మూసాపేట–కూకట్‌పల్లి మధ్య ఉన్న సుమారు రూ.600 కోట్ల విలువైన ప్రభుత్వ భూమిని ఆక్రమణల నుంచి రక్షించాలని స్థానికులు హైడ్రా ప్రజావాణిలో ఫిర్యాదు చేశారు. హైదరాబాద్‌లో సోమవారం నిర్వహించిన హైడ్రా ప్రజావాణిలో భూ ఆక్రమణలు, ప్రభుత్వ స్థలాల పరిరక్షణ, పార్కులు, చెరువులు, ప్రజా స్థలాల రక్షణకు సంబంధించిన మొత్తం 42 ఫిర్యాదులు నమోదయ్యాయి. వీటిని హైడ్రా అదనపు కమిషనర్ డి. ఆనంద్ కుమార్ పరిశీలించి సంబంధిత శాఖల అధికారులకు పరిష్కారం కోసం అప్పగించారు.
రూ.600 కోట్ల ప్రభుత్వ భూమిని కాపాడాలని వినతి
మేడ్చల్–మల్కాజిగిరి జిల్లా కూకట్‌పల్లి–మూసాపేట గ్రామాల మధ్య ఉన్న 10.18 ఎకరాల ప్రభుత్వ భూమిలో భాగంగా ప్రభుత్వ పాఠశాలలు నిర్మించేందుకు కేటాయించిన రెండు ఎకరాలు సహా మొత్తం 6.18 ఎకరాల భూమిపై ఆక్రమణలు జరుగుతున్నాయని స్థానికులు ఫిర్యాదు చేశారు.
ఈ భూమిలో ఇప్పటికే జలమండలికి నాలుగు ఎకరాలు కేటాయించగా, ప్రభుత్వ పాఠశాలలు నిర్మించాల్సిన స్థలంలో నిర్మాణాలు లేకపోవడంతో పలువురు షెడ్లు వేసి ఆక్రమణలకు పాల్పడుతున్నారని పేర్కొన్నారు. మొత్తం భూమిని పరిరక్షించి ఫెన్సింగ్ ఏర్పాటు చేయాలని హైడ్రాను కోరారు.
దుండిగల్‌లో కాలుష్యంపై ఫిర్యాదు
మేడ్చల్–మల్కాజిగిరి జిల్లా దుండిగల్ గ్రామంలోని సర్వే నంబర్ 419లో నిర్వహిస్తున్న రెడీమిక్స్ కాంక్రీట్ కేంద్రం వల్ల తీవ్ర వాయు, శబ్ద కాలుష్యం ఏర్పడుతోందని మరో ఫిర్యాదు అందింది. సమీపంలో పాఠశాలలు, నివాసాలు ఉండటంతో వెంటనే చర్యలు తీసుకోవాలని స్థానికులు కోరారు.
కుంట్లూరులో భూదాన్ భూముల పరిరక్షణ
రంగారెడ్డి జిల్లా అబ్దుల్లాపూర్‌మెట్ మండలం కుంట్లూరు గ్రామంలోని సర్వే నంబర్లు 215 నుంచి 224 వరకు ఉన్న భూదాన్, ప్రభుత్వ భూములపై ఆక్రమణలు జరుగుతున్నాయని గ్రామస్థులు ఫిర్యాదు చేశారు. లేఅవుట్‌లో ప్లాట్లు కొనుగోలు చేసిన వారి హక్కులను కాపాడడంతో పాటు ప్రభుత్వ భూమిని కూడా రక్షించాలని విజ్ఞప్తి చేశారు.
కొల్లూరులో రహదారులు, పార్కుల ఆక్రమణలు
సంగారెడ్డి జిల్లా కొల్లూరు గ్రామంలోని భవానీనగర్ లేఅవుట్‌లో రహదారులు, పార్కుల కోసం కేటాయించిన స్థలాలను ఆక్రమిస్తున్నారని ప్లాట్ యజమానులు ఫిర్యాదు చేశారు. లేఅవుట్‌లోని ప్రజా సౌకర్యాల స్థలాలను పరిరక్షించాలని కోరారు.
మన్‌సూరాబాద్‌లో ఓపెన్ స్పేస్‌పై నిర్మాణాలు
సరూర్‌నగర్ మండలం మన్‌సూరాబాద్‌లో హుడా లేఅవుట్ ప్రకారం ప్రజా అవసరాల కోసం కేటాయించిన ఓపెన్ స్పేస్‌ను ఆక్రమించి నిర్మాణాలు చేపట్టారని స్థానికులు ఫిర్యాదు చేశారు. అక్రమ నిర్మాణాలను తొలగించి ప్రజా వినియోగానికి అందుబాటులోకి తీసుకురావాలని విజ్ఞప్తి చేశారు.
మహేశ్వరంలో చెరువు పరిధిపై వివాదం
మహేశ్వరం మండలం సర్దార్‌నగర్‌లోని పెద్ద చెరువు పరిసర ప్రాంతాల్లో ఎఫ్‌టీఎల్ పరిధిలో లేని భూముల్లో కృత్రిమంగా నీటిని నిల్వ చేయడం వల్ల భూములను వినియోగించుకోలేకపోతున్నామని బాధితులు హైడ్రా దృష్టికి తీసుకువచ్చారు. సమస్యను పరిశీలించి పరిష్కరించాలని కోరారు.
నార్సింగిలో పార్కుల స్థలాలపై ఫిర్యాదు
నార్సింగి పరిధిలోని అరుణోదయ సొసైటీ హుడా లేఅవుట్‌లో పార్కుల కోసం కేటాయించిన సుమారు 14,231 చదరపు గజాల స్థలంలో అనధికార నిర్మాణాలు జరుగుతున్నాయని కాలనీవాసులు ఆరోపించారు. అక్రమ రిజిస్ట్రేషన్లు, అనుమతులను రద్దు చేసి పార్కుల స్థలాలను పరిరక్షించాలని హైడ్రా ప్రజావాణిలో విజ్ఞప్తి చేశారు.
