మెగాస్టార్ చిరంజీవి పుట్టినరోజు వేడుకలు ఈసారి ప్రత్యేక ఆకర్షణగా నిలిచాయి. మహారాష్ట్రకు చెందిన ఎమ్మెల్సీ విక్రమ్ కాకడే తన పావ్నా నివాసంలో చిరంజీవి బర్త్‌డే సెలబ్రేషన్స్‌ను ఘనంగా నిర్వహించారు. చిరంజీవిపై తనకున్న అభిమానాన్ని చాటుకుంటూ ఆయన ఈ ప్రత్యేక వేడుకలను ఏర్పాటు చేసినట్లు తెలుస్తోంది. ఈ వేడుకల్లో మెగాస్టార్ చిరంజీవితో పాటు ఆయన తనయుడు రామ్ చరణ్, నటుడు శ్రీకాంత్, చలమశెట్టి సునీల్, రాజా రవీంద్ర తదితరులు పాల్గొన్నారు. వేడుకలకు సంబంధించిన ఫొటోలు, వీడియోలు ప్రస్తుతం సోషల్ మీడియాలో వైరల్‌గా మారాయి.
దశాబ్దాలుగా తెలుగు సినీ పరిశ్రమలో అగ్ర కథానాయకుడిగా కొనసాగుతున్న చిరంజీవికి దేశవ్యాప్తంగా భారీ అభిమానగణం ఉంది. ఆయన నటన, డ్యాన్స్, మాస్ ఇమేజ్‌తో పాటు సామాజిక సేవా కార్యక్రమాలు కూడా ఆయనకు ప్రత్యేక గుర్తింపును తీసుకొచ్చాయి. దీంతో తెలుగు రాష్ట్రాలతో పాటు ఇతర ప్రాంతాల్లోనూ అభిమానులు చిరంజీవి పుట్టినరోజును ఘనంగా జరుపుకుంటుంటారు. ఈ నేపథ్యంలో మహారాష్ట్ర ఎమ్మెల్సీ విక్రమ్ కాకడే స్వయంగా తన నివాసంలో చిరంజీవి పుట్టినరోజు వేడుకలు నిర్వహించడం అభిమానులను ఆకట్టుకుంటోంది. ప్రాంతీయ సినిమాలతో కెరీర్ ప్రారంభించి జాతీయ స్థాయిలో గుర్తింపు, కోట్లాది మంది అభిమానులను సంపాదించుకున్న చిరంజీవి క్రేజ్‌కు ఇది మరో ఉదాహరణగా అభిమానులు చెబుతున్నారు.
ప్రస్తుతం చిరంజీవి వరుస సినిమాలతో బిజీగా ఉన్నారు. బాబీ కొల్లి దర్శకత్వంలో తెరకెక్కుతున్న ‘కాకా’ సినిమాలో ఆయన నటిస్తున్నారు. అలాగే వశిష్ఠ దర్శకత్వంలో రూపొందిన ‘విశ్వంభర’ పోస్ట్ ప్రొడక్షన్ కార్యక్రమాలు కొనసాగుతున్నాయి. వీటితో పాటు దర్శకుడు శ్రీకాంత్ ఓదెలతోనూ చిరంజీవి ఓ సినిమా చేయబోతున్నారు.
