Aadhaar | ఆధార్ సేవలను ప్రజలకు మరింత సులభంగా అందించేందుకు UIDAI తన అధికారిక వెబ్‌సైట్‌ను పూర్తిగా రీడిజైన్ చేసింది. ఆధార్‌కు సంబంధించిన సమాచారం, ఆన్‌లైన్ సేవలను సులువుగా పొందేలా కొత్త పోర్టల్‌ను రూపొందించింది. కొత్త వెబ్‌సైట్‌లో స్క్రీన్ రీడర్ సపోర్ట్, ఫాంట్ సైజ్‌ను మార్చుకునే అవకాశం, మెరుగైన కలర్ కాంట్రాస్ట్, సులభమైన కీబోర్డ్ నావిగేషన్ వంటి ఫీచర్లను అందుబాటులోకి తీసుకొచ్చారు. దీంతో వయోవృద్ధులు, దివ్యాంగులు సహా అన్ని వర్గాల ప్రజలు వెబ్‌సైట్‌ను సులభంగా ఉపయోగించుకునే అవకాశం ఉంటుంది.
13 భాషల్లో సేవలు.. త్వరలో 23 భాషలకు
ప్రస్తుతం UIDAI వెబ్‌సైట్ 13 భాషల్లో అందుబాటులో ఉంది. భవిష్యత్తులో ఈ సేవలను 23 భాషలకు విస్తరించేందుకు UIDAI చర్యలు చేపట్టింది. దీనివల్ల దేశంలోని వివిధ ప్రాంతాల ప్రజలు తమకు అనుకూలమైన భాషలో ఆధార్ సేవలను పొందవచ్చు. కొత్త పోర్టల్‌లో కెరీర్ పోర్టల్‌ను కూడా అందుబాటులోకి తీసుకొచ్చారు. దీంతో UIDAIలో ఉద్యోగ అవకాశాలను వెతికే అభ్యర్థులు సంబంధిత సమాచారాన్ని సులభంగా తెలుసుకోవచ్చు.
ఇంటి నుంచే ఆధార్ వివరాల అప్డేట్
కొత్త వెబ్‌సైట్ ద్వారా ఆధార్‌కు సంబంధించిన పలు సేవలను ఆన్‌లైన్‌లోనే పొందేలా సదుపాయాలను మెరుగుపరిచారు. మొబైల్ నంబర్, చిరునామా, పేరు వంటి వివరాలను అప్డేట్ చేసుకునే సేవలు అందుబాటులో ఉన్నాయి. దీంతో ప్రతి చిన్న పని కోసం ఆధార్ కేంద్రాలను సందర్శించాల్సిన అవసరం తగ్గుతుంది. అంతేకాదు కొత్త పోర్టల్‌లో సపోర్ట్ సేవలను కూడా అందుబాటులోకి తీసుకొచ్చారు. ఆధార్ సేవలకు సంబంధించి సందేహాలు ఎదురైతే అవసరమైన సమాచారాన్ని ఆన్‌లైన్‌లోనే తెలుసుకునే అవకాశం ఉంటుంది.
రేషన్ కోసం ఫింగర్‌ప్రింట్‌ ఇబ్బందులకు చెక్
రేషన్ షాపుల్లో ఆధార్ ఆధారిత బయోమెట్రిక్‌ ధృవీకరణలో భాగంగా ఇప్పటివరకు ప్రధానంగా వేలిముద్రలను ఉపయోగిస్తున్నారు. అయితే కొన్ని సందర్భాల్లో వేలిముద్రలు సరిగా గుర్తించకపోవడంతో లబ్ధిదారులు ఇబ్బందులు ఎదుర్కొంటున్నారు. ఈ సమస్యకు ప్రత్యామ్నాయంగా ఫేస్ ఆథెంటికేషన్ విధానాన్ని ఉపయోగించే అవకాశం కల్పించారు. ఇందులో లబ్ధిదారుడి ముఖాన్ని స్కాన్ చేసి ఆధార్ ధృవీకరణ చేయవచ్చు. దీంతో వేలిముద్రలు గుర్తించని సందర్భాల్లో కూడా రేషన్ పొందేందుకు ప్రత్యామ్నాయ మార్గం అందుబాటులోకి వస్తుంది. రాష్ట్ర ప్రభుత్వాలు తమ రేషన్ పంపిణీ వ్యవస్థలో ఈ ఫేస్ ఆథెంటికేషన్ విధానాన్ని ఉపయోగించుకోవచ్చు.
ఆధార్ కార్యాలయాల్లో టోకెన్ సిస్టమ్
ఆధార్ ప్రాంతీయ కార్యాలయాల్లో కూడా UIDAI కొత్త సదుపాయాన్ని తీసుకొచ్చింది. వినియోగదారుల కోసం టోకెన్ వ్యవస్థను అందుబాటులోకి తీసుకువచ్చింది. దీని ద్వారా తమ వంతు వచ్చే వరకు వేచి ఉండి, టోకెన్ నంబర్ ప్రకారం సేవలను పొందవచ్చు. మొత్తంగా చూస్తే కొత్త వెబ్‌సైట్, మెరుగైన ఆన్‌లైన్ సేవలు, ఫేస్ ఆథెంటికేషన్, టోకెన్ వ్యవస్థ వంటి మార్పులతో ఆధార్ సేవలను మరింత సులభతరం చేసేందుకు UIDAI చర్యలు చేపట్టింది.
Loading Tweet...
