#Telangana Assembly

రాబోయే తెలంగాణ అసెంబ్లీ ఎన్నికల్లో బీజేపీతో ఎట్టి పరిస్థితుల్లోనూ పొత్తు ఉండదని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ స్పష్టం చేశారు. గత 26 ఏళ్లలో బీజేపీతో బీఆర్‌ఎస్‌ ఒక్కసారి కూడా పొత్తు పెట్టుకోలేదని తెలిపారు. తెలంగాణలో మరోసారి బీఆర్‌ఎస్‌ ప్రభుత్వం ఏర్పడి, కేసీఆర్‌ ముఖ్యమంత్రి అవుతారని ధీమా వ్యక్తం చేశారు.

దానం నాగేందర్ అనర్హత వ్యవహారంలో సుప్రీంకోర్టు కీలక నిర్ణయం వెలువరించింది. సీజేఐ జస్టిస్ సూర్యకాంత్ నేతృత్వంలోని త్రిసభ్య ధర్మాసనం ఆయన పిటిషన్‌ను కొట్టివేసింది. మరో పార్టీ బీ-ఫారమ్‌పై ఎన్నికల్లో పోటీ చేయడం ద్వారా పార్టీని వీడినట్లుగా పరిగణించవచ్చని స్పష్టం చేసింది. తిరిగి సొంత పార్టీలో చేరినా చట్టసభ సభ్యత్వంపై పడిన అనర్హత స్వయంచాలకంగా తొలగిపోదని పేర్కొంది.

ఖైరతాబాద్ ఎమ్మెల్యే దానం నాగేందర్‌కు సంబంధించిన అనర్హత కేసు మరో కీలక మలుపు తిరిగింది. తెలంగాణ హైకోర్టు తనను ఎమ్మెల్యేగా అనర్హుడిగా ప్రకటిస్తూ ఇచ్చిన తీర్పును సవాలు చేస్తూ దానం నాగేందర్ దాఖలు చేసిన పిటిషన్‌పై విచారణకు సుప్రీం కోర్టు అంగీకరించింది. ఈ పిటిషన్‌ను బుధవారం విచారణ జాబితాలో చేర్చేందుకు ప్రధాన న్యాయమూర్తి జస్టిస్ సూర్యకాంత్ అంగీకరించారు.

ఖైరతాబాద్‌ ఎమ్మెల్యే దానం నాగేందర్‌పై అనర్హత వేటు వేస్తూ తెలంగాణ హైకోర్టు ఇచ్చిన తీర్పుపై ఆయన స్పందించారు. తీర్పును స్వాగతిస్తున్నానని, సుప్రీంకోర్టును ఆశ్రయించే ఆలోచన లేదని స్పష్టం చేశారు. ఖైరతాబాద్‌ ఉపఎన్నికలో పోటీ చేసేందుకు సిద్ధంగా ఉన్నానని, మళ్లీ విజయం సాధిస్తానని ధీమా వ్యక్తం చేశారు.

తెలంగాణ రాజకీయాల్లో కీలక పరిణామం చోటుచేసుకుంది. ఖైరతాబాద్ ఎమ్మెల్యే దానం నాగేందర్‌పై తెలంగాణ హైకోర్టు అనర్హత వేటు వేసింది. బీఆర్‌ఎస్‌ తరఫున ఎమ్మెల్యేగా గెలిచి కాంగ్రెస్‌లో చేరడంతో పాటు 2024 లోక్‌సభ ఎన్నికల్లో కాంగ్రెస్ అభ్యర్థిగా పోటీ చేసిన అంశాన్ని పరిగణనలోకి తీసుకున్న న్యాయస్థానం.. స్పీకర్‌ నిర్ణయాన్ని కొట్టివేసింది.

ఖైరతాబాద్ ఎమ్మెల్యే దానం నాగేందర్‌కు తెలంగాణ హైకోర్టులో ఎదురుదెబ్బ తగిలింది. పార్టీ ఫిరాయింపుల వ్యవహారంలో ఆయనపై అనర్హత వేటు వేస్తూ హైకోర్టు కీలక తీర్పు వెలువరించింది. అనర్హత పిటిషన్లను కొట్టివేస్తూ అసెంబ్లీ స్పీకర్ గడ్డం ప్రసాద్ తీసుకున్న నిర్ణయాన్ని హైకోర్టు రద్దు చేసింది.

ఇందిరమ్మ ఇళ్ల కేటాయింపులో పారదర్శకత లోపించిందని ఖైరతాబాద్ ఎమ్మెల్యే దానం నాగేందర్ ఆరోపించారు. తన నియోజకవర్గానికి కేటాయించిన ఇళ్లను ఇతర నియోజకవర్గాల వారికి ఇచ్చారని శాసనసభలో జీరో అవర్‌లో ప్రస్తావించారు. ఈ విషయాన్ని మంత్రికి చెబితే ‘కూల్ కూల్’ అంటున్నారని, ప్రభుత్వ పెద్దలు కూల్‌గా ఉండటం వల్లే పరిస్థితి ఇక్కడిదాకా వచ్చిందని విమర్శించారు.

కేసీఆర్ కుటుంబ భూములపై తెలంగాణ అసెంబ్లీలో సీఎం రేవంత్ రెడ్డి చేసిన వ్యాఖ్యలపై బీఆర్ఎస్ వర్కింగ్ ప్రెసిడెంట్ కేటీఆర్ తీవ్రంగా స్పందించారు. గతంలో కేసీఆర్ ఫామ్‌హౌస్‌ను 1,000 ఎకరాలుగా పేర్కొన్న రేవంత్.. ఇప్పుడు కేసీఆర్ దంపతులకు 67.13 ఎకరాలు ఉన్నట్లు సభలో చెప్పడాన్ని కేటీఆర్ ప్రశ్నించారు. తమ ఆస్తులపై, ప్రభుత్వ పెద్దల ఆస్తులపై హైకోర్టు లేదా సుప్రీంకోర్టు జడ్జితో విచారణ జరిపించాలని సవాల్ చేశారు. ఇదే సమయంలో ఎర్రవల్లి ఫామ్‌హౌస్ పరిధిలోని భూములపై 30 రోజుల్లో నివేదిక ఇవ్వాలని సీఎం రేవంత్ రెడ్డి అధికారులను ఆదేశించారు.

తెలంగాణ అసెంబ్లీలో కల్వకుంట్ల కుటుంబానికి చెందిన భూములపై సీఎం రేవంత్ రెడ్డి చేసిన వ్యాఖ్యలకు టీఆర్ఎస్ అధ్యక్షురాలు కల్వకుంట్ల కవిత స్పందించారు. తన ఎన్నికల అఫిడవిట్‌లో పేర్కొన్న ఆస్తుల కంటే ఒక్క గజం భూమి ఎక్కువగా ఉన్నా ప్రభుత్వానికి సరెండర్ చేస్తానని స్పష్టం చేశారు.

తెలంగాణ అసెంబ్లీ వేదికగా మాజీ సీఎం కేసీఆర్, కల్వకుంట్ల కుటుంబంపై సీఎం రేవంత్ రెడ్డి తీవ్ర ఆరోపణలు చేశారు. తెలంగాణ ఉద్యమం, ధరణిని అడ్డుపెట్టుకుని భూముల వ్యవహారాల్లో అక్రమాలకు పాల్పడ్డారని ఆరోపించారు. కేసీఆర్ కుటుంబ సభ్యుల పేర్లపై ఉన్నట్లు పేర్కొన్న భూముల వివరాలను సభలో వెల్లడించారు. ఎర్రవెల్లిలోని కేసీఆర్ ఫాంహౌస్ భూములపై 30 రోజుల్లో విచారణ పూర్తి చేసి నివేదిక ఇవ్వాలని అధికారులను ఆదేశించారు.

తెలంగాణ అసెంబ్లీలో ప్రధాన ప్రతిపక్షంపై ముఖ్యమంత్రి రేవంత్ రెడ్డి తీవ్రస్థాయిలో విమర్శలు చేశారు. గత ప్రభుత్వ హయాంలో జరిగిన తప్పులు, ప్రభుత్వ భూములు, ఫీజు రీయింబర్స్‌మెంట్, కరవు తదితర అంశాలు సభలో చర్చకు వస్తాయనే ఉద్దేశంతోనే ప్రతిపక్షం సభా కార్యక్రమాలను అడ్డుకునేలా వ్యవహరించిందని ఆరోపించారు. కొంతమందిని చరిత్ర ఎప్పటికీ క్షమించదని వ్యాఖ్యానించారు.

రియల్‌ ఎస్టేట్‌ ఆరోపణలపై తెలంగాణ సీఎం రేవంత్‌రెడ్డి అసెంబ్లీలో ఆసక్తికర వ్యాఖ్యలు చేశారు. డబ్బే తన లక్ష్యమైతే రాజకీయాల్లోకి రావాల్సిన అవసరం లేదని, రియల్‌ ఎస్టేట్‌ రంగంలోనే కొనసాగి ఉంటే వేల కోట్ల సంపద సంపాదించే అవకాశం ఉండేదని అన్నారు. కోకాపేట, పుప్పాలగూడ, మంచిరేవుల ప్రాంతాలు భవిష్యత్‌లో విలువైనవిగా మారతాయని తాను ముందుగానే గుర్తించినట్లు తెలిపారు.

తెలంగాణలో గత ప్రభుత్వం తీసుకొచ్చిన ధరణి పోర్టల్‌ పేదలు, రైతులు, భూయజమానులకు తీవ్ర ఇబ్బందులు తెచ్చిపెట్టిందని రాష్ట్ర రెవెన్యూ శాఖ మంత్రి పొంగులేటి శ్రీనివాస్‌రెడ్డి ఆరోపించారు. ధరణి సమస్యలను అప్పటి మంత్రులు, ఎమ్మెల్యేలు పలుమార్లు మాజీ సీఎం కేసీఆర్‌ దృష్టికి తీసుకెళ్లినా పరిష్కారం లభించలేదని విమర్శించారు. ధరణిలోని సాంకేతిక లోపాలు, ‘సీక్రెట్‌ లాక్‌’ల వ్యవస్థ, భూ రికార్డుల సమస్యలపై శాసనసభలో ఆయన తీవ్ర వ్యాఖ్యలు చేశారు.

తెలంగాణలో పాలిటెక్నిక్ కాలేజీలను ప్రైవేటీకరిస్తారనే ప్రచారాన్ని సీఎం రేవంత్ రెడ్డి తీవ్రంగా ఖండించారు. పాలిటెక్నిక్ కాలేజీలు 100 శాతం ప్రభుత్వ ఆధీనంలోనే కొనసాగుతాయని స్పష్టం చేశారు. సాంకేతిక విద్యను ఆధునిక నైపుణ్యాలతో అనుసంధానించేందుకే సంస్కరణలు చేపడుతున్నామని తెలిపారు. రాష్ట్రంలోని 59 పాలిటెక్నిక్‌లను టాటా టెక్నాలజీస్ సహకారంతో రూ.4 వేల కోట్లతో ఆధునీకరిస్తున్నట్లు వెల్లడించారు.

కనీస వేతనాల చెల్లింపులో తెలంగాణ దేశానికి ఆదర్శంగా నిలిచిందని కార్మిక శాఖ మంత్రి వివేక్ వెంకటస్వామి తెలిపారు. సింగరేణిలో పనిచేస్తున్న కాంట్రాక్ట్ కార్మికుల వేతనాల పెంపుపై ప్రభుత్వం పరిశీలన చేస్తోందన్నారు. ఔట్‌సోర్సింగ్ ఉద్యోగుల సమస్యల పరిష్కారానికి నదీమ్ కమిటీ నివేదిక వచ్చిన తర్వాత చర్యలు తీసుకుంటామని వెల్లడించారు.

దళిత స్పీకర్ గడ్డం ప్రసాద్ కుమార్‌కు అవమానం జరిగిందంటూ సీఎం రేవంత్ రెడ్డి పదేపదే వ్యాఖ్యానించడంపై మాజీ మంత్రి, సనత్‌నగర్ ఎమ్మెల్యే తలసాని శ్రీనివాస్ యాదవ్ తీవ్రంగా స్పందించారు. దళితులపై రేవంత్‌కు అంత ప్రేమ ఉంటే గడ్డం ప్రసాద్ కుమార్‌ను ముఖ్యమంత్రిగా చేయాలని డిమాండ్ చేశారు.

తెలంగాణ ప్రభుత్వం ఉద్యోగుల కుటుంబాలకు ఆర్థిక భరోసా కల్పించేలా కీలక నిర్ణయం తీసుకుంది. ప్రభుత్వ ఉద్యోగులు, పెన్షనర్లు, కాంట్రాక్ట్‌, ఔట్‌సోర్సింగ్‌ సిబ్బందికి రూ.కోటి వరకు ప్రమాద బీమా కవరేజీ కల్పిస్తున్నట్లు డిప్యూటీ సీఎం మల్లు భట్టి విక్రమార్క అసెంబ్లీలో వెల్లడించారు. ఉద్యోగి ప్రమాదవశాత్తు మరణిస్తే బీమాతో పాటు ఇతర ప్రయోజనాలు కలిపి కుటుంబానికి రూ.1.20 కోట్ల వరకు లబ్ధి చేకూరేలా చర్యలు తీసుకున్నట్లు తెలిపారు.

తెలంగాణ అసెంబ్లీ వద్ద విధుల్లో ఉన్న మహిళా పోలీసులతో దురుసుగా ప్రవర్తించారన్న ఆరోపణలపై బీఆర్ఎస్ వర్కింగ్ ప్రెసిడెంట్ కేటీఆర్, మాజీ మంత్రి టి. హరీశ్‌రావు సహా నలుగురు నేతలపై సైఫాబాద్ పోలీసులు కేసు నమోదు చేశారు. ఓ మహిళా కానిస్టేబుల్ ఇచ్చిన ఫిర్యాదు మేరకు ఎఫ్‌ఐఆర్ నమోదు చేసి దర్యాప్తు చేపట్టారు.

తెలంగాణ శాసనమండలిలో ప్రధాన ప్రతిపక్షం బీఆర్ఎస్ సభ్యులు ఆందోళనకు దిగారు. 22ఎపై చర్చకు అనుమతించాలంటూ వాయిదా తీర్మానం ప్రతిపాదించగా.. మండలి చైర్మన్ తిరస్కరించారు. దీంతో బీఆర్ఎస్ ఎమ్మెల్సీలు పోడియం వద్దకు చేరుకుని ప్రభుత్వానికి వ్యతిరేకంగా నినాదాలు చేస్తూ నిరసన తెలిపారు. అనంతరం మండలి నుంచి వాకౌట్ చేశారు.

తెలంగాణ అసెంబ్లీ సమావేశాల్లో అధికార కాంగ్రెస్, బీఆర్‌ఎస్ మధ్య మాటల యుద్ధం మరింత ముదిరింది. ముఖ్యమంత్రి రేవంత్ రెడ్డి అసెంబ్లీలో ‘సంధ్యారావు’ పేరుతో ఉన్న ఎక్స్ అకౌంట్ పోస్టును ప్రస్తావించడంపై మాజీ మంత్రి హరీశ్ రావు తీవ్రంగా స్పందించారు. అసలు బీఆర్‌ఎస్‌లో సంధ్యారావు అనే వ్యక్తి లేరని, ‘అంతర్జాతీయ బీఆర్‌ఎస్ ప్రధాన కార్యదర్శి’ అనే పదవే లేదని ఆయన స్పష్టం చేశారు. కాంగ్రెస్ పార్టీనే ఫేక్ అకౌంట్ సృష్టించిందని ఆరోపించిన హరీశ్ రావు.. దీనిపై విచారణ జరిపించాలని, లేకపోతే సభా హక్కుల ఉల్లంఘన నోటీసులు ఇస్తామని హెచ్చరించారు.

స్పీకర్‌ను దూషించిన ఘటనపై తెలంగాణ ముఖ్యమంత్రి రేవంత్‌రెడ్డి అసెంబ్లీలో తీవ్రంగా స్పందించారు. స్పీకర్‌ స్థానాన్ని అవమానించడం ప్రజాస్వామ్య వ్యవస్థను అవమానించడమేనని అన్నారు. ప్రజాసమస్యలపై చర్చ జరగకుండా అడ్డుకునేందుకే బీఆర్‌ఎస్‌ అధినేత కేసీఆర్‌ ఎర్రవల్లి ఫామ్‌హౌస్‌లో కుట్రకు తెరతీశారని ఆరోపించారు.

తెలంగాణ అసెంబ్లీ సమావేశాల మూడో రోజు తీవ్ర ఉద్రిక్తత నెలకొంది. సభలో నిరసనకు దిగిన 20 మంది బీఆర్ఎస్ ఎమ్మెల్యేలను స్పీకర్ ఈ సెషన్‌ మొత్తం సస్పెండ్ చేశారు. కేటీఆర్‌, హరీష్‌రావు, జగదీష్‌రెడ్డి, తలసాని శ్రీనివాస్ యాదవ్, సబితా ఇంద్రారెడ్డి తదితరులు సస్పెన్షన్‌కు గురయ్యారు.

శాసనసభ వద్ద సోమవారం బీఆర్‌ఎస్‌ ఎమ్మెల్యేలు, ఎమ్మెల్సీలు నిర్వహించిన నిరసన ఉద్రిక్తతకు దారితీసింది. పోలీసుల ఫిర్యాదుల ఆధారంగా కేటీఆర్‌, హరీశ్‌రావు సహా పలువురు బీఆర్‌ఎస్‌ నేతలపై మూడు ఎఫ్‌ఐఆర్‌లు నమోదయ్యాయి. భద్రతా సిబ్బందిపై దాడి, మహిళా పోలీసులతో దురుసుగా ప్రవర్తించడం, బెదిరింపులు, స్పీకర్‌ను దూషించడం వంటి ఆరోపణలు కేసుల్లో నమోదయ్యాయి.

తెలంగాణలో శాంతిభద్రతలు పూర్తిగా గాడి తప్పాయని బీఆర్ఎస్ డిప్యూటీ ఫ్లోర్ లీడర్, మాజీ మంత్రి హరీశ్ రావు ఆరోపించారు. రాష్ట్రంలో పరిస్థితిని కేంద్రం, గవర్నర్ జోక్యం చేసుకుని రాష్ట్రపతి పాలన విధించాలని డిమాండ్ చేశారు. ముఖ్యమంత్రి రేవంత్ రెడ్డిపై తీవ్రస్థాయిలో విమర్శలు గుప్పించిన ఆయన.. కేసీఆర్ ఇంటిపై దాడి, మహిళా ఎమ్మెల్యేలపై దాడులు, ప్రజా సమస్యలపై అసెంబ్లీలో చర్చకు అవకాశం ఇవ్వకపోవడంపై మండిపడ్డారు.

స్పీకర్ గడ్డం ప్రసాద్ కుమార్‌పై అనుచిత వ్యాఖ్యలు చేశారన్న కేసులో బీఆర్ఎస్ ఎమ్మెల్సీలు తాతా మధు, నవీన్ కుమార్ రెడ్డిలకు నాంపల్లి కోర్టులో భారీ ఊరట లభించింది. పోలీసులు దాఖలు చేసిన రిమాండ్ పిటిషన్‌ను కోర్టు తిరస్కరించింది. రూ.10 వేల పూచీకత్తుతో ఇద్దరు ష్యూరిటీలు సమర్పించాలని ఆదేశిస్తూ, ఎమ్మెల్సీలను వెంటనే విడుదల చేయాలని న్యాయమూర్తి స్పష్టం చేశారు.

హైదరాబాద్‌లోని తెలంగాణ అసెంబ్లీ ప్రాంగణంలో మంగళవారం విషాద ఘటన చోటుచేసుకుంది. ఇరిగేషన్ శాఖ ముఖ్య కార్యదర్శి నవీన్ మిట్టల్ వద్ద పర్సనల్ సెక్రటరీగా పనిచేస్తున్న రాజు గుండెపోటుతో అకస్మాత్తుగా కుప్పకూలారు. వెంటనే స్పందించిన మంత్రి వాకిటి శ్రీహరి స్వయంగా సీపీఆర్ చేసి, అంబులెన్స్‌లో ఆసుపత్రికి తరలించే ఏర్పాట్లు చేసినప్పటికీ.. రాజు ప్రాణాలు దక్కలేదు.

తెలంగాణ అసెంబ్లీలో స్పీకర్ గడ్డం ప్రసాద్ కుమార్, మాజీ మంత్రి హరీశ్ రావు మధ్య తీవ్ర వాగ్వాదం చోటుచేసుకుంది. బీఆర్‌ఎస్ ఎమ్మెల్సీ తాతా మధు చేసిన వ్యాఖ్యలపై స్పీకర్ తీవ్ర ఆగ్రహం వ్యక్తం చేస్తూ.. హరీశ్ రావు తీరుపై మండిపడ్డారు. ‘నా తల్లిని అన్నారు.. నీ తల్లిని అనలేదు’ అంటూ ఘాటు వ్యాఖ్యలు చేశారు.

తెలంగాణలో కాంగ్రెస్ ప్రభుత్వం 1000 రోజుల పాలనపై బీఆర్ఎస్ చేపట్టిన ఆందోళనలు ఉద్రిక్తతకు దారితీశాయి. అసెంబ్లీ వద్ద నిరసన సందర్భంగా పోలీసులతో ఘర్షణ చోటుచేసుకోగా.. స్పీకర్ గడ్డం ప్రసాద్ కుమార్‌పై వ్యాఖ్యలు చేసిన బీఆర్ఎస్ ఎమ్మెల్సీలు తాతా మధు, నవీన్ కుమార్ రెడ్డిని పోలీసులు అరెస్ట్ చేశారు. వీరిపై ఎస్సీ, ఎస్టీ అట్రాసిటీ చట్టంతో పాటు బీఎన్‌ఎస్ సెక్షన్ల కింద కేసులు నమోదయ్యాయి.

తెలంగాణ అసెంబ్లీ స్పీకర్ గడ్డం ప్రసాద్ కుమార్‌పై బీఆర్ఎస్ ఎమ్మెల్సీ తాతా మధు అనుచిత వ్యాఖ్యలు చేసినట్లు సమాచారం. ఈ వ్యాఖ్యలపై స్పీకర్ భావోద్వేగానికి గురయ్యారు. మంత్రులు, ఎమ్మెల్యేలు, ఎమ్మెల్సీలు ఆయనను కలిసి సంఘీభావం తెలిపారు. మరోవైపు తాతా మధు వ్యాఖ్యలకు సంబంధించిన వీడియోను సీఎంవో విడుదల చేయడంతో ఈ వ్యవహారం మరింత రాజకీయ దుమారానికి దారితీసింది. తాతా మధుపై చర్యలు తీసుకునే అంశాన్ని శాసన మండలి చైర్మన్ గుత్తా సుఖేందర్ రెడ్డి పరిశీలిస్తున్నట్లు తెలుస్తోంది.

శాసనసభ స్పీకర్‌ గడ్డం ప్రసాద్ కుమార్‌పై బీఆర్‌ఎస్ ఎమ్మెల్సీ తాతా మధు చేసిన వ్యాఖ్యలపై అసెంబ్లీలో తీవ్ర దుమారం రేగింది. ఈ వ్యవహారంపై ముఖ్యమంత్రి రేవంత్ రెడ్డి తీవ్ర ఆగ్రహం వ్యక్తం చేస్తూ.. కేసీఆర్‌ తక్షణమే క్షమాపణ చెప్పాలని, తాతా మధును బీఆర్‌ఎస్‌ నుంచి డిస్మిస్ చేయాలని డిమాండ్ చేశారు.