పాలకుర్తి నియోజకవర్గంలోని పెద్దవంగర మండలం బాబోజి తండా గ్రామంలో అభివృద్ధి పనులను వేగవంతం చేస్తూ ఎమ్మెల్యే శ్రీమతి యశశ్విని రెడ్డి పలు అభివృద్ధి కార్యక్రమాలకు శంకుస్థాపన చేశారు. గ్రామాల్లో విద్యా సంస్థల అభివృద్ధి, మౌలిక సదుపాయాల కల్పనకు రాష్ట్ర ప్రభుత్వం అత్యంత ప్రాధాన్యత ఇస్తోందని ఆమె పేర్కొన్నారు.
ఈ సందర్భంగా ఎంపీపీఎస్ (MPPS) పాఠశాలకు రూ.5 లక్షల వ్యయంతో ప్రహరీ గోడ నిర్మాణం, అలాగే రూ.4 లక్షలతో సీసీ రోడ్డు నిర్మాణ పనులకు ఎమ్మెల్యే భూమిపూజ నిర్వహించి పనులను ప్రారంభించారు. అనంతరం మాట్లాడుతూ... ప్రభుత్వ పాఠశాలల్లో విద్యార్థులకు సురక్షితమైన, మెరుగైన విద్యా వాతావరణం కల్పించడమే ప్రభుత్వ లక్ష్యమని యశశ్విని రెడ్డి తెలిపారు. గ్రామాల్లో ప్రజలకు అవసరమైన మౌలిక వసతులను దశలవారీగా అభివృద్ధి చేస్తూ జీవన ప్రమాణాలను మరింత మెరుగుపరిచే దిశగా ప్రభుత్వం కృషి చేస్తోందని చెప్పారు.
ప్రతి గ్రామం అభివృద్ధి చెందాలన్నదే ప్రభుత్వ సంకల్పమని పేర్కొన్న ఆమె... రహదారులు, పాఠశాలలు, తాగునీరు, పారిశుధ్యం వంటి ప్రాథమిక సౌకర్యాలను మరింత బలోపేతం చేస్తామని హామీ ఇచ్చారు. ఈ కార్యక్రమంలో స్థానిక సర్పంచ్, ప్రజాప్రతినిధులు, కాంగ్రెస్ పార్టీ నాయకులు, సంబంధిత శాఖల అధికారులు, పాఠశాల ఉపాధ్యాయులు, గ్రామ పెద్దలు, మహిళలు, యువత, గ్రామస్థులు పాల్గొన్నారు.
