రిలీజ్ అయ్యి పది రోజులు దాటినా 'చెన్నై లవ్ స్టోరీ' బాక్సాఫీస్ వద్ద తన జోరు కొనసాగిస్తోంది. వీక్‌డేస్‌లో వసూళ్లు కాస్త తగ్గినా, వీకెండ్ వచ్చేసరికి మళ్లీ మంచి కలెక్షన్లు నమోదు చేస్తూ థియేటర్లలో నిలకడగా రన్ అవుతోంది. విడుదలకు ముందు టీజర్, ట్రైలర్.. ముఖ్యంగా 'గుర్తుందా గుర్తుందా' పాట సినిమాపై భారీ అంచనాలు పెంచగా, రిలీజ్ తర్వాత కూడా ప్రేక్షకుల నుంచి డీసెంట్ రెస్పాన్స్ లభించింది. మిక్సుడ్ రివ్యూలు వచ్చినా ఒక్కసారి హాయిగా చూసేయొచ్చు అనే పాజిటివ్ వర్డ్ ఆఫ్ మౌత్ సినిమాకు బాగా కలిసొచ్చింది. ముఖ్యంగా ఇంటర్వెల్ ట్విస్ట్ ప్రేక్షకులను ఆకట్టుకోవడంతో థియేటర్లలో మంచి స్పందన కనిపించింది.
కిరణ్ అబ్బవరం కెరీర్‌లోనే ఈ సినిమా అతిపెద్ద విజయంగా నిలిచే దిశగా దూసుకుపోతోంది. రిలీజైన పది రోజుల్లోనే ఈ సినిమా రూ.25 కోట్లకు పైగా షేర్ వసూళ్లు సాధించినట్లు ట్రేడ్ వర్గాలు చెబుతున్నాయి. కిరణ్ అబ్బవరం మార్కెట్‌ను మరో స్థాయికి తీసుకెళ్లిన సినిమాగా ఇది నిలిచిందనే అభిప్రాయం వ్యక్తమవుతోంది. ప్రపంచవ్యాప్తంగా ఈ సినిమాకు దాదాపు రూ.15 కోట్ల ప్రీ-రిలీజ్ బిజినెస్ జరగగా.. బ్రేక్ ఈవెన్ కోసం రూ.16 కోట్ల షేర్ అవసరమైంది. అయితే ఇప్పటికే ఆ లక్ష్యాన్ని దాటేసి దాదాపు రూ.9 కోట్ల లాభాలు అందించడంతో ఈ సినిమా బ్లాక్‌బస్టర్ హిట్‌గా నిలిచింది. మరోవైపు థియేట్రికల్ రిలీజ్‌కు ముందే నాన్-థియేట్రికల్ హక్కుల ద్వారా దాదాపు రూ.15 కోట్ల ఆదాయం రావడం నిర్మాతలకు మరింత లాభాన్ని తీసుకొచ్చింది.
కథ విషయానికి వస్తే... స్టీవెన్ శంకర్ (కిరణ్ అబ్బవరం) చిన్నప్పటి నుంచే తన పేరును వెండితెరపై చూసుకోవాలని కలలు కనే అనాథ యువకుడు. ఆ కలను నిజం చేసుకోవాలనే ఆశతో భాష కూడా సరిగా తెలియని చెన్నైకి వెళ్తాడు. అక్కడ నివేదిత (గౌరీ ప్రియా) పరిచయం అవుతుంది. ప్రేమ విఫలమై, అజయ్ (త్రిగుణ్)తో పెళ్లి ఆగిపోవడంతో తీవ్ర నిరాశలో ఉన్న నివేదిత మద్యం అలవాటు చేసుకుని గత జ్ఞాపకాలలోనే జీవిస్తూ ఉంటుంది. పరిస్థితుల వల్ల స్టీవెన్ ఆమె స్నేహితులతో కలిసి అదే ఇంట్లో ఉండాల్సి వస్తుంది. క్రమంగా ఆమె జీవితంలో వెలుగు నింపాలని ప్రయత్నిస్తూ, ఆమెను డిప్రెషన్ నుంచి బయటకు తీసుకురావడానికి తన వంతు ప్రయత్నం చేస్తాడు.
ఆ ప్రయాణంలో ఇద్దరి మధ్య స్నేహం ప్రేమగా మారుతుంది. స్టీవెన్ నిజాయితీ, అతని ఆప్యాయత నివేదిత మనసును మార్చేస్తాయి. ఒక దశలో అతడినే పెళ్లి చేసుకోవాలని ఆమె నిర్ణయించుకుంటుంది. అయితే ఆ తర్వాత వారి జీవితంలో ఎలాంటి మలుపులు చోటుచేసుకున్నాయి? స్టీవెన్ ప్రేమ గెలిచిందా? నివేదిత అతడినే జీవిత భాగస్వామిగా ఎంచుకుందా? ముఖ్యంగా హీరో కావాలనే స్టీవెన్ కల నెరవేరిందా? అనే ప్రశ్నలకు సమాధానం తెలుసుకోవాలంటే 'చెన్నై లవ్ స్టోరీ'ని థియేటర్‌లో చూడాల్సిందే. భావోద్వేగాలు, ప్రేమ, ఆశయాలు కలగలిసిన ఈ సినిమా ప్రేక్షకులకు మంచి అనుభూతిని అందించే రొమాంటిక్ డ్రామాగా నిలుస్తోంది.
