తెలంగాణ ప్రభుత్వ ప్రధాన కార్యదర్శి సంజయ్ జాజూ సోమవారం మహేశ్వరం తెలంగాణ మోడల్ స్కూల్‌ను సందర్శించి విద్యార్థులు, ఉపాధ్యాయులు, పాఠశాల సిబ్బందితో మమేకమయ్యారు. పాఠశాల విద్యార్థులు, సిబ్బంది ఆయనకు పుష్పగుచ్ఛాలతో ఘన స్వాగతం పలికారు. ఈ సందర్భంగా ప్రధాన కార్యదర్శి కూడా విద్యార్థులు, ఉపాధ్యాయులకు పుష్పగుచ్ఛాలు, మొక్కలను అందజేసి వారిని అభినందించారు.
విద్యార్థులతో ప్రత్యక్షంగా మాట్లాడిన సంజయ్ జాజూ వారి చదువు, తరగతుల నిర్వహణ, బోధన విధానం, పాఠశాల విద్యా వాతావరణం గురించి అడిగి తెలుసుకున్నారు. తరగతులు క్రమం తప్పకుండా నిర్వహిస్తున్నారా, ఉపాధ్యాయులు సరైన మార్గదర్శకత్వం అందిస్తున్నారా అనే అంశాలపై ఆరా తీశారు.
ప్రభుత్వ పాఠశాల విద్యార్థులు కూడా ఉన్నత స్థానాలకు చేరుకోవచ్చని ఆయన అన్నారు. తెలంగాణ ముఖ్యమంత్రి ప్రభుత్వ పాఠశాలలో చదివి రాష్ట్ర ముఖ్యమంత్రి స్థాయికి ఎదిగారని గుర్తు చేస్తూ, కష్టపడి చదివితే ఎలాంటి లక్ష్యాన్నైనా సాధించవచ్చని విద్యార్థులకు సూచించారు.
విద్యార్థుల భవిష్యత్ లక్ష్యాల గురించి తెలుసుకుంటూ, వైద్య, ఇంజినీరింగ్, సివిల్ సర్వీసెస్ వంటి రంగాల్లో ముందుకు వెళ్లాలన్న వారి ఆశయాలను అభినందించారు. తన విద్యార్థి దశలో ఒక ఐఏఎస్ అధికారి పాఠశాలకు వచ్చిన సందర్భంగా తాను స్ఫూర్తి పొందిన విషయాన్ని గుర్తు చేసుకుంటూ, అదే ప్రేరణతో సివిల్ సర్వీసెస్‌లోకి వచ్చి ఐఏఎస్ అధికారిగా మారినట్లు వివరించారు.
ప్రభుత్వం అందిస్తున్న ఫిజిక్స్ వాలా, ఖాన్ అకాడమీ డిజిటల్ లెర్నింగ్ వనరులను సమర్థంగా వినియోగించుకోవాలని విద్యార్థులకు సూచించారు. ప్రస్తుత విద్యా సంవత్సరంలోనే ఐఐటీ, నీట్ ప్రవేశ పరీక్షల్లో ఉత్తమ ర్యాంకులు సాధించేలా కృషి చేయాలని ప్రోత్సహించారు. విద్యార్థులను నిరంతరం ప్రేరేపిస్తూ, వారికి అవసరమైన మార్గదర్శకత్వం అందించాలని ఉపాధ్యాయులను కోరారు.
అనంతరం పాఠశాల ప్రధానోపాధ్యాయుడు ఈ. గోపితో సమావేశమైన ప్రధాన కార్యదర్శి, పాఠశాల మౌలిక వసతులు, అవసరాలు, ఎదురవుతున్న సమస్యలపై సమీక్ష నిర్వహించారు. సమస్యలను వెంటనే పరిష్కరించాలని సంబంధిత అధికారులను ఆదేశించారు. అవసరమైతే సంబంధిత శాఖలను లేదా నేరుగా చీఫ్ సెక్రటరీ కార్యాలయాన్ని సంప్రదించవచ్చని ప్రధానోపాధ్యాయుడికి హామీ ఇచ్చారు.
ఈ సందర్భంగా పాఠశాల ఆవరణలో మొక్కను నాటిన సంజయ్ జాజూ, పాఠశాలలో పరిశుభ్రత, క్రమశిక్షణ, విద్యా ప్రమాణాలను మెరుగ్గా నిర్వహిస్తున్న ప్రధానోపాధ్యాయుడు, ఉపాధ్యాయులను అభినందించారు.
ఈ కార్యక్రమంలో పరిశ్రమలు, వాణిజ్య శాఖ కార్యదర్శి కృష్ణ ఆదిత్య, ఐఏఎస్ అధికారి శశాంక్‌తో పాటు ఇతర అధికారులు పాల్గొన్నారు. ప్రధాన కార్యదర్శి పర్యటన విద్యార్థుల్లో కొత్త ఉత్సాహాన్ని నింపిందని పాఠశాల ప్రధానోపాధ్యాయుడు ఈ. గోపి, ఉపాధ్యాయులు, విద్యార్థులు ఆనందం వ్యక్తం చేశారు.
