగళవాయిద్యాలు, స్వామివారి నామస్మరణతో కొండంతా భక్తిమయం కానుంది. దర్శనం కోసం వచ్చే భక్తులతో ఆలయ పరిసరాలు సందడిగా మారనున్నాయి. ఆ రోజు రత్నగిరిపై కనిపించేది కేవలం ఉత్సవ సందడి కాదు. ఓ విశ్వాసం.. ఓ కుటుంబ సంప్రదాయం.. ఓ ఆధ్యాత్మిక వారసత్వం. అంకుడు చెట్టు పొదలో ఆవిర్భవించాడని విశ్వసించే సత్యదేవుడు.. నేడు లక్షలాది మంది భక్తుల హృదయాల్లో కొలువై ఉన్నాడు. కొండపై వెలసిన ఆ రూపం ఒక్కటే.. తరతరాలుగా మారని భక్తి మాత్రం ఎన్నో రూపాల్లో కొనసాగుతూనే ఉంది.
