తెలంగాణ వచ్చే వరకు పెళ్లి చేసుకోనని శపథం.. పెద్ది సుదర్శన్ రెడ్డి జీవితంలో ఆ అరుదైన కథ!

Peddi Sudarshan Reddy: బీఆర్ఎస్ సీనియర్ నేత, నర్సంపేట మాజీ ఎమ్మెల్యే పెద్ది సుదర్శన్ రెడ్డి తీవ్ర గుండెపోటుతో కన్నుమూశారు. ఈ నెల 26న హనుమకొండలోని తన నివాసంలో ఉన్న సమయంలో ఆయనకు ఒక్కసారిగా గుండెపోటు వచ్చింది. కుటుంబ సభ్యులు వెంటనే ఆస్పత్రికి తరలించగా వైద్యులు గంటపాటు తీవ్రంగా శ్రమించి గుండె స్పందనను పునరుద్ధరించారు. అయితే కొంతసేపు మెదడుకు రక్తప్రసరణ ఆగిపోవడంతో ఆయన బ్రెయిన్ డెడ్ పరిస్థితికి చేరుకున్నారు. అనంతరం మెరుగైన చికిత్స కోసం సికింద్రాబాద్ యశోద ఆస్పత్రికి తరలించినప్పటికీ... ఐదు రోజుల పాటు మృత్యువుతో పోరాడిన ఆయన చివరకు తుదిశ్వాస విడిచారు.

విద్యార్థి దశ నుంచి శాసనసభ సభ్యుడిగా..

1974 ఆగస్టు 6న వరంగల్ జిల్లా నల్లబెల్లిలో రాజిరెడ్డి, అమృతమ్మ దంపతులకు జన్మించిన పెద్ది సుదర్శన్ రెడ్డి.. 1991లో మహబూబియా పంజాథన్ కళాశాల నుంచి ఇంటర్ పూర్తి చేశారు. రైతు కుటుంబంలో జన్మించిన సుదర్శన్ రెడ్డి... విద్యార్థి దశ నుంచే రాజకీయాలపై ఆసక్తి పెంచుకున్నారు. మొదట యూత్ కాంగ్రెస్‌లో పనిచేసిన ఆయన... 2001లో తెలంగాణ రాష్ట్ర సమితి ఆవిర్భావం తర్వాత కేసీఆర్ వెంట నడిచారు. నల్లబెల్లి జెడ్పీటీసీగా విజయం సాధించి... ఉమ్మడి వరంగల్ జిల్లా అధ్యక్షుడిగా... పార్టీ పొలిట్‌బ్యూరో సభ్యుడిగా తెలంగాణ ఉద్యమంలో కీలక పాత్ర పోషించారు.

ఇక ఆ తర్వాత 2014 ఎన్నికల్లో ఓటమి ఎదురైనప్పటికీ... 2018లో నర్సంపేట నియోజకవర్గం నుంచి ఎమ్మెల్యేగా ఘన విజయం సాధించారు. ఎమ్మెల్యేగా మాత్రమే కాకుండా తెలంగాణ పౌర సరఫరాల కార్పొరేషన్ ఛైర్మన్‌గా, పబ్లిక్ అకౌంట్స్ కమిటీ సభ్యుడిగా కూడా సేవలందించారు. అయితే ఆయన జీవితంలో అందరూ గుర్తుంచుకునే విషయం ఒక్కటే.

తెలంగాణ వచ్చాకే నాపెళ్లి... ఉద్యమం కోసం చేసిన శపథం.

ప్రత్యేక తెలంగాణ రాష్ట్రం ఏర్పడే వరకు తాను పెళ్లి చేసుకోనని... బ్రహ్మచర్యం పాటిస్తానని ఆయన ప్రతిజ్ఞ చేశారు. సుమారు ఏడు సంవత్సరాల పాటు తన మాటను నిలబెట్టుకున్నారు. 2014లో తెలంగాణ రాష్ట్రం ఏర్పడిన తర్వాత మాత్రమే తన శపథాన్ని విరమించారు. అనంతరం కుటుంబ సభ్యులు చూసిన స్వప్నను తిరుమల శ్రీవేంకటేశ్వరస్వామి సన్నిధిలో వివాహం చేసుకున్నారు. వారికి నిదర్శన్ రెడ్డి, ధర్మిష్ఠ రెడ్డి అనే ఇద్దరు పిల్లలు ఉన్నారు.

నియోజకవర్గ ప్రజలతో ఎప్పుడూ మమేకమై ఉద్యమ నాయకుడిగా, ప్రజా ప్రతినిధిగా సేవలందించిన పెద్ది సుదర్శన్ రెడ్డి మరణం తెలంగాణ రాజకీయాలకు తీరని లోటని పలువురు నాయకులు పేర్కొన్నారు. బీఆర్ఎస్ అధినేత కేసీఆర్‌తో పాటు పలువురు రాజకీయ ప్రముఖులు ఆయన మృతికి తీవ్ర సంతాపం తెలిపారు. కుటుంబ సభ్యుల సమాచారం ప్రకారం... ఆయన అంత్యక్రియలు స్వగ్రామమైన నల్లబెల్లిలో నిర్వహించనున్నారు.

తెలంగాణ ఉద్యమం కోసం వ్యక్తిగత జీవితాన్నే పక్కన పెట్టి శపథం చేసిన అరుదైన నాయకుడిగా పెద్ది సుదర్శన్ రెడ్డి ఎప్పటికీ గుర్తుండిపోతారు. ఆయన ఆత్మకు శాంతి చేకూరాలని మనస్ఫూర్తిగా నివాళులర్పిద్దాం.