#Orr

సిద్దిపేట జిల్లాలో లంచం తీసుకుంటున్నారన్న ఆరోపణలపై గ్రామ కార్యదర్శి, కారొబార్‌ ఏసీబీ అధికారుల ట్రాప్‌లో చిక్కుకున్నట్లు సమాచారం. నారాయణరావుపేట మండలం జక్కాపూర్‌లో ఇంటి మ్యుటేషన్‌ కోసం రూ.15 వేల లంచం డిమాండ్ చేసినట్లు ఫిర్యాదు రావడంతో అధికారులు పక్కా ప్రణాళికతో దాడి నిర్వహించినట్లు తెలుస్తోంది.

బీఆర్ఎస్‌ నేత మన్నె క్రిశాంక్‌పై ఎఫ్‌ఐఆర్‌ నమోదవడంపై ఆ పార్టీ వర్కింగ్‌ ప్రెసిడెంట్‌ కేటీఆర్‌ తీవ్రంగా స్పందించారు. కాంగ్రెస్‌ ప్రభుత్వ అవినీతి, అక్రమాలను ప్రశ్నిస్తున్నందుకే కేసులు పెడుతున్నారని ఆరోపించిన ఆయన.. ఎన్ని కేసులు పెట్టినా కాంగ్రెస్‌ నేతల అవినీతిని బట్టబయలు చేస్తూనే ఉంటామని స్పష్టం చేశారు.

రంగారెడ్డి జిల్లా వైద్య ఆరోగ్య శాఖ అధికారిణి (డీఎంహెచ్‌వో) స్వర్ణకుమారి లంచం తీసుకుంటూ అవినీతి నిరోధక శాఖ (ఏసీబీ) అధికారులకు పట్టుబడ్డారు. ఎల్బీనగర్‌లో లైసెన్స్ లేదంటూ మూసివేసిన ఫిజియోథెరపీ ఆస్పత్రిని తిరిగి తెరవడానికి రూ.2 లక్షలు డిమాండ్ చేసినట్లు ఫిర్యాదు అందడంతో ఏసీబీ అధికారులు పథకం ప్రకారం దాడి నిర్వహించారు. ఈ వ్యవహారంలో డీఎంహెచ్‌వోతో పాటు హెల్త్ ఇన్‌స్పెక్టర్, డ్రైవర్ పాత్రపై దర్యాప్తు చేపట్టారు.

హైదరాబాద్‌ ఐటీ కారిడార్‌లోని సర్వీస్‌ అపార్ట్‌మెంట్లపై సైబరాబాద్‌ పోలీసులు నిఘా పెంచారు. పేకాట, వ్యభిచారం వంటి చట్టవిరుద్ధ కార్యకలాపాలకు అపార్ట్‌మెంట్లను ఉపయోగిస్తే కఠిన చర్యలు తప్పవని హెచ్చరించారు. అద్దెదారుల వివరాలు, గుర్తింపు పత్రాలు, బస ఉద్దేశం వంటి సమాచారాన్ని తప్పనిసరిగా నమోదు చేసుకోవాలని ప్రాపర్టీ ఓనర్లకు సూచించారు. నిబంధనలు పాటించకపోతే కేసులతో పాటు ఆస్తుల సీజ్‌కు కూడా అవకాశం ఉంటుందని స్పష్టం చేశారు.

ఆదాయానికి మించిన ఆస్తుల కేసులో అరెస్టైన డీఎస్పీ భీమ్‌రెడ్డి వ్యవహారంలో ఏసీబీ దర్యాప్తును మరింత ముమ్మరం చేసింది. ఆయన బినామీలు, ఆర్థిక వ్యవహారాలు నిర్వహిస్తున్న వ్యక్తులు, సంస్థలపై హైదరాబాద్‌, జహీరాబాద్‌లో ఏకకాలంలో 10 బృందాలతో సోదాలు నిర్వహించింది. ఈ తనిఖీల్లో రూ.1.35 కోట్ల నగదు, విదేశీ కరెన్సీ, మద్యం సీసాలతో పాటు కీలక పత్రాలు, డిజిటల్‌ ఆధారాలను అధికారులు స్వాధీనం చేసుకున్నట్లు సమాచారం.

హైదరాబాద్‌ గచ్చిబౌలి ఐటీ కారిడార్‌లో ఓ మహిళా సాఫ్ట్‌వేర్ ఉద్యోగినికి చేదు అనుభవం ఎదురైంది. క్యాబ్ ఎక్కుతున్న సమయంలో ఓ సెక్యూరిటీ గార్డు ఆమెను పక్కకు లాగి బలవంతంగా ముద్దు పెట్టాడు. దీంతో బాధితురాలు కేకలు వేయడంతో నిందితుడు అక్కడి నుంచి పరారయ్యాడు. ఆమె ఫిర్యాదుతో కేసు నమోదు చేసిన పోలీసులు సీసీటీవీ ఫుటేజీ ఆధారంగా నిందితుడిని గుర్తించి అరెస్ట్ చేశారు.

ఆదాయానికి మించిన ఆస్తుల కేసులో నిమ్స్ అదనపు మెడికల్ సూపరింటెండెంట్ ఎన్. లక్ష్మీభాస్కర్‌ను ఏసీబీ అధికారులు మంగళవారం అరెస్ట్ చేశారు. హైదరాబాద్ సహా పలు ప్రాంతాల్లో ఏకకాలంలో నిర్వహించిన సోదాల్లో రూ.6.13 కోట్ల విలువైన ఆస్తులను గుర్తించినట్లు ఏసీబీ వెల్లడించింది.

గంజాయి అక్రమ రవాణాపై పోలీసులు భారీ ఆపరేషన్ చేపట్టారు. కుత్బుల్లాపూర్ జోన్ పరిధిలోని దుండిగల్ పోలీస్ స్టేషన్ పరిధిలో ఔటర్ రింగ్‌రోడ్డుపై తనిఖీలు నిర్వహించి డీసీఎంలో తరలిస్తున్న 425 కేజీల గంజాయిని స్వాధీనం చేసుకున్నారు. ఈ కేసులో ఆరుగురు సభ్యుల ముఠాను పోలీసులు అరెస్ట్ చేశారు.

ములుగు జిల్లాలో మరో అవినీతి అధికారి ఏసీబీకి చిక్కారు. గోవిందరావుపేట మండల తహసీల్దార్ సృజన్‌కుమార్ భూమిని కుటుంబసభ్యుల పేర్లపై మార్చేందుకు రూ.14 వేల లంచం తీసుకుంటుండగా ఏసీబీ అధికారులు రెడ్‌హ్యాండెడ్‌గా పట్టుకున్నారు.

భద్రాద్రి కొత్తగూడెం జిల్లాలో లంచం తీసుకుంటూ ఓ హాస్టల్ వార్డెన్ ఏసీబీ అధికారులకు పట్టుబడ్డారు. చర్ల మండలం సత్యనారాయణపురంలోని ఎస్టీ బాలుర ఇన్‌చార్జ్ హాస్టల్ వార్డెన్, రికార్డ్ అసిస్టెంట్‌గా పనిచేస్తున్న భూక్యా వాలుసింహ.. మహిళా ఉద్యోగి గైర్హాజరును అనధికారిక గైర్హాజరుగా నమోదు చేయకుండా ఉండేందుకు రూ.14 వేల లంచం తీసుకుంటుండగా అధికారులు దాడి చేసి అదుపులోకి తీసుకున్నారు.

ఓటుకు నోటు కేసులో సుప్రీంకోర్టులో కీలక విచారణ జరిగింది. తెలంగాణ సీఎం రేవంత్ రెడ్డి తరఫున సీనియర్ న్యాయవాది సిద్ధార్థ లూత్రా సుమారు గంటన్నరపాటు వాదనలు వినిపించారు.

తెలంగాణ సచివాలయంలో అవినీతి నిరోధక శాఖ (ACB) అధికారులు చేపట్టిన ట్రాప్ కలకలం రేపింది. సీఎం రిలీఫ్ ఫండ్‌కు సంబంధించిన వ్యవహారంలో రూ.లక్ష లంచం తీసుకుంటుండగా సెక్షన్ ఆఫీసర్ వినోద్, ఔట్‌సోర్సింగ్ ఉద్యోగి రాఘవేంద్రను ఏసీబీ అధికారులు రెడ్‌హ్యాండెడ్‌గా పట్టుకున్నట్లు సమాచారం. అనంతరం ఇద్దరినీ నాంపల్లి ఏసీబీ కార్యాలయానికి తరలించి విచారిస్తున్నారు.

భారత్‌ సొంతంగా తయారు చేస్తున్న తొలి బుల్లెట్‌ ట్రైన్‌ నిర్మాణం కీలక దశకు చేరుకుంది. రైలు బాడీ ఫ్రేమ్‌ సిద్ధమైందని కేంద్ర రైల్వే మంత్రి అశ్విని వైష్ణవ్‌ తెలిపారు. వచ్చే ఏడాది మే లేదా జూన్‌లో దేశీయ బుల్లెట్‌ ట్రైన్‌తో పట్టాలపై పరీక్షలు నిర్వహించనున్నట్లు వెల్లడించారు.

మహబూబాబాద్ జిల్లా తొర్రూరు మండల కేంద్రంలో కాంగ్రెస్ ప్రభుత్వం 1000 రోజుల పాలనపై బీఆర్ఎస్ శ్రేణులు నిరసన చేపట్టాయి. మాజీ మంత్రి ఎర్రబెల్లి దయాకర్ రావు ఆధ్వర్యంలో యువత, విద్యార్థులు బైక్ ర్యాలీ నిర్వహించారు. ఈ సందర్భంగా కాంగ్రెస్ ప్రభుత్వం ఎన్నికల హామీలను అమలు చేయడంలో విఫలమైందని ఎర్రబెల్లి దయాకర్ రావు తీవ్రంగా విమర్శించారు.

తిరుమల తిరుపతి దేవస్థానం (TTD) డిప్యూటీ ఎగ్జిక్యూటివ్ ఆఫీసర్ లోకనాథంను అవినీతి నిరోధక శాఖ (ACB) అరెస్ట్ చేసింది. అక్రమ ఆస్తుల కేసులో రెండు రోజుల పాటు నిర్వహించిన సోదాల్లో భారీగా ఆస్తులు, బంగారం, వెండి, నగదు గుర్తించిన అధికారులు.. విచారణ కోసం ఆయనను ఏసీబీ కార్యాలయానికి తరలించారు.

అవుటర్ రింగ్ రోడ్ పరిధిలో ప్రభుత్వం నిర్మిస్తున్న ఇందిరమ్మ ఇళ్ల టవర్స్‌లో ఇళ్ల కేటాయింపునకు లాటరీ ప్రక్రియను ఆగస్టు 27 నుంచి 30 వరకు నిర్వహించనున్నట్లు హౌసింగ్ బోర్డు వైస్ ఛైర్మన్ వి.పీ. గౌతం తెలిపారు. అర్హుల తుది జాబితాను ఆగస్టు 25న ప్రకటించనున్నారు. 23వ తేదీ వరకు అభ్యంతరాలు స్వీకరించనున్నట్లు వెల్లడించారు.

అసోంలోని హోజాయ్ జిల్లా హవాయ్‌పూర్ వద్ద రైల్వే పట్టాలపై ఏనుగుల గుంపు రావడంతో రాజధాని ఎక్స్‌ప్రెస్‌ను అధికారులు నిలిపివేశారు. అటవీశాఖ సమాచారం, రైల్వే అధికారులు, లోకో పైలట్ సమన్వయంతో సుమారు 90 ఏనుగులు సురక్షితంగా పట్టాలు దాటాయి. అనంతరం రైలు ప్రయాణం కొనసాగించింది. వన్యప్రాణుల సంరక్షణ, ఏనుగుల కారిడార్ల భద్రతలో ఈ ఘటన ప్రాధాన్యం సంతరించుకుంది.

సీనియర్‌ హీరోయిన్‌ నిత్యా మీనన్‌ సినిమాలకు గుడ్‌బై చెప్పిందంటూ వచ్చిన వార్తలకు చెక్‌ పెట్టబోతున్నారు. ఏడాది పాటు సినిమాలకు దూరంగా ఉన్న ఆమె.. ఇప్పుడు ఓ హారర్‌ ఫాంటసీ మూవీతో సిల్వర్‌ స్క్రీన్‌పైకి రీఎంట్రీ ఇవ్వనున్నట్లు తెలుస్తోంది. ఈ సినిమాకు హీరోయిన్‌గా నటించడంతో పాటు కథను అందిస్తూ, నిర్మాతగా కూడా వ్యవహరించనున్నట్లు కోలీవుడ్‌ వర్గాల్లో ప్రచారం జరుగుతోంది.

కొండగట్టు సమీపంలో జగిత్యాల-కరీంనగర్‌ జాతీయ రహదారిపై ఘోర రోడ్డు ప్రమాదం జరిగింది. ఆర్టీసీ బస్సు, లారీ ఢీకొన్న ఘటనలో 20 మందికిపైగా ప్రయాణికులు గాయపడ్డారు. క్షతగాత్రుల్లో ఐదుగురు చిన్నారులు ఉన్నారు.

తెలంగాణ కాంగ్రెస్ ప్రభుత్వంపై బీఆర్ఎస్ వర్కింగ్ ప్రెసిడెంట్ కేటీఆర్ తీవ్రస్థాయిలో విమర్శలు చేశారు. రాష్ట్రంలో అవినీతి, అక్రమాలపై ప్రతిపక్షాలు మాత్రమే మాట్లాడటం లేదని.. కాంగ్రెస్ పార్టీకి చెందిన ఎమ్మెల్యేలే ప్రభుత్వంపై ఆరోపణలు చేస్తున్నారని అన్నారు. తెలంగాణను ఏఐసీసీకి ఏటీఎంగా మార్చారని కేటీఆర్ ఆరోపించారు.

భద్రాచలం–విశాఖపట్నం రోడ్డు కారిడార్‌ అభివృద్ధిపై రాజ్యసభలో బీఆర్‌ఎస్‌ ఎంపీ వద్దిరాజు రవిచంద్ర కేంద్రాన్ని ప్రశ్నించారు. NH-30, NH-16 అనుసంధానం, గిరిజన ప్రాంతాల్లో రహదారుల అభివృద్ధిపై మంత్రి నితిన్‌ గడ్కరీ వివరాలు వెల్లడించారు.

వరుణ్ తేజ్ హీరోగా నటించిన 'కొరియన్ కనకరాజు' చిత్రానికి ప్రేక్షకుల నుంచి పాజిటివ్ రెస్పాన్స్ వస్తున్న నేపథ్యంలో మెగాస్టార్ చిరంజీవి చిత్రబృందాన్ని అభినందించారు. వరుణ్ తేజ్ శ్రమకు తగిన ఫలితం దక్కిందని పేర్కొంటూ, సినిమా మరింత పెద్ద విజయాన్ని అందుకోవాలని ఆకాంక్షించారు.

సికింద్రాబాద్ నుంచి శామీర్‌పేట్ వరకు నిర్మించనున్న ప్రతిష్ఠాత్మక ఎలివేటెడ్ కారిడార్ ప్రాజెక్టులో భాగంగా భూములు ఇచ్చిన అల్వాల్ భూయజమానులకు రూ.33 కోట్ల పరిహార చెక్కులను జిల్లా యంత్రాంగం అందజేసింది. మొత్తం 2,264 చదరపు గజాల భూమిని ప్రాజెక్టు కోసం సేకరించగా, సంబంధిత భూయజమానులకు పరిహారం చెల్లించినట్లు అధికారులు తెలిపారు.

ఔటర్ రింగ్ రోడ్ (ఓఆర్ఆర్) పరిధిలో నడిచే పాత ఎల్‌పీజీ/సీఎన్‌జీ ఆటో రిక్షాల యజమానులకు తెలంగాణ రాష్ట్ర రవాణా శాఖ ఊరటనిచ్చింది. పాత ఆటోను స్క్రాప్ చేసి అదే సిటీ పర్మిట్‌పై కొత్త ఎల్‌పీజీ/సీఎన్‌జీ/ఎలక్ట్రిక్ ఆటోను కొనుగోలు చేసేవారికి ఫిట్‌నెస్ సర్టిఫికెట్ రెన్యువల్ లేకుండానే పర్మిట్, యాజమాన్య బదిలీకి అనుమతిని ఇస్తూ రవాణా శాఖ కమిషనర్ ఉత్తర్వులు జారీ చేశారు.

తొర్రూరు మండలం కంటాయపాలెం గ్రామంలో కొనసాగుతున్న కీలక వంతెన నిర్మాణ పనులను పాలకుర్తి శాసన సభ్యురాలు శ్రీమతి యశశ్విని రెడ్డి అధికారులతో కలిసి పరిశీలించారు.

తొర్రూరు మండలం పోలేపల్లి గ్రామంలో పాలకుర్తి ఎమ్మెల్యే యశశ్విని రెడ్డి పలు అభివృద్ధి కార్యక్రమాలను ప్రారంభించారు. రూ.10 లక్షల వ్యయంతో సీసీ రోడ్డు నిర్మాణ పనులకు భూమిపూజ నిర్వహించడంతో పాటు గ్రామ ప్రజలకు స్వచ్ఛమైన తాగునీరు అందించేందుకు ఏర్పాటు చేసిన వాటర్ ప్లాంట్‌ను ప్రారంభించారు.

తొర్రూరు మండలం అమరసింగ్ తండా గ్రామంలో ప్రజలకు మెరుగైన మౌలిక వసతులు కల్పించే దిశగా పలు అభివృద్ధి కార్యక్రమాలకు పాలకుర్తి శాసన సభ్యురాలు శ్రీమతి యశశ్విని రెడ్డి శంకుస్థాపన చేశారు. గ్రామాభివృద్ధికి ప్రభుత్వం కట్టుబడి ఉందనే సంకల్పంతో అభివృద్ధి పనులను ప్రారంభించారు.

థియేటర్లలో ఆశించిన ఫలితాన్ని అందుకోలేక భారీ నిరాశకు గురిచేసిన ఓ తెలుగు సినిమా.. ఇప్పుడు ఓటీటీలో మాత్రం ఊహించని రీతిలో దూసుకెళ్తోంది. ప్రభాస్ నటించిన *'ది రాజాసాబ్'* డిజిటల్ స్ట్రీమింగ్‌లో రికార్డు స్థాయి వీక్షణలు సాధిస్తూ మరోసారి వార్తల్లో నిలిచింది.