#Bonalu Festival

జూలై 16న గోల్కొండ జగదాంబిక మహంకాళి అమ్మవారికి తొలి బోనంతో ప్రారంభమైన ఆషాడ బోనాల ఉత్సవాలు, ఆగస్టు 13న మహాకుంభహారతితో సంప్రదాయబద్ధంగా ఘనంగా ముగిశాయి. మంత్రి కొండా సురేఖ ఆధ్వర్యంలో భక్తిశ్రద్ధల మధ్య ఉత్సవాల ముగింపు కార్యక్రమం జరిగింది.

హైదరాబాద్ మహాంకాళి అమ్మవారి బోనాల ఉత్సవాల్లో భాగంగా నిర్వహించిన రంగం కార్యక్రమంలో మాతంగి అనురాధ భవిష్యవాణి వినిపించారు. సమాజంలో పుణ్యం తగ్గి పాపం పెరుగుతోందని, ప్రజలు ఆచారాలు, సంప్రదాయాలను విస్మరిస్తే కుండపోత వర్షాలు, వరదలతో తీవ్ర నష్టం జరిగే ప్రమాదం ఉందని హెచ్చరించారు.

బోనాల పండుగ తెలంగాణ ప్రజల ఆత్మగౌరవానికి, సంస్కృతి వైభవానికి ప్రతీక అని మంత్రి పొన్నం ప్రభాకర్‌ అన్నారు. ప్రజలు సుఖసంతోషాలతో ఉండాలని అమ్మవారిని ప్రార్థించారు.

బోనాల ఉత్సవాలకు ప్రభుత్వం తగినన్ని నిధులు కేటాయించడం లేదని కేంద్ర మంత్రి బండి సంజయ్‌ విమర్శించారు. హిందువుల సమస్యలపై తాను ప్రశ్నిస్తూనే ఉంటానన్నారు.

బోనాల పండుగ సందర్భంగా హైదరాబాద్‌ నగరంలో పలు ప్రాంతాల్లో ట్రాఫిక్‌ ఆంక్షలు, మళ్లింపులు అమలు చేయనున్నట్లు ట్రాఫిక్‌ పోలీసులు తెలిపారు. లాల్‌దర్వాజా సింహవాహిని శ్రీ మహంకాళి బోనాలు, కార్వాన్‌ దర్బార్‌ మైసమ్మ బోనాలు, అంబర్‌పేట మహంకాళి ఆలయం, చిలకలగూడ శ్రీ కట్ట మైసమ్మ–పోచమ్మ ఆలయాల వద్ద భక్తుల రద్దీని దృష్టిలో ఉంచుకుని ఈ ఏర్పాట్లు చేసినట్లు వెల్లడించారు.

సికింద్రాబాద్ ఉజ్జయిని మహంకాళి ఆలయంలో జరిగిన రంగం కార్యక్రమంలో మాతంగి స్వర్ణలత భవిష్యవాణి వినిపించారు. కుంభవృష్టి వర్షాలు, అగ్నిప్రమాదాలు, ప్రాణనష్టం పెరిగే అవకాశముందని హెచ్చరించారు.

సికింద్రాబాద్ ఉజ్జయిని మహంకాళి అమ్మవారి బోనాల సందర్భంగా మంత్రి పొన్నం ప్రభాకర్ అధికారిక నివాసంలో ఆదివారం నాడు బోనాల సంబురాలను భక్తిశ్రద్ధలతో నిర్వహించారు. ఈ సందర్భంగా ఏర్పాటు చేసిన బోనాల విందుకు సీఎం రేవంత్ రెడ్డి హాజరయ్యారు.

తెలంగాణ సంస్కృతి, సంప్రదాయాలకు ప్రతీకగా నిలిచే బోనాల పండుగ సందర్భంగా.. సికింద్రాబాద్ ఉజ్జయిని మహంకాళి అమ్మవారిని బీఆర్ఎస్ వర్కింగ్ ప్రెసిడెంట్ కేటీఆర్ దర్శించుకున్నారు.

ఆషాఢ బోనాల ఉత్సవాల సందర్భంగా సికింద్రాబాద్ ఉజ్జయిని మహంకాళి అమ్మవారిని హైదరాబాద్ పోలీసు కమిషనర్ సీపీ సజ్జనార్ దంపతులు దర్శించుకున్నారు. అమ్మవారికి ప్రత్యేక పూజలు నిర్వహించిన ఆయన... హైదరాబాద్‌లో బోనాలకు ఉన్న చారిత్రక ప్రాధాన్యాన్ని గుర్తు చేస్తూ, భక్తుల భద్రతకు పోలీసులు పటిష్ఠమైన ఏర్పాట్లు చేశారని తెలిపారు.

తెలంగాణ రాష్ట్రంలో అత్యంత వైభవంగా జరిగే లష్కర్ బోనాల మహోత్సవం ఘనంగా కొనసాగుతోంది. ఈ సందర్భంగా రాష్ట్ర ముఖ్యమంత్రి రేవంత్ రెడ్డి సికింద్రాబాద్ ఉజ్జయిని మహంకాళి అమ్మవారిని దర్శించుకుని ప్రత్యేక పూజలు నిర్వహించారు. ప్రభుత్వం తరఫున పట్టువస్త్రాలు సమర్పించి అమ్మవారి ఆశీస్సులు తీసుకున్నారు.

హైదరాబాద్ ప్రజా భవన్‌లో నిర్వహించిన ఆషాఢ బోనాల ఉత్సవాలు భక్తిశ్రద్ధల నడుమ ఘనంగా జరిగాయి. అటవీ, పర్యావరణ, దేవాదాయ ధర్మాదాయ శాఖ మంత్రి కొండా సురేఖ అమ్మవారికి బోనం సమర్పించి ప్రత్యేక పూజలు నిర్వహించారు. రాష్ట్ర ప్రజల సంక్షేమం, తెలంగాణ అభివృద్ధి కోసం ప్రార్థనలు చేశారు.