హైదరాబాద్ జులై 27: బీఆర్‌ఎస్ అధినేత, తెలంగాణ తొలి ముఖ్యమంత్రి కల్వకుంట్ల చంద్రశేఖర్‌రావు (కేసీఆర్) సోమవారం హైదరాబాద్‌లోని యశోద ఆస్పత్రికి చేరుకుని, తీవ్ర అస్వస్థతతో చికిత్స పొందుతున్న నర్సంపేట మాజీ ఎమ్మెల్యే పెద్ది సుదర్శన్‌రెడ్డి ఆరోగ్య పరిస్థితిపై ఆరా తీశారు.
ఆస్పత్రిలో వైద్యులను కలిసి సుదర్శన్‌రెడ్డి ఆరోగ్య పరిస్థితి, ప్రస్తుతం అందుతున్న చికిత్స, కోలుకునే అవకాశాలపై కేసీఆర్ వివరాలు తెలుసుకున్నారు. వైద్యులు అందిస్తున్న చికిత్సపై మాట్లాడి అవసరమైన అన్ని వైద్య సేవలు అందించాలని సూచించినట్లు సమాచారం.
అనంతరం ఆస్పత్రిలో ఉన్న పెద్ది సుదర్శన్‌రెడ్డి కుటుంబ సభ్యులను కలిసిన కేసీఆర్, వారికి ధైర్యం చెప్పారు. ఆందోళన చెందవద్దని, పార్టీ తరఫున అన్ని విధాలా అండగా ఉంటామని భరోసా కల్పించారు. సుదర్శన్‌రెడ్డి త్వరగా కోలుకుని మళ్లీ ప్రజల మధ్యకు రావాలని ఆకాంక్షించారు.
కేసీఆర్ వెంట బీఆర్‌ఎస్ వర్కింగ్ ప్రెసిడెంట్ కేటీఆర్, బీఆర్‌ఎస్‌ఎల్పీ డిప్యూటీ ఫ్లోర్ లీడర్ హరీశ్‌రావు, మాజీ ఎంపీ జోగినపల్లి సంతోష్ కుమార్, మాజీ మంత్రి తలసాని శ్రీనివాస్ యాదవ్, ఎమ్మెల్యే పల్లా రాజేశ్వర్‌రెడ్డితో పాటు పలువురు బీఆర్‌ఎస్ నాయకులు ఉన్నారు.
మరోవైపు, పెద్ది సుదర్శన్‌రెడ్డి ఆరోగ్య పరిస్థితిని యశోద ఆస్పత్రి నిపుణుల వైద్య బృందం నిరంతరం పర్యవేక్షిస్తోంది. ఆయన త్వరగా కోలుకోవాలని బీఆర్‌ఎస్ నాయకులు, కార్యకర్తలు, అభిమానులు ప్రార్థిస్తున్నారు.
