వేములవాడ, అక్టోబర్ 6 (జనవాణి): తెలంగాణ రక్షణ సేన అధ్యక్షురాలు కల్వకుంట్ల కవిత వేములవాడలో పర్యటించారు. ఈ సందర్భంగా మాజీ మావోయిస్టులకు ఆమె కీలక పిలుపునిచ్చారు. అడవులను వీడి జనజీవన స్రవంతిలో కలిసిన మాజీ మావోయిస్టులు ప్రజాసేవలోకి రావాలని, తమ పార్టీలో చేరాలని ఆహ్వానించారు. వారి రాకతో పార్టీ మరింత బలోపేతం అవుతుందని కవిత ఆశాభావం వ్యక్తం చేశారు. 'అడవిని వదిలేసి వచ్చిన మాజీ మావోయిస్టులు ప్రజా జీవితంలోకి రండి.. మా పార్టీ మీకు మంచి ప్లాట్‌ఫామ్' అని ఆమె పేర్కొన్నారు. ప్రజల సమస్యలపై పోరాడేందుకు తమతో కలిసి పనిచేయాలని కోరారు.
రాజన్న ఆలయ నిర్మాణంపై కవిత అభ్యంతరం
పర్యటనలో భాగంగా వేములవాడ రాజన్న ఆలయంలో జరుగుతున్న అభివృద్ధి పనులను కవిత పరిశీలించారు. ఆలయ పునర్నిర్మాణంలో కాంక్రీట్‌ వినియోగించడాన్ని ఆమె తీవ్రంగా వ్యతిరేకించారు. ఆగమశాస్త్రం ప్రకారం కృష్ణశిలలతో ఆలయ నిర్మాణం చేపడితేనే అది వందల ఏళ్లపాటు నిలుస్తుందని పేర్కొన్నారు. చారిత్రక, ఆధ్యాత్మిక వారసత్వాన్ని కాపాడేలా ఆలయ నిర్మాణ పనులు చేపట్టాలని డిమాండ్ చేశారు. అలాగే భక్తులు సమర్పించిన గోవుల సంరక్షణపై కూడా కవిత ఆవేదన వ్యక్తం చేశారు. గోవులకు సరైన మేత, నీరు అందక అవి మృత్యువాత పడుతున్నాయని ఆరోపించారు. మరణించిన గోవులకు కనీసం హిందూ సంప్రదాయం ప్రకారం అంత్యక్రియలు కూడా నిర్వహించడం లేదని ఆవేదన వ్యక్తం చేశారు.
సాగునీటి పనులు చేపట్టాలని డిమాండ్
కాళేశ్వరం ప్రాజెక్టుకు అనుసంధానంగా సిరిసిల్ల–వేములవాడ ప్రాంతంలో సాగునీటి పనులు చేపట్టాలని కవిత కోరారు. ఈ ప్రాంత రైతులకు సాగునీటి సౌకర్యం మెరుగుపడేలా ప్రభుత్వం చర్యలు తీసుకోవాలని డిమాండ్ చేశారు. కాంగ్రెస్ ప్రభుత్వం దిశానిర్దేశం కోల్పోయిందని కవిత విమర్శించారు. ప్రభుత్వ వైఫల్యాల కారణంగానే ప్రజలు తమలాంటి కొత్త రాజకీయ పార్టీల వైపు చూస్తున్నారని అన్నారు. అంతకుముందు కవిత వేములవాడలోని శ్రీ భీమేశ్వర స్వామి ఆలయంలో ప్రత్యేక పూజలు నిర్వహించారు.
