సూర్యాపేట August 26(జనవాణి): సూర్యాపేట జిల్లాలో బుధవారం తెల్లవారుజామున ఘోర రోడ్డు ప్రమాదం చోటుచేసుకుంది. కోదాడ మండలం ద్వారకుంట సమీపంలో హైదరాబాద్‌ నుంచి ఏలూరు వెళ్తున్న ఫ్రెష్ బస్ ట్రావెల్స్ బస్సు రోడ్డుపై ఆగి ఉన్న కంటైనర్‌ను బలంగా ఢీకొట్టింది.
ఐదుగురు మృతి చెందగా, 20 మందికి తీవ్ర గాయాలు
ప్రమాదంలో బస్సులో ఉన్న ఐదుగురు ప్రయాణికులు మృతి చెందినట్లు సమాచారం. మరో 20 మంది తీవ్రంగా గాయపడినట్లు తెలుస్తోంది. ఢీకొట్టిన సమయంలో బస్సు ముందుభాగం తీవ్రంగా దెబ్బతినడంతో పలువురు ప్రయాణికులు బస్సులోనే ఇరుక్కుపోయారు.
బస్సులో ఇరుక్కున్న ప్రయాణికుల ఆర్తనాదాలతో ఘటనాస్థలం విషాదకరంగా మారింది. సమాచారం అందుకున్న పోలీసులు, సహాయక సిబ్బంది వెంటనే ఘటనాస్థలికి చేరుకుని సహాయక చర్యలు చేపట్టారు. బస్సులో చిక్కుకున్న వారిని బయటకు తీసేందుకు ప్రయత్నాలు కొనసాగించారు.
తీవ్రంగా గాయపడిన వారిని చికిత్స నిమిత్తం సమీపంలోని ఆసుపత్రులకు తరలించినట్లు సమాచారం. ప్రమాదానికి గల కారణాలపై పోలీసులు దర్యాప్తు చేపట్టారు. మృతులు, క్షతగాత్రుల పూర్తి వివరాలు తెలియాల్సి ఉంది.
