నేపాల్, సెప్టెంబర్ 02 (జనవాణి): భారీ వరదలతో అతలాకుతలమైన నేపాల్‌కు భారత్‌ మరోసారి ఆపద్బాంధవుడిగా నిలిచిందని ఆ దేశ ఆరోగ్య శాఖ మంత్రి నిషా మెహతా అన్నారు. కష్టసుఖాల్లో, సుఖదుఃఖాల్లో భారత్‌ ఎప్పుడూ తమకు అండగా ఉంటుందని ఆమె కొనియాడారు.
‘రోటీ-బేటీ’ బంధం
భారత్‌, నేపాల్ మధ్య ఉన్న సంబంధం కేవలం రెండు దేశాల మధ్య దౌత్య సంబంధం కాదని.. అది ‘రోటీ-బేటీ’ బంధమని నిషా మెహతా పేర్కొన్నారు. ఇరు దేశాల మధ్య కుటుంబ అనుబంధం, సోదరభావం ఉందన్నారు. మంచి సమయాల్లోనే కాకుండా కష్టకాలంలోనూ భారత్‌ తమకు అండగా నిలుస్తోందని ఆమె అన్నారు.
Loading Tweet...
డీఎన్‌ఏ పరీక్షల్లో భారత్‌ సహకారం
వరదల్లో మృతి చెందిన వారి మృతదేహాలను గుర్తించడం నేపాల్ ప్రభుత్వానికి పెద్ద సవాలుగా మారింది. ఈ పరిస్థితుల్లో భారత్‌ నిపుణుల బృందాన్ని పంపడంతో పాటు డీఎన్‌ఏ పరీక్షల కోసం ల్యాబ్‌ ఏర్పాటు చేయడంలోనూ సహకరిస్తోందని నిషా మెహతా తెలిపారు. మృతదేహాలను త్వరితగతిన గుర్తించి కుటుంబ సభ్యులకు అప్పగించేందుకు భారత నిపుణుల సహాయం ఎంతో కీలకంగా ఉందన్నారు.
పునరావాస కేంద్రాల్లో వైద్య సేవలు
వరదల నుంచి రక్షించిన ప్రజలను తాత్కాలిక పునరావాస కేంద్రాలకు తరలించి అవసరమైన వైద్య సేవలు అందిస్తున్నట్లు మంత్రి వెల్లడించారు. భారత్‌తో పాటు ప్రపంచ ఆరోగ్య సంస్థ (WHO), యూనిసెఫ్‌ (UNICEF) వంటి అంతర్జాతీయ సంస్థలు కూడా క్షేత్రస్థాయిలో సహాయక, రెస్క్యూ చర్యల్లో పాల్గొంటున్నాయని తెలిపారు.
Loading Tweet...
1,127కు చేరిన మృతుల సంఖ్య
నేపాల్‌లో సంభవించిన ఘోర వరదల కారణంగా మృతుల సంఖ్య 1,127కు చేరినట్లు నేపాల్ పోలీసులు వెల్లడించారు. రసువాలో 45, నువాకోట్‌లో 155, ధాడింగ్‌లో 59, చిట్వాన్‌లో 348, గోర్ఖాలో 66, తనహున్‌లో 38, నావల్పరాసి ఈస్ట్‌లో 217, నావల్పరాసి వెస్ట్‌లో 190 మృతదేహాలు లభించాయి. భారత్‌ పరిధిలోకి మరో 9 మృతదేహాలు కొట్టుకొచ్చినట్లు అధికారులు తెలిపారు.
95 మృతదేహాలకు మాత్రమే గుర్తింపు
ఇప్పటివరకు మొత్తం లభించిన మృతదేహాల్లో 95 మందిని మాత్రమే గుర్తించి వారి కుటుంబ సభ్యులకు అప్పగించినట్లు సమాచారం. మిగిలిన మృతదేహాలను గుర్తించేందుకు భారత నిపుణుల బృందం అందిస్తున్న డీఎన్‌ఏ సహాయం కీలకంగా మారింది. ఈ ప్రక్రియను వేగవంతం చేసి బాధిత కుటుంబాలకు తమ ఆత్మీయులను అప్పగించేందుకు రెండు దేశాల అధికారులు సమన్వయంతో పనిచేస్తున్నారు.
