తెలంగాణ కాంగ్రెస్ రాజకీయాల్లో మరోసారి ముఖ్యమంత్రి పీఠంపై చర్చ మొదలైంది. టీపీసీసీ వర్కింగ్ ప్రెసిడెంట్ జగ్గారెడ్డి చేసిన తాజా వ్యాఖ్యలు ఇప్పుడు రాజకీయ వర్గాల్లో తీవ్ర చర్చకు దారితీశాయి.
జగ్గారెడ్డి మాట్లాడుతూ ప్రస్తుతం రేవంత్ రెడ్డి ముఖ్యమంత్రిగా సమర్థంగా పాలన కొనసాగిస్తున్నారని, ఆయన మరో ఐదేళ్లు ముఖ్యమంత్రిగా కొనసాగాలని తాను కోరుకుంటున్నానని చెప్పారు. అయితే అదే సమయంలో మంత్రి ఉత్తమ్ కుమార్ రెడ్డి ముఖ్యమంత్రి పదవి కోసం ఎదురుచూస్తున్నారని వ్యాఖ్యానించడం రాజకీయంగా హాట్ టాపిక్‌గా మారింది. ఇదే సమయంలో తనకు రాజకీయంగా ఒక పెద్ద కోరిక ఉందని, దానిని నవంబర్ నెలలో కార్యకర్తల సమక్షంలో వెల్లడిస్తానని జగ్గారెడ్డి తెలిపారు. ప్రస్తుతం ఆ లక్ష్యంపైనే పూర్తిగా దృష్టి పెట్టానని చెప్పారు. అంతేకాదు, పార్టీలో ఎవరిపైనా అసంతృప్తి ఉంటే మీడియా ముందు మాట్లాడనని, నేరుగా రాహుల్ గాంధీకి వెళ్లి చెబుతానని స్పష్టం చేశారు. మూడు సంవత్సరాల క్రితం రాహుల్ గాంధీ ఇచ్చిన సూచన మేరకు పార్టీ అంతర్గత విషయాలను బయటకు చెప్పడం లేదని వెల్లడించారు. పార్టీ అంతర్గత వ్యవహారాలు బయటకు రావడం తనకు ఇష్టం లేదని, అందుకే పీఏసీ సమావేశాలకు కూడా దూరంగా ఉంటున్నానని తెలిపారు. ప్రజాసేవే తన ప్రధాన లక్ష్యమని, కుటుంబం కంటే రాజకీయాలు, ప్రజలకే ప్రాధాన్యం ఇస్తానని పేర్కొన్నారు.
మరోవైపు ముఖ్యమంత్రి రేవంత్ రెడ్డి ఇప్పటికే పలుమార్లు 2034 వరకు తానే ముఖ్యమంత్రిగా కొనసాగుతానని ప్రకటించారు. తెలంగాణలో కాంగ్రెస్ పార్టీ ఇంకా చాలా సంవత్సరాలు అధికారంలో ఉంటుందని ధీమా వ్యక్తం చేశారు. ఇలాంటి సమయంలో ఉత్తమ్ కుమార్ రెడ్డి సీఎం రేసులో ఉన్నారని జగ్గారెడ్డి చేసిన వ్యాఖ్యలు కాంగ్రెస్‌లో కొత్త రాజకీయ చర్చకు తెరలేపాయి.
అయితే, ఈ వ్యాఖ్యలపై మంత్రి ఉత్తమ్ కుమార్ రెడ్డి లేదా కాంగ్రెస్ అధిష్టానం నుంచి ఇప్పటివరకు అధికారిక స్పందన వెలువడలేదు. దీంతో జగ్గారెడ్డి వ్యాఖ్యలు రాజకీయ వర్గాల్లో చర్చనీయాంశంగా మారాయి.
