సెప్టెంబర్ 15 (జనవాణి): వినాయకుడికి నైవేద్యం అనగానే మనకు ముందుగా గుర్తొచ్చేవి లడ్డూలు, మోదకాలు, ఉండ్రాళ్లు, కుడుములు. అయితే థాయ్‌లాండ్‌లో మాత్రం గణేశుడికి భక్తులు బబుల్ టీ లేదా బోబా టీని నైవేద్యంగా సమర్పిస్తున్నారు. స్థానికుల అభిరుచికి అనుగుణంగా ఏర్పడిన ఈ ప్రత్యేక ఆచారం ప్రస్తుతం సోషల్ మీడియాలో చర్చనీయాంశంగా మారింది.
బ్యాంకాక్‌కు చెందిన పియా పింగ్ అనే మహిళ ఈ విషయానికి సంబంధించిన వీడియోను ఇన్‌స్టాగ్రామ్‌లో షేర్ చేశారు. యూనియన్ మాల్ వెలుపల ఉన్న గణేశుడి ఆలయాన్ని వీడియోలో చూపించారు. గణేశుడి విగ్రహం ముందు పెద్ద సంఖ్యలో బబుల్ టీ కప్పులు కనిపించాయి. తాను కూడా స్వామివారికి బబుల్ టీని నైవేద్యంగా సమర్పించినట్లు ఆమె తెలిపారు.
కోరిక నెరవేరితే మరిన్ని కప్పులు..
థాయ్‌లాండ్‌లోని ఈ ఆచారం వెనుక మొక్కు విధానం కూడా ఆసక్తికరంగా ఉంటుంది. తమ కోరిక నెరవేరాలని కోరుకుంటూ భక్తులు గణేశుడికి బబుల్ టీని సమర్పిస్తారు. కోరిక తీరిన తర్వాత మొక్కు చెల్లించేందుకు మళ్లీ ఆలయానికి వచ్చి, ముందుగా సమర్పించిన దానికంటే ఎక్కువ కప్పుల బబుల్ టీని సమర్పిస్తారని పియా వివరించారు. ఉదాహరణకు మూడు కప్పుల బబుల్ టీతో మొక్కు ప్రారంభించిన భక్తులు.. కోరిక నెరవేరిన తర్వాత 6, 12 కప్పులు, చివరకు వందల కప్పుల వరకు కూడా సమర్పిస్తారని ఆమె తెలిపారు.
ఎక్కడి నుంచి బబుల్ టీ కొనాలోనూ సమాచారం
యూనియన్ మాల్‌లో బబుల్ టీ దుకాణాలు ఏయే అంతస్తుల్లో ఉన్నాయో తెలిపే వివరాలు కూడా ఆలయం వద్ద అందుబాటులో ఉంటాయని పియా పేర్కొన్నారు. దీంతో భక్తులు తమకు నచ్చిన బ్రాండ్‌ బబుల్ టీని కొనుగోలు చేసి గణేశుడికి సమర్పించవచ్చు.
భారత్‌లో గణేశుడికి సంప్రదాయ నైవేద్యాలు సమర్పిస్తే.. థాయ్‌లాండ్‌లో స్థానికులకు ఇష్టమైన బబుల్ టీని భక్తులు నైవేద్యంగా పెడుతున్నారు. తమకు ఇష్టమైన వస్తువును దేవుడికి సమర్పించడం ద్వారా భక్తిని వ్యక్తం చేయడం ఈ ఆచారంలో కనిపించే ప్రత్యేకత. టీ, పాలు, చక్కెరతో పాటు నమలడానికి వీలుగా ఉండే టాపియోకా ముత్యాలతో తయారయ్యే బబుల్ టీ థాయ్‌లాండ్‌లోనూ ప్రజాదరణ పొందిన పానీయం. స్థానిక సంస్కృతి, ప్రజల అభిరుచులకు అనుగుణంగా గణేశుడి ఆరాధనలో ఇది భాగం కావడం ఇప్పుడు అందరి దృష్టినీ ఆకర్షిస్తోంది.
