భారతీయ సినీ పరిశ్రమలో అత్యంత ప్రతిష్టాత్మకంగా తెరకెక్కుతున్న సినిమాల్లో 'రామాయణం' ఒకటి. దర్శకుడు నితీష్ తివారీ రూపొందిస్తున్న ఈ పాన్ ఇండియా మైథలాజికల్ మూవీని రెండు భాగాలుగా ప్రేక్షకుల ముందుకు తీసుకురానున్నారు. ఇందులో శ్రీరాముడిగా రణ్‌బీర్ కపూర్, సీతగా సాయి పల్లవి, రావణుడిగా యశ్ నటిస్తుండగా, ఇతర కీలక పాత్రల్లో పలువురు స్టార్ నటీనటులు కనిపించనున్నారు. ఇప్పటికే విడుదలైన ట్రైలర్ సినిమాపై భారీ అంచనాలు పెంచేశాయి. తొలి భాగం ఈ ఏడాది దీపావళి సందర్భంగా విడుదల కానుండగా, రెండో భాగం వచ్చే ఏడాది ప్రేక్షకుల ముందుకు రానుంది.
ఈ సినిమాకు సంబంధించిన మరో ఆసక్తికర విషయం ఇప్పుడు సోషల్ మీడియాలో వైరల్ అవుతోంది. ప్రస్తుతం సీత పాత్రలో సాయి పల్లవి నటిస్తుండగా, ఆమె లుక్, పాత్రకు సరిపోయే తీరు అభిమానులను ఆకట్టుకుంటోంది. అయితే ఈ పాత్ర కోసం మొదట పలువురు హీరోయిన్లను పరిశీలించినట్లు సమాచారం. అందులో కన్నడ నటి శ్రీనిధి శెట్టి పేరు కూడా ప్రముఖంగా వినిపించింది.
ఈ విషయంపై గతంలో శ్రీనిధి శెట్టి స్వయంగా స్పందించారు. సీత పాత్ర కోసం తాను ఆడిషన్‌కు వెళ్లిన మాట నిజమేనని, కానీ ఆ తర్వాత ఎంపిక ప్రక్రియ ఎలా జరిగిందో తనకు తెలియదని చెప్పారు. అంత పెద్ద ప్రాజెక్ట్‌ను తాను తిరస్కరించే స్థాయిలో లేనని, అవకాశం వస్తే తప్పకుండా చేసేదాన్నని కూడా ఆమె స్పష్టం చేశారు. చివరికి ఆ పాత్రకు సాయి పల్లవిని ఎంపిక చేసినట్లు వెల్లడైంది.
ఇక శ్రీనిధి శెట్టి విషయానికి వస్తే.. మోడలింగ్‌తో కెరీర్ ప్రారంభించిన ఆమె, యశ్ హీరోగా తెరకెక్కిన కేజీఎఫ్ సిరీస్‌తో దేశవ్యాప్తంగా గుర్తింపు తెచ్చుకుంది. ఆ సినిమాతో ఓవర్‌నైట్ స్టార్‌గా మారిన శ్రీనిధి, ఇటీవల నాని సరసన హిట్ 3లో నటించి మెప్పించింది. ప్రస్తుతం వెంకటేష్ నటిస్తున్న ఆదర్శ కుటుంబం చిత్రంలో కీలక పాత్ర పోషిస్తోంది. వీటితో పాటు మరికొన్ని ఆసక్తికర ప్రాజెక్టుల్లోనూ ఆమె నటించనున్నట్లు సినీ వర్గాల్లో ప్రచారం జరుగుతోంది.
