అంటార్కిటికా.. మంచుతో కప్పుకున్న అత్యంత శీతల ఖండం. అలాంటి ప్రాంతంలోనూ భారతీయ సంప్రదాయాలు, పండుగల సందడి కనిపించింది. అక్కడి మైత్రి పరిశోధన కేంద్రంలో పనిచేస్తున్న భారత శాస్త్రవేత్తలు వినాయక చవితిని ప్రత్యేకంగా జరుపుకున్నారు.
నేషనల్ సెంటర్ ఫర్ పోలార్ అండ్ ఓషన్ రీసెర్చ్ (NCPOR)కు చెందిన పరిశోధకులు అక్కడ లభ్యమయ్యే మంచుతో గణనాథుడి విగ్రహాన్ని స్వయంగా తయారు చేశారు. ఎలాంటి అచ్చులు ఉపయోగించకుండా చేతులతోనే మంచును తీర్చిదిద్ది గణపతి రూపాన్ని రూపొందించారు. అనంతరం సంప్రదాయబద్ధంగా పూజలు నిర్వహించి, హారతి ఇచ్చారు. మోదకాలు వంటి ప్రసాదాలను నైవేద్యంగా సమర్పించారు.
పర్యావరణహితంగా నిమజ్జనం
ఈ వేడుకలో గణపతి నిమజ్జనం ప్రత్యేక ఆకర్షణగా నిలిచింది. అంటార్కిటికా పర్యావరణానికి ఎలాంటి హాని కలగకుండా పరిశోధకులు జాగ్రత్తలు తీసుకున్నారు. సహజ నీటి వనరుల్లో నిమజ్జనం చేయకుండా పరిశోధన కేంద్రం లోపల ఒక బకెట్‌లో నీటిని తీసుకుని అందులో మంచు గణపతి విగ్రహాన్ని ఉంచారు. కొద్దిసేపటికే మంచు కరిగి నీటిలో కలిసిపోయింది. ఈ విధంగా తమ సంప్రదాయాన్ని పాటిస్తూనే అంటార్కిటికా సున్నితమైన పర్యావరణాన్ని కాపాడేలా నిమజ్జనాన్ని పూర్తి చేశారు.
వైరల్‌గా మారిన వీడియో
ఈ వినూత్న వేడుకకు సంబంధించిన వీడియోను బృందంలోని డాక్టర్ అనిరుధ్ ధర్ తన ఇన్‌స్టాగ్రామ్ ఖాతాలో పంచుకున్నారు. “మా ఇంటికి 15,000 కిలోమీటర్ల దూరంలో.. సుస్థిరమైన పద్ధతిలో నిమజ్జనం” అంటూ ఆయన క్యాప్షన్ ఇచ్చారు.
