#Ganesh Chaturthi

హైదరాబాద్‌లో ఖైరతాబాద్ మహాగణపయ్య నిమజ్జనం ఘనంగా పూర్తైంది. ట్యాంక్‌బండ్ క్రేన్ నంబర్-4 వద్ద పంచముఖ సంకటహర మహాగణపతి విగ్రహాన్ని ప్రత్యేక పూజల అనంతరం గంగమ్మ ఒడికి చేర్చారు. భారీగా తరలివచ్చిన భక్తులతో ట్యాంక్‌బండ్ పరిసరాలు కిక్కిరిసిపోయాయి.

బాలాపూర్ గణేష్ లడ్డూ వేలం మరోసారి రికార్డు సృష్టించింది. ఏటా పెరుగుతూ వస్తున్న లడ్డూ ధర ఈసారి ఏకంగా రూ.39 లక్షలకు చేరింది. సాహెబ్‌నగర్‌కు చెందిన అర్బన్ గ్రూప్ అధినేత సామ ప్రణీత్ రెడ్డి ఈ ఏడాది లడ్డూను దక్కించుకున్నారు. గతేడాది రూ.35 లక్షలుగా ఉన్న ధరతో పోలిస్తే ఈసారి మరో రూ.4 లక్షలు పెరిగింది.

హైదరాబాద్‌లోని ఖైరతాబాద్ మహాగణపతి నిమజ్జనానికి ఏర్పాట్లు పూర్తయ్యాయి. శుక్రవారం గణనాథుడిని నిమజ్జనం చేయనున్నారు. అయితే నిమజ్జనం సందర్భంగా మరో ప్రత్యేకత భక్తులను ఆకట్టుకుంటోంది. తూర్పు గోదావరి జిల్లా తాపేశ్వరం నుంచి ఏటా ఖైరతాబాద్ గణేశుడికి సమర్పించే భారీ లడ్డూకు ప్రత్యేక గుర్తింపు ఉంది. ఈ సంప్రదాయం ఎలా ప్రారంభమైంది? లడ్డూను ఎలా తయారు చేస్తారు? తెలుసుకుందాం.

బాలాపూర్ గణేష్ ఉత్సవాల్లో కీలక ఘట్టమైన లడ్డూ వేలానికి రంగం సిద్ధమైంది. చివరి పూజా కార్యక్రమాలు ప్రారంభమైన అనంతరం గణనాథుడిని గ్రామ ప్రదక్షిణకు తీసుకెళ్లనున్నారు. అనంతరం ప్రసిద్ధ బాలాపూర్ గణేష్ లడ్డూ వేలం జరగనుంది. 1994లో కేవలం రూ.450తో ప్రారంభమైన ఈ వేలం.. 2025 నాటికి రూ.35 లక్షలకు చేరింది. దీంతో ఈసారి లడ్డూ ఎంత ధర పలుకుతుందనే ఆసక్తి నెలకొంది.

స్వదేశానికి వేల కిలోమీటర్ల దూరంలో ఉన్న అంటార్కిటికాలో భారత శాస్త్రవేత్తలు వినాయక చవితిని వినూత్నంగా జరుపుకున్నారు. మైత్రి పరిశోధన కేంద్రంలో మంచుతో గణపతి విగ్రహాన్ని స్వయంగా రూపొందించి పూజలు నిర్వహించారు. అనంతరం పర్యావరణానికి ఎలాంటి హాని కలగకుండా కేంద్రం లోపలే నీటితో నిమజ్జనం చేశారు. ఇందుకు సంబంధించిన వీడియో సోషల్ మీడియాలో వైరల్‌గా మారింది.

గణేశ్‌ నిమజ్జనాన్ని దృష్టిలో పెట్టుకుని తెలంగాణ ప్రభుత్వం కీలక నిర్ణయం తీసుకుంది. హైదరాబాద్‌, సికింద్రాబాద్‌ జంట నగరాలతో పాటు రంగారెడ్డి, మేడ్చల్‌–మల్కాజిగిరి జిల్లాల పరిధిలో సెప్టెంబర్‌ 25న సెలవు ప్రకటించింది. ఈ మేరకు జీఏడీ ఉత్తర్వులు జారీ చేసింది. అయితే ఈ సెలవుకు బదులుగా నవంబర్‌ 14ను పనిదినంగా నిర్ణయించింది.

ఖైరతాబాద్‌ శ్రీ పంచముఖ సంకటహర మహా గణపతి దర్శనానికి భక్తులు భారీగా తరలివస్తున్నారు. అయితే మహాగణపతి నిమజ్జనానికి ఏర్పాట్లు ప్రారంభమైన నేపథ్యంలో సెప్టెంబర్‌ 23 బుధవారం రాత్రి వరకే భక్తులను దర్శనానికి అనుమతించనున్నారు. సెప్టెంబర్‌ 24న షెడ్డు, బ్యారికేడ్ల తొలగింపు చేపట్టి.. 25న తెల్లవారుజామున మహాగణపతి శోభాయాత్ర నిర్వహించనున్నారు.

వరంగల్ శివనగర్ వాసవికాలనీలోని వినాయక ట్రస్టు భవన్‌లో వినాయక చవితి వేడుకలు ఘనంగా జరుగుతున్నాయి. ఈసారి గణపతిని ఏకంగా రూ.1.93 కోట్ల విలువైన వివిధ రంగుల కరెన్సీ నోట్లతో అలంకరించడం ప్రత్యేక ఆకర్షణగా నిలిచింది. గతేడాది రూ.1.51 కోట్ల కరెన్సీతో అలంకరించగా.. ఈసారి మరో రూ.42 లక్షల విలువైన నోట్లను అదనంగా వినియోగించారు.

ముంబైలో జరుగుతున్న వినాయక చవితి వేడుకల్లో భారత స్టార్ క్రికెటర్ రోహిత్ శర్మ సందడి చేశారు. భార్య రితిక సజ్దేతో కలిసి లాల్‌బాగ్చా రాజాను దర్శించుకుని ప్రత్యేక పూజలు చేశారు. రోహిత్‌ను చూసిన అభిమానులు ‘రోహిత్.. రోహిత్’ అంటూ నినాదాలతో హోరెత్తించారు.

భారత్‌లో వినాయకుడికి లడ్డూలు, మోదకాలు, ఉండ్రాళ్లు, కుడుములు నైవేద్యంగా సమర్పించడం సాధారణం. అయితే థాయ్‌లాండ్‌లో మాత్రం గణేశుడికి బబుల్ టీని నైవేద్యంగా సమర్పించే ప్రత్యేక ఆచారం కనిపిస్తోంది. బ్యాంకాక్‌లోని యూనియన్ మాల్ సమీపంలోని గణేశుడి ఆలయంలో భక్తులు పెద్ద సంఖ్యలో బబుల్ టీ కప్పులను సమర్పిస్తున్న దృశ్యాలు సోషల్ మీడియాలో వైరల్‌గా మారాయి.

ముఖేశ్ అంబానీ ఇంట వినాయక చవితి వేడుకలు ఘనంగా జరిగాయి. ఈ వేడుకల్లో అంబానీ కోడలు రాధిక మర్చంట్ ‘ఏకదంతాయ వక్రతుండాయ’ పాటకు చేసిన అద్భుత నృత్యం ప్రత్యేక ఆకర్షణగా నిలిచింది. ఆమె డ్యాన్స్ వీడియో ప్రస్తుతం సోషల్ మీడియాలో వైరల్‌గా మారింది.

హైదరాబాద్‌ బేగంబజార్‌లోని లీచీ పర్ల్ సెట్ జ్యువెలరీ షాపులో ఏర్పాటు చేసిన వినాయక మండపం ప్రత్యేక ఆకర్షణగా నిలిచింది. 24 క్యారెట్ల బంగారంతో పాటు 3.83 లక్షల అమెరికన్ డైమండ్లతో రూపొందించిన గణపతి విగ్రహం భక్తులను విశేషంగా ఆకట్టుకుంటోంది. ఈ అద్భుత ప్రతిమను దర్శించేందుకు భక్తులు పెద్ద సంఖ్యలో తరలివస్తున్నారు.

డైరెక్టర్ తరుణ్ భాస్కర్‌, హీరోయిన్ ఈషా రెబ్బా ప్రేమలో ఉన్నారంటూ చాలాకాలంగా రూమర్లు వినిపిస్తున్నాయి. తాజాగా వినాయక చవితి సందర్భంగా వీరిద్దరూ కలిసి దిగిన ఫొటోను తరుణ్ భాస్కర్‌ సోషల్ మీడియాలో షేర్ చేయడంతో ఈ వార్తలకు మరింత బలం చేకూరింది. దీంతో త్వరలోనే ఈ జంట పెళ్లిపీటలు ఎక్కబోతున్నారనే ప్రచారం మరోసారి ఊపందుకుంది.

ఆంధ్రప్రదేశ్ సీఎం చంద్రబాబు నాయుడు నివాసంలో వినాయక చవితి వేడుకలు ఘనంగా జరిగాయి. ఉండవల్లిలోని నివాసంలో భార్య భువనేశ్వరి, మనవడు దేవాన్ష్‌తో కలిసి చంద్రబాబు విఘ్నేశ్వరుడికి భక్తిశ్రద్ధలతో పూజలు నిర్వహించారు. రాష్ట్రాభివృద్ధికి ఎదురయ్యే విఘ్నాలన్నీ తొలగి.. ఆంధ్రప్రదేశ్ సుభిక్షంగా, తెలుగు జాతి వర్థిల్లాలని గణనాథుడిని ప్రార్థించినట్లు సీఎం తెలిపారు.

వినాయక చవితి సందర్భంగా తెలంగాణ సీఎం రేవంత్‌ రెడ్డి జూబ్లీహిల్స్‌లోని తన నివాసంలో కుటుంబ సభ్యులతో కలిసి గణపతి పూజలు నిర్వహించారు. రాష్ట్ర ప్రజల జీవితాల్లోని విఘ్నాలన్నీ తొలగిపోయి, తెలంగాణ సుభిక్షంగా ఉండాలని గణనాథుడిని ప్రార్థించారు. ప్రజలందరికీ వినాయక చవితి శుభాకాంక్షలు తెలిపారు.

హైదరాబాద్‌ గోషామహల్‌ నియోజకవర్గంలోని అగాపురాలో ఏర్పాటు చేసిన వినూత్న గణపతి మండపం ప్రత్యేక ఆకర్షణగా నిలిచింది. ‘తెలంగాణ రైజింగ్‌–1000 డేస్‌ యాజ్‌ సీఎం’ థీమ్‌తో రూపొందించిన ఈ మండపంలో సీఎం రేవంత్‌రెడ్డి భుజంపై గణనాథుడిని ఎత్తుకున్నట్లుగా విగ్రహాన్ని తీర్చిదిద్దారు. ఈ ప్రతిమ ‘బాహుబలి’ సినిమాలోని శివలింగాన్ని భుజాన మోసే సన్నివేశాన్ని తలపిస్తోంది.

హైదరాబాద్‌లోని ఖైరతాబాద్ మహాగణపతి గణేశ్ ఉత్సవాలకు ఘనంగా శ్రీకారం చుట్టారు. ఈ ఏడాది 69 అడుగుల ఎత్తులో 'పంచముఖ సంకటహర మహాగణపతి’గా కొలువుదీరిన బడా గణేశుడికి తెలంగాణ గవర్నర్ శివ ప్రతాప్ శుక్లా, ఆయన సతీమణి జానకి శుక్లా తొలి పూజలు నిర్వహించారు. మంత్రి పొన్నం ప్రభాకర్, ఎమ్మెల్యే దానం నాగేందర్ తదితరులు కార్యక్రమంలో పాల్గొన్నారు.

ఖైరతాబాద్ బడా గణేష్ విగ్రహ ప్రతిష్ఠాపన మహోత్సవం సందర్భంగా భక్తుల రద్దీని దృష్టిలో ఉంచుకుని హైదరాబాద్ ట్రాఫిక్ పోలీసులు కీలక నిర్ణయం తీసుకున్నారు. ఈ నెల 12 నుంచి 24వ తేదీ వరకు ప్రతిరోజూ ఉదయం 11 గంటల నుంచి రాత్రి వరకు పలు ప్రాంతాల్లో ట్రాఫిక్ ఆంక్షలు, మళ్లింపులు అమల్లో ఉంటాయని ట్రాఫిక్ జాయింట్ కమిషనర్ జోయల్ డేవిస్ తెలిపారు.

వినాయక చవితి పండుగ వేళ ఆంధ్రప్రదేశ్ ప్రభుత్వం కీలక నిర్ణయం తీసుకుంది. రాష్ట్రవ్యాప్తంగా ఏర్పాటు చేసే గణేశ్ మండపాలకు ఉచిత విద్యుత్ అందించాలని నిర్ణయించింది. ఈ విషయాన్ని మంత్రి నారా లోకేశ్ ‘ఎక్స్‌’ వేదికగా వెల్లడించారు.

పర్యావరణ పరిరక్షణకు ప్రతి ఒక్కరూ తమ వంతు బాధ్యత తీసుకోవాలని మెగాస్టార్ చిరంజీవి పిలుపునిచ్చారు. ఈ వినాయక చవితికి ప్లాస్టర్ ఆఫ్ పారిస్ విగ్రహాలకు బదులుగా సీడ్ గణేశుడిని పూజించాలని సూచించారు. గ్రీన్ ఇండియా ఛాలెంజ్ రూపొందించిన సీడ్ గణేశా ప్రతిమలను తన నివాసంలో ఆవిష్కరించిన చిరంజీవి.. పూజ అనంతరం ఇంట్లోనే నిమజ్జనం చేస్తే వినాయకుడు మొక్కగా మారి మనల్ని ఆశీర్వదిస్తాడని చెప్పారు.