హైదరాబాద్,సెప్టెంబర్ 25 (జనవాణి): హైదరాబాద్‌లోని ఖైరతాబాద్ మహాగణపతి నిమజ్జనానికి సర్వం సిద్ధమైంది. శుక్రవారం గణనాథుడిని నిమజ్జనం చేయనున్నారు. ఈ సందర్భంగా ఖైరతాబాద్ గణేశుడికి సమర్పించే భారీ లడ్డూ మరోసారి ప్రత్యేక ఆకర్షణగా నిలిచింది.
తూర్పు గోదావరి జిల్లా తాపేశ్వరం నుంచి ప్రతి ఏడాది ఖైరతాబాద్ గణేశుడికి భారీ లడ్డూను ప్రసాదంగా సమర్పించడం ఆనవాయితీగా కొనసాగుతోంది. తాపేశ్వరంలోని శ్రీ భక్తాంజనేయ సురుచి ఫుడ్స్ యూనిట్స్‌ యజమాని పి.వి.వి.ఎస్. మల్లికార్జున రావు ఈ సంప్రదాయాన్ని 2010లో ప్రారంభించారు. అప్పట్లో 500 కిలోల లడ్డూను ఖైరతాబాద్ గణేశుడికి సమర్పించారు. అప్పటి నుంచి ఏటా వివిధ పరిమాణాల్లో లడ్డూలను తయారు చేసి మహాగణపతికి నైవేద్యంగా అందిస్తున్నారు.
ఈ లడ్డూ తయారీ కూడా ప్రత్యేక పద్ధతిలో జరుగుతుంది. తాపేశ్వరంలోని సురుచి ప్రాంగణంలో ప్రత్యేకంగా ఏర్పాటు చేసిన మండపంలో లడ్డూను తయారు చేస్తారు. స్వచ్ఛమైన నెయ్యితో, ఎలాంటి కృత్రిమ పదార్థాలు ఉపయోగించకుండా దీనిని రూపొందిస్తారు. లడ్డూ తయారీలో పాల్గొనే కళాకారులు గణపతి దీక్ష పాటిస్తూ ప్రత్యేక వస్త్రధారణతో ఉంటారు.
నిమజ్జనం అనంతరం ఈ భారీ లడ్డూను భక్తులకు ప్రసాదంగా పంపిణీ చేయనున్నారు. దీంతో లడ్డూ ప్రసాదం కోసం భక్తులు ఆసక్తిగా ఎదురుచూస్తున్నారు. లడ్డూతో పాటు ఖైరతాబాద్ మహాగణపతి మెడలో అలంకరించిన రుద్రాక్ష మాలలోని రుద్రాక్షలను కూడా భక్తులకు పంపిణీ చేయనున్నట్లు కమిటీ నిర్వాహకులు తెలిపారు. దీంతో గణేశుడి నిమజ్జనంతో పాటు ప్రసాదం, రుద్రాక్షల పంపిణీపై కూడా భక్తుల్లో ఆసక్తి నెలకొంది.
