ఢిల్లీ, సెప్టెంబర్ 9 (జనవాణి): రైల్వే ప్రయాణికులకు, సరుకు రవాణాకు మరింత మెరుగైన సేవలు అందించేలా కేంద్ర ప్రభుత్వం రైల్వే మల్టీ ట్రాకింగ్ ప్రాజెక్టులకు ఆమోదం తెలిపింది. కేంద్ర రైల్వే శాఖ మంత్రి అశ్విని వైష్ణవ్ బుధవారం ఈ వివరాలను వెల్లడించారు.
ఘట్‌కేసర్–కాజీపేట నాలుగో లైన్
తెలంగాణలో కీలకమైన ఘట్‌కేసర్–కాజీపేట రైల్వే సెక్షన్‌లో నాలుగో లైన్ నిర్మాణానికి కేంద్ర కేబినెట్ ఆమోదం తెలిపింది. మొత్తం 110 కిలోమీటర్ల మేర చేపట్టనున్న ఈ ప్రాజెక్టుకు సుమారు రూ.2,419 కోట్లు ఖర్చవుతుందని అంచనా వేశారు.
ఏపీలోనూ రైల్వే లైన్ల విస్తరణ
ఆంధ్రప్రదేశ్ మీదుగా సాగే అరక్కోణం–రేణిగుంట రైల్వే మార్గంలో 3వ, 4వ లైన్ల నిర్మాణానికి కూడా కేంద్రం గ్రీన్ సిగ్నల్ ఇచ్చింది. అదనపు లైన్లతో రద్దీ మార్గాల్లో రైళ్ల రాకపోకలకు మరింత వెసులుబాటు కలగనుంది.
నాలుగు రాష్ట్రాల్లో ఐదు ప్రాజెక్టులు
తెలంగాణ, ఆంధ్రప్రదేశ్, తమిళనాడు, కర్ణాటక రాష్ట్రాల్లోని 17 జిల్లాల పరిధిలో మొత్తం ఐదు మల్టీ ట్రాకింగ్ ప్రాజెక్టులను చేపట్టాలని కేంద్రం నిర్ణయించింది. వీటి కోసం మొత్తం రూ.10,021 కోట్ల పెట్టుబడి అవసరమవుతుందని కేంద్రం వెల్లడించింది.
రైళ్ల వేగం.. సరుకు రవాణాకు ఊతం
కొత్త రైల్వే లైన్ల నిర్మాణంతో నెట్‌వర్క్ సామర్థ్యం గణనీయంగా పెరగనుంది. రద్దీ మార్గాల్లో రైళ్ల రాకపోకలు సులభతరం కావడంతో ప్రయాణికుల రైళ్ల వేగం పెరగడంతో పాటు సరుకు రవాణా సామర్థ్యం కూడా మెరుగుపడుతుందని అధికారులు అంచనా వేస్తున్నారు.
ఈ మల్టీ ట్రాకింగ్ ప్రాజెక్టులను 2029–30 నాటికి పూర్తి చేయాలని కేంద్ర ప్రభుత్వం లక్ష్యంగా పెట్టుకుంది. తెలుగు రాష్ట్రాల్లోని కీలక రైల్వే మార్గాల విస్తరణ పూర్తయితే భవిష్యత్‌లో పెరిగే రైళ్ల రద్దీకి అనుగుణంగా మౌలిక వసతులు అందుబాటులోకి రానున్నాయి.
