న్యూఢిల్లీ, జులై 28: దేశంలోని ప్రముఖ సోషల్ మీడియా సంస్థలకు కేంద్ర ప్రభుత్వం కీలక నోటీసులు జారీ చేసింది. ఫేస్‌బుక్, ఇన్‌స్టాగ్రామ్, ఎక్స్, గూగుల్, వాట్సాప్, స్నాప్‌చాట్ వంటి సంస్థలను డేటా ప్రైవసీ, వినియోగదారుల భద్రత, నిబంధనల అమలుపై వివరణ ఇవ్వాలని ఆదేశించింది.
ఈ అంశాలపై చర్చించేందుకు ఆగస్టు 3, 2026న సాయంత్రం 4 గంటలకు పార్లమెంటరీ స్టాండింగ్ కమిటీ సమావేశం నిర్వహించనుంది. ఈ సమావేశానికి ఆయా సోషల్ మీడియా సంస్థల ప్రతినిధులు హాజరు కావాల్సి ఉంటుంది.
పార్లమెంటరీ స్టాండింగ్ కమిటీ చైర్మన్, బీజేపీ ఎంపీ నిశికాంత్ దూబే ఈ విషయాన్ని సోషల్ మీడియా వేదికగా వెల్లడించారు. మహిళలు, చిన్నారులు, రైతులు, కార్మికులు సహా వినియోగదారుల భద్రత కోసం అమలు చేస్తున్న విధానాలు, డేటా గోప్యతకు తీసుకుంటున్న చర్యలపై సంస్థలు వివరాలు ఇవ్వాలని ఆయన తెలిపారు.
ఇటీవలి కాలంలో సోషల్ మీడియాలో తప్పుడు సమాచారం, రెచ్చగొట్టే పోస్టులు, వ్యక్తిగత గోప్యతకు భంగం కలిగించే కంటెంట్‌పై విమర్శలు పెరుగుతున్న నేపథ్యంలో కేంద్రం ఈ చర్యలు చేపట్టినట్లు సమాచారం.
ఆగస్టు 3న జరిగే సమావేశంలో సోషల్ మీడియా సంస్థలకు కొత్త మార్గదర్శకాలు, మరింత కఠిన నిబంధనలపై చర్చ జరిగే అవకాశం ఉందని తెలుస్తోంది. ఈ సమావేశం తర్వాత కేంద్ర ప్రభుత్వం తీసుకునే నిర్ణయాలు సోషల్ మీడియా వినియోగంపై ప్రభావం చూపే అవకాశముందని విశ్లేషకులు భావిస్తున్నారు.
