మోర్బీ (గుజరాత్), ఆగస్టు 7 (జనవాణి): గుజరాత్‌లోని మోర్బీ జిల్లాలో ఓ బావిలో నీరు సముద్ర అలల్లా ఊగుతూ కనిపించడం స్థానికులను ఆశ్చర్యానికి గురిచేసింది. మోర్బీ జిల్లా వీర్‌పర్దా గ్రామానికి చెందిన ఓ రైతు పొలంలోని బావిలో ఈ వింత ఘటన చోటుచేసుకుంది. ప్రస్తుతం ఈ వీడియో సోషల్ మీడియాలో వైరల్ అవుతోంది.
మూడు నెలల క్రితం తవ్విన ఈ బావి.. ఈ ఏడాది కురిసిన భారీ వర్షాలతో పూర్తిగా నీటితో నిండింది. అయితే గత ఆదివారం నుంచి బావిలోని నీరు ఒక్కసారిగా మసకబారడంతో పాటు అలల మాదిరిగా నిరంతరం కదలడం ప్రారంభమైంది. బావిలో ఎలాంటి వస్తువు పడకపోయినా నీరు నిరంతరం ఊగుతుండటంతో గ్రామస్థులు ఆశ్చర్యపోతున్నారు.
ఈ ఘటనపై సమాచారం అందుకున్న జిల్లా అధికారులు, భూగర్భ శాస్త్ర నిపుణులు బావిని పరిశీలించారు. గత 8 నుంచి 10 రోజులుగా మోర్బీ జిల్లాలో ఎలాంటి భూకంపం లేదా భూగర్భ ప్రకంపనలు నమోదుకాలేదని అధికారులు తెలిపారు.
ప్రాథమిక అంచనా ప్రకారం భూగర్భ శిలల మధ్య చిక్కుకున్న వాయువుపై వర్షపు నీటి ఒత్తిడి పెరగడం వల్ల ఈ కదలికలు ఏర్పడి ఉండొచ్చని జిల్లా జియాలజిస్టులు భావిస్తున్నారు. అయితే ఇదే అసలు కారణమా? లేదా మరేదైనా భూగర్భ ప్రక్రియ వల్ల ఈ పరిస్థితి ఏర్పడిందా? అనే విషయాన్ని నిర్ధారించేందుకు భూగర్భ జల పరిశోధనా సంస్థ (GWRI) నిపుణులతో ప్రత్యేక సాంకేతిక విచారణ చేపట్టాలని జిల్లా యంత్రాంగం నిర్ణయించింది.
Loading Tweet...
