విమాన ప్రయాణంలో ప్రయాణికుల ప్రవర్తనకు సంబంధించిన ఘటనలు అప్పుడప్పుడు వార్తల్లో నిలుస్తుంటాయి. తాజాగా బిమాన్ బంగ్లాదేశ్ ఎయిర్‌లైన్స్ విమానంలో ఇద్దరు ప్రయాణికులు పరస్పరం దాడి చేసుకోవడం కలకలం రేపింది.
లండన్‌ నుంచి ఢాకాకు వెళ్తున్న విమానం గాల్లో ప్రయాణిస్తున్న సమయంలో ఇద్దరు ప్రయాణికుల మధ్య వాగ్వాదం చోటుచేసుకుంది. కొద్దిసేపటికే మాటామాటా పెరిగి భౌతిక దాడికి దారితీసింది.
ఇద్దరూ ఒకరిపై ఒకరు పిడిగుద్దులు కురిపించుకున్నారు. గొడవ తీవ్రతరం కావడంతో ఓ ప్రయాణికుడి టీషర్ట్ సైతం చిరిగిపోయింది. ఈ అనూహ్య పరిణామంతో తోటి ప్రయాణికులు భయాందోళనకు గురయ్యారు.
పరిస్థితి అదుపు తప్పుతున్నట్లు గుర్తించిన విమాన సిబ్బంది జోక్యం చేసుకుని గొడవను ఆపేందుకు ప్రయత్నించారు. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది. అయితే ప్రయాణికుల మధ్య గొడవకు ఖచ్చితమైన కారణం ఏమిటన్నది స్పష్టంగా తెలియరాలేదు.
