హైదరాబాద్,సెప్టెంబర్ 18 (జనవాణి): హైదరాబాద్‌లోని దుర్గం చెరువు పరిసరాల్లో భారీ కొండచిలువ ప్రత్యక్షమవడంతో అక్కడి ఐటీ ఉద్యోగుల్లో ఒక్కసారిగా కలకలం రేగింది. గురువారం (సెప్టెంబర్ 17న) సాయంత్రం ఓ ఐటీ కంపెనీ సమీపంలోని వీధిలో పైథాన్ కనిపించడంతో ఉద్యోగులు, స్థానికులు భయాందోళనకు గురయ్యారు.
అయితే ఇంతలో అక్కడికి వచ్చిన ఓ ఐటీ ఉద్యోగి ఏమాత్రం భయపడకుండా కొండచిలువను చాకచక్యంగా పట్టుకున్నాడు. అనంతరం దాన్ని తన చేతికి చుట్టుకుని నడుచుకుంటూ వెళ్లడం అక్కడున్న వారిని ఆశ్చర్యానికి గురిచేసింది.
ఆ తర్వాత తన మిత్రుడి సహాయంతో కొండచిలువను బైక్‌పై తీసుకెళ్లి సురక్షిత ప్రాంతంలో వదిలేసినట్లు తెలుస్తోంది. ఇందుకు సంబంధించిన దృశ్యాలు సోషల్ మీడియాలో వైరల్‌గా మారాయి. వీడియో చూసిన నెటిజన్లు ఆ ఐటీ ఉద్యోగి ధైర్యంపై భిన్న రకాలుగా స్పందిస్తున్నారు.
